यिर्मयाह 29

11 क्यूँके यहोवा की या वाणी सै, के जो कल्पना मै थारै बारै म्ह करुँ सूं उन ताहीं मै जाणु सूं, वे नुकसान की न्ही, बलके सलामती ए की सैं, अर अन्त म्ह थारी उम्मीद पूरी करुँगा। 12 फेर उस बखत थम मेरे ताहीं पुकारोगे अर आकै मेरे तै प्रार्थना करोगे अर मै थारी सुणूँगा। 13 थम मेरे ताहीं ढूँढ़ोगे अर पाओगे भी; क्यूँके थम अपणे पूरे मन तै मेरे धोरै आओगे। 14 मै थमनै मिलूँगा, यहोवा की या वाणी सै, अर गुलाम्मी तै बोहड़ा ले आऊँगा; अर थारै ताहीं उन सारी जातियाँ अर जगहां म्ह तै जिन म्ह मन्‍नै थारै ताहीं जबरदस्ती लिकाड़ दिया सै, अर थमनै कठ्ठा करकै इस जगहां म्ह बोहड़ा ले आऊँगा जड़ै तै मन्‍नै थारे ताहीं गुलाम करवा कै लिकाड़ दिया था, यहोवा की योए वाणी सै।"