1 "उन दिनां म्ह मै सारे इस्राएली कुलां का परमेसवर ठहरूँगा अर वे मेरी प्रजा ठैहरैगें, यहोवा की योए वाणी सै।" 2 यहोवा न्यू कहवै सै: "जो प्रजा तलवार* तै बच लिकड़ी, उनपै बियाबान म्ह अनुग्रह होया; मै इस्राएल ताहीं आराम देण कै खात्तर त्यार होया।"

3 "यहोवा नै मेरे ताहीं पिछले बखत म्ह दर्शन देकै कह्या सै। मै तेरै तै सदा प्यार राखदा आया सूं; इस कारण मन्‍नै तेरै पै अपणी करुणा बणाए राक्खी सै। 4 हे इस्राएली कुमारी कन्या! मै तन्‍नै फेर बणाऊँगा; ओड़ै तू फेर सिंगार करकै डफ बजाण लाग्गैगी, अर आनन्द करण आळयां के बीच म्ह नाचदी होई लिकड़ैगी। 5 तू सामरिया के पहाड़ां पै अंगूर की बारी फेर लगावैगी; अर जो उननै लगावैंगे, वे उनके फळ भी खाण पावैंगें। 6 क्यूँके इसे दिन आवैगा, जिस म्ह एप्रैम के पहाड़ी देश के पहरेदार पुकारैगें: ‘उठो, हम अपणे परमेसवर यहोवा कै धोरै सिय्योन म्ह चाल्‍लां।’"

7 क्यूँके यहोवा न्यू कहवै सै: "याकूब के कारण आनन्द तै जयजयकार करो: जातियाँ म्ह जो सारया तै बढ़िया सै उसके खात्तर ऊँच्‍चे शब्द तै स्तुति करो, अर कहो, ‘हे यहोवा, अपणी प्रजा इस्राएल के बचे होए माणसां का भी उद्धार कर।’ 8 देक्खो, मै माणसां नै उत्तर देश तै ले आऊँगा, अर धरती के कोणे-कोणे तै कठ्ठे करुँगा, अर उनके बीच आन्धे, लंगड़े, गर्भवती, अर जच्‍चा जनान्‍नी भी आवैगी; एक बड़ी मण्डळी उरै बोहड़ आवैगी। 9 वे आँसू बहान्दे होए आवैंगे अर गिड़गिड़ान्दे होए मेरे जरिये पोंहचाए जावैंगे, मै उननै नदियाँ कै किनारे-किनारे तै अर इसे चौरस राह तै ले आऊँगा, जिसतै वे ठोक्‍कर ना खाण पावैंगें; क्यूँके मै इस्राएल का पिता सूं, अर एप्रैम मेरा जेठ्ठा सै*।"

10 "हे जात्ति-जात्ति के माणसों, यहोवा का वचन सुणो, अर दूर-दूर के द्वीपां म्ह भी इसका प्रचार करो; कहो, ‘जिसनै इस्राएलियाँ ताहीं तित्तर-बितर करया था, ओड़ै उन ताहीं कठ्ठे भी करैगा, अर उनकी इसी हिफाजत करैगा जिसी चरवाहा अपणे झुण्ड की करै सै।’ 11 क्यूँके यहोवा नै याकूब ताहीं छुड़ा लिया, अर उस दुश्मन के पंजे तै जो उसतै घणा ताकतवर सै, उस ताहीं छुटकारा दिया सै। 12 इस करकै वे सिय्योन की चोट्टी पै आकै जयजयकार करैंगे, अर यहोवा तै नाज, नया दाखमधु, टटका तेल, भेड़-बकरियाँ अर गां-बळधां के बच्‍चे शरुआत बढ़िया-बढ़िया दान पाण कै खात्तर ताँता बाँधकै चाल्‍लैगें; अर उनका प्राण सींचे होए बाग की तरियां होवैगा, अर वे फेर कदे उदास ना होवैंगे। 13 उस बखत उनकी सब कुमारी नाचदी होई खुशी मनावैंगी, अर जवान अर बूढ़े एक साथ आनन्द करैंगे। क्यूँके मै उनके शोक नै दूर करकै उन ताहीं आनन्दित करुँगा, मै उननै शान्ति देऊँगा, अर दुःख कै बदलै आनन्द देऊँगा। 14 मै याजकां ताहीं चिकणी चिज्जां तै घणा छिका देऊँगा, अर मेरी प्रजा मेरे बढ़िया दान तै खुश होवैगी," यहोवा की योए वाणी सै।

15 यहोवा न्यू भी कहवै सै: "सुण, रामाह नगर म्ह विलाप अर बिलख-बिलख कै रोण का शब्द सुणण म्ह आवै सै। राहेल अपणे बाळकां कै खात्तर रोण लागरी सै; अर अपणे बाळकां कै कारण शान्त न्ही होन्दी, क्यूँके वे न्ही रहे।*"

16 यहोवा न्यू कहवै सै: "रोण-पीटण अर आँसू बहाण तै रुक जा; क्यूँके तेरी मेहनत का फळ मिलण आळा सै, अर वे दुश्मनां के देश तै बोहड़ आवैंगे।* 17 अन्त म्ह तेरी उम्मीद पूरी होवैगी, यहोवा की या वाणी सै, तेरे वंश के माणस अपणे देश म्ह बोहड़ आवैंगे। 18 पक्‍का मन्‍नै एप्रैम ताहीं ये बात कहकै विलाप करदे सुण्या सै, ‘तन्‍नै मेरी ताड़ना करी, अर मेरी ताड़ना इसे बाछड़े के जिसी होई जो लिकाड़या ना गया हो; पर इब तू मन्‍नै बोहड़ा ले चाल, तब मै चाल्‍लूँगा, क्यूँके तू मेरा परमेसवर सै। 19 भटक जाणकै बाद मै पछताया; अर सिखाए जाणकै बाद मन्‍नै छात्ती पीट्टी; पुराणे पापां नै याद कर* मै शर्मिन्दा होया अर मेरा मुँह काळा होग्या।’ 20 के एप्रैम मेरा प्यारा बेट्टे न्ही सै? के वो मेरा लाडला छोरा न्ही सै? जिब-जिब मै उसके खिलाफ बात करुँ सूं, तब-तब मन्‍नै उसकी याद आवै सै। इस करकै मेरा मन उसकै कारण भर आवै सै; अर मै पक्‍का उसपै दया करुँगा, यहोवा की योए वाणी सै।"

21 "हे इस्राएली कुमारी, जिस राजमार्ग तै तू गई थी, उसे म्ह खम्भे अर झण्डे खड़े कर; अर अपणे इन नगरां म्ह बोहड़ आण पै मन लगा। 22 हे भटकण आळी कन्या, तू कब ताहीं आस्सै-पास्सै फिरदी रहवैगी? यहोवा की एक नई सृष्टि धरती पै प्रगट होवैगी, यानिके जनान्‍नी माणस की मदद करैगी*।"

23 इस्राएल का परमेसवर सेनाओं का यहोवा न्यू कहवै सै "जिब मै यहूदी बन्दियाँ नै उनके देश के नगरां म्ह बोहड़ाऊँगा, फेर उन म्ह यो आशीर्वाद फेर दिया जावैगा ‘हे धर्म तै भरे वासस्‍थान, हे पवित्र पर्वत, यहोवा तन्‍नै आशीष दे!’ 24 यहूदा अर उसके सारे नगरां के माणस अर किसान अर चरवाहे भी उस म्ह कठ्ठे बसैंगे। 25 क्यूँके मन्‍नै थके होए माणसां का प्राण तृप्त करया, अर उदास माणसां के प्राण ताहीं भर दिया सै।*"

26 इसपै मै जाग उठ्या, अर देख्या, अर मेरी नींद मन्‍नै मिठ्ठी लाग्गी।

27 "देख, यहोवा की या वाणी सै, के इसे दिन आण आळे सैं जिन म्ह मै इस्राएल अर यहूदा के घरान्यां के बाल-बच्यां अर पशु दोनुआ ताहीं घणा बढ़ाऊँगा। 28 जिस तरियां तै मै सोच-सोचकै उननै गिरान्दा अर ढान्दा, नाश करदा, काट गेरदा अर सत्यानाश ए करया करदा, उसे तरियां तै मै इब सोच-सोचकै उननै बोऊँगा अर बढ़ाऊँगा, यहोवा की योए वाणी सै। 29 उन दिनां म्ह वे फेर ना कहवैंगे: ‘बाप-दाद्यां नै तो खाट्टे अंगूर खाए, पर उनके वंश के दाँत खाट्टे होगे सैं।’ 30 क्यूँके जो कोए खाट्टे अंगूर खावै उसे के दाँत खाट्टे हो जावैंगे, अर हर एक माणस अपणे ए अधर्म कै कारण मारया जावैगा।"

31 "फेर यहोवा की या भी वाणी सै, सुण, इसे दिन आण आळे सैं जिब मै इस्राएल अर यहूदा के घरान्यां तै नया करार करुँगा*। 32 वो उस करार की तरियां ना होवैगा जो मन्‍नै उनके पुरखां तै उस बखत करया था जिब मै उनका हाथ पकड़कै उननै मिस्र देश तै लिकाड़ ल्याया, क्यूँके जै मै उनका पति था, तोभी उननै मेरा वो करार तोड़ दिया। 33 पर जो करार मै उन दिनां कै बाद इस्राएल के घराने तै करुँगा, वो यो सै: मै अपणे नियम-कायदे उनकै मन म्ह समाऊँगा, अर उसनै उनके हृदय पै लिक्खूँगा; अर मै उनका परमेसवर ठहरूँगा, अर वे मेरी प्रजा ठैहरैगें, यहोवा की या वाणी सै।* 34 अर तब उननै फेर एक दुसरे तै न्यू न्ही कहणा पड़ैगा के यहोवा नै जाणो, क्यूँके, यहोवा की या वाणी सै के छोट्टे तै लेकै बड़े ताहीं, सारे के सारे मेरा ज्ञान राक्खैगें; क्यूँके मै उनका अधर्म माफ करुँगा, अर उनका पाप फेर याद ना करुँगा।*"

35 जिसनै दिन तै रोशनी देण कै खात्तर सूरज ताहीं अर रात नै रोशनी देण कै खात्तर चाँद अर तारागण के नियम ठहराए सैं, जो समुन्दर नै उछाळै अर उसकी लहरां नै गरजावै सै, अर जिसका नाम सेनाओं का यहोवा सै, ओड़ै यहोवा न्यू कहवै सै: 36 "जै ये नियम मेरे स्याम्ही तै टळ जावै जिब्बे यो हो सकैगा कै इस्राएल का वंश मेरी नजर म्ह सदा कै खात्तर एक जात्ति ठहरण की उम्मीद मिट सकैगा।"

37 यहोवा न्यू भी कहवै सै, "जै उप्पर तै अकास माप्या जावै अर नीच्‍चै तै धरती की नींव खोद-खोदकै पता लगाया जावै, फेर ए मै इस्राएल के सारे वंश नै उनके सारे पापां कै कारण उनतै हाथ उठाऊँगा।"

38 "देख, यहोवा की या वाणी सै, इसे दिन आण लागरे सैं जिन म्ह या नगर हननेल के गुम्मट तै लेकै कोणे कै फाटक ताहीं यहोवा कै खात्तर बणाया जावैगा। 39 मापण की डोरी फेर आगै बढ़कै सीध्धी गारेब पहाड़ी ताहीं, अर ओड़ै तै घूमकै गोआ नामक जगहां तक पोंहचैंगी। 40 लाशां अर राख की सारी तराई अर किद्रोन नाळे तक जितने खेत सैं, घोड़यां के पूर्वी फाटक के कोणे तक जितनी धरती सै, वो सारी यहोवा के खात्तर पवित्र ठहरैगी। सदा तक वो नगर फेर कदे ना तो गिराया जावैगा अर ना ढाया जावैगा।*"