Deuteronômio 11

परमेशरो री महान् आशीष

1 मूसे इस्राएलिया खे बोलेया, "इजी री खातर तैं आपणे परमेशर यहोवे साथे बऊत जादा प्यार राखणा ओर जो कुछ तिने तांगे सम्बाल़ी राखेया, मतलब तेसरी बिदिया, नियम ओर आज्ञा रा सदा पालण करना।" 2 तुसे आज ये सोची-समजी लओ कऊँकि आऊँ तो तुसा रे बाल-बच्चेया गे पनि बोलदा जिने ना तो कुछ देखेया ओर ना ई जाणेया कि तुसा रे परमेशर यहोवा क्या-क्या ताड़ना कित्ती ओर केड़ी महिमा, सामर्थ ओर तागत दखाई 3 ओर मिस्रो रे राजा फिरौनो खे केड़े-केड़े चिह्न दखाए ओर तेसरे सारे मिस्र प्रदेशो रे चमत्कारो रे केड़े-केड़े काम कित्ते। 4 तिने मिस्रो रे सिपाईया रे कोड़े ओर रथा साथे एड़ा कित्तेया, मतलब जेबे सेयो तुसा रा पीछा करने लगी रे थे तेबे यहोवे लाल समुद्रो दे डबोई की किंयाँ नाश करीते कि आजो तक तिना रा पता निए 5 ओर तुसा रे एते जगा रे जेती आसे एबु ए पऊँचणे तक तिने सुनसाण जगा रे तुसा रिया तँईं क्या-क्या कित्तेया।*11:5 प्रेरित 7:5

6 तिने रूबेन वंशो रे एलीआबो रे पाऊ दातान ओर अबीरामो साथे एड़ा कित्तेया; मतलब तरतिये आपणा मूँ खोली की सेयो कराने, डेरे ओर सबी डांगरा समेत सब इस्राएली लोका रे देखदे-देखदे किंयाँ निगल़ी ले। 7 पर यहोवे रे यो सब बड़े-बड़े काम तुसे आपू देखी राखे।

वादा कित्ते रे प्रदेशो रिया आशीषा

8 इजी बजअ ते जितणी आज्ञा आज आऊँ तुसा खे सुणाऊँआ, सेयो सब मानेया करनिया, ताकि तुसे सामर्थी ऊई की तेते प्रदेशो रे जेतेरे अक्कदार ऊणे खे तुसे पार जाणे लगी रे, जाई की तेथो रे अक्कदार ऊई जाओ 9 ओर तेते प्रदेशो रे लाम्बी उम्रा तक रई सको, जेतेखे तुसा खे ओर तुसा रे वंशो खे देणे रा वादा यहोवे तुसा रे बुजुर्गा ते कित्तेया ओर जो सच्चो खेई बऊत ई पजणे वाल़ा देश ए। 10 देखो, जेस प्रदेशो रे मालक ऊणे खे तुसे जाणे लगी रे, से मिस्र प्रदेशो जेड़ा निए, जेथा ते तुसे निकल़ी की आई रे, जेती तुसे बेजा बाओ थे ओर अरी साग-सब्बजिया रे डोरूआ री रीतिया मुताबिक आपणे पैरे की नाल़िया बणाई की सिंजो थे। 11 पर जेस प्रदेशो रे मालक ऊणे खे तुसे पार जाणे लगी रे, से पाह्ड़ ओर काअटिया रा देश ए ओर सर्गो री बरखा रे पाणिए साथे सिंजेया जाओआ। 12 से एड़ा प्रदेश ए जेतेरी तेरा परमेशर यहोवा देखपाल़ करोआ ओर सालो रे शुरूओ ते लई की आखरी तक तेरे परमेशर यहोवे री नजर तेते पाँदे लगातार लगी री रओई।

13 जे तुसे मेरी आज्ञा खे जो आज आऊँ तुसा खे सुणाऊँआ त्यानो साथे मानोगे ओर आपणे सारे मन ओर सारे प्राणो साथे, आपणे परमेशर यहोवे साथे प्यार राखो ओर तेसरी सेवा करदे रओ, 14 तो आऊँ तुसा रे प्रदेशो रे बरसाती रे शुरूओ ओर आखरी दोनो बखतो री बर्खा आपणे-आपणे बखतो रे बरसाऊँगा, जेते साथे तूँ आपणा नज्ज, नया अंगूरा रा रस ओर शुद्ध तेल कट्ठा करी सकेया।*11:14 याकूब 5:7 15 मां तेरे डांगरा खे मैदानो रे काआ जमाणा ओर तां पेट परी की खाणा ओर सन्तुष्ट रणा।

16 इजी री खातर आपणे बारे दे सावधान रओ, एड़ा नि ओ कि तुसा रा मन तोखा खाओ ओर तुसे बईकी की दूजे देवतेया री पूजा करने लगो ओर तिना गे माथा टेकणे लगो 17 ओर यहोवे रा कोप तुसा पाँदे पड़को ओर से सर्गो री बर्खा बन्द करी देओ ओर जमीन आपणी उपज नि देओ ओर तुसे तेते खरे प्रदेशो ते जो यहोवा तुसा खे देओआ चट ई नाश ऊई जाओ।

18 इजी री खातर तुसे मेरे इना वचना खे आपणे-आपणे मन ओर प्राणो दे बसाई की राखेयो ओर चिह्नो रे रूपो दे आपणे आथो रे बानणे ओर सेयो तुसा री आखी बीचे टीके रा काम करो। 19 तुसे कअरे बैठी की, बाटा रे चलदे, लेटदे-उठदे इना री चर्चा करी की आपणे बच्चेया खे सिखाया करेयो। 20 यो आपणे कअरो री चौखटा रे कनारे ओर आपणे प्रवेश द्धारो पाँदे लिखणियां। 21 ताकि जेस प्रदेशो रे बारे दे यहोवे तेरे बुजुर्गा ते वादा करी की बोलेया था कि मां से तुसा खे देणा, तिदे तुसे ओर तुसा रे बच्चेया री जादा उम्र ओ ओर जदुओ तक तरतिया पाँदे सर्ग बणेया रा रओ, तदुओ तक सेयो बी बणे रे रओ।

22 इजी री खातर तुसे इना सबी आज्ञा खे मानणे दे जो आऊँ तुसा खे सुणाऊँआ पूरी चौकसी करी की आपणे परमेशर यहोवे साथे प्यार राखो ओर तेसरी सारी आज्ञा खे मानो ओर तेसरे विश्वासो दे बणे दे रओ, 23 तो यहोवे सेयो सारिया जातिया तुसा रे आगे ते निकयाल़ी देणियां ओर तुसे आपू ते बड़ी ओर सामर्थी जातिया रे अक्कदार ऊई जाणे। 24 जेते-जेते जगा रे तुसा रे पैर पड़ो सेयो सारे तुसा रेई ऊई जाणे, मतलब सुनसाण जगा ते लबानोनो तक ओर फरात नाओं री नदिया ते लई की पश्चिमो रे समुद्रो तक तुसा रा बन्ना ऊणा। 25 तुसा सामणे कोई बी खड़ा नि रई सकणा; कऊँकि जितणी जमीना पाँदे तुसा रे पैर पड़ने तिना सबी रे रणे वाल़े लोका रे मनो दे तुसा रे परमेशर यहोवे आपणे वादे रे मुताबिक तुसा रिया बजअ ते तिना रे डर ओर थुरनी पैदा करी देणी।

26 देखो, आऊँ आजके दिने तुसा रे आगे आशीष ओर स्राप दुँईं खे राखी देऊँआ। 27 मतलब जे तुसे आपणे परमेशर यहोवे रिया इना आज्ञा खे जो आज आऊँ तुसा खे सुणाऊँआ, मानोगे, तो यहोवे तुसा खे आशीष देणी 28 ओर जे तुसे आपणे परमेशर यहोवे री आज्ञा नि मानोगे ओर जेते बाटा री आज्ञा आऊँ आज सुणाऊँआ तिजी खे छाडी की दूजेया देवतेया पीछे चली पड़ोगे जिना खे तुसे जाणदे नि, तो तुसा पाँदे स्राप पड़ना।

29 जेबे तेरा परमेशर यहोवा ताखे तेते प्रदेशो रे पऊँचाओ जेतेरे अक्कदार ऊणे खे तुसे जाणे वाल़े ए, तेबे आशीष गिरिज्जीम पाह्ड़ो पाँदो ते ओर स्राप एबाल पाह्ड़ो पाँदो ते सुनाणा।*11:29 यूह. 4:20 30 क्या सेयो यरदनो ते पार, सूरजो रे डूबणे रिया तरफा खे, अराबा रे रणे वाल़े कनानिया रे प्रदेशो रे, गिलगालो रे सामणे, मोरे रे बड़े डाल़ो रे नेड़े निए?

31 तुसे तो यरदन नदिया ते पार इजी खे जाणे वाल़े ए, ताकि जो प्रदेश तुसा रा परमेशर यहोवा तुसा खे देओआ, तिजी रे अक्कदार ऊई जाओ ओर तुसे तेतेरे अक्कदार ऊई की तिदे रओ। 32 इजी री खातर जितणे नियम ओर बिदिया आऊँ आज तुसा खे सुणाऊँआ, तिना सबी खे मानणे रे चौकसी करनी।