अय्यूब 16

अय्यूबो रा एलीपजो खे ज्वाब

1 फेर अय्यूबे एलीपजो खे ओर ओरी लोका खे ज्वाब दित्तेया,

2 "एड़िया बऊत सारिया गल्ला आऊँ सुणी चुकेया रा,

तुसे सारे के सारे नकम्मे शान्ति देणे वाल़े ए।

3 क्या बेकारो रिया गल्ला रा अन्त कदी ऊणा?

तूँ मेरिया कुणजी गल्ला ते पड़की की माखे ईंयाँ थिड़की की ज्वाब देआ?"

4 जे तुसा री दशा मेरी जेड़ी ऊँदी,

तो आऊँ बी तुसा जेड़िया गल्ला करी सकूँ था;

आऊँ बी तुसा रा मजाक करने खे गल्ला बणाई सकूँ था

ओर तुसा रे खलाफ सिर ईलाई सकूँ था।

5 फेर बी मां आपणियां गल्ला साथे तुसा खे याओ देणा था

ओर शान्तिया रिया गल्ला करी की तुसा रा दु:ख कम करने री कोशिश करदा।

6 चाए आऊँ बोलूँ बी तेबे बी मेरा दु:ख कम नि ऊणा,

चाए आऊँ चुप रऊँ, तेबे क्या मेरे चुप रणे ते मेरा कष्ट कम नि ऊणा?

7 पर सच्चो खेई एबे परमेशरे आऊँ थकाईता रा

ओर तिने मेरा सारा परिवार मांते लग करिता रा।

8 तिने मेरा शरीर सुकाईता रा, जो मेरे खलाफ गवाह् ठईरी रा

ओर मेरी कमजोरी मेरे खलाफ खड़ी ऊई की

मां सामणे गवाई देओई।

9 तिने आपणे गुस्से रे आई की आऊँ फाड़ेया ओर मां पीछे पड़ी रा;

से मांते कृणा करोआ

ओर मेरा दुश्मण माखे आखी दखाओआ।*16:9 शोगो रे गाणे 2:16

10 एबे लोक आसणे ओर मेरा मजाक करने लगी रे

ओर मेरी बेज्जती करी की मेरिया खाखा पाँदे थप्पड़ बाओए

ओर सेयो सब मेरे खलाफ कट्ठे ओए।

11 परमेशरे आऊँ बुरे लोका रे वशो रे करिता रा

ओर दुष्ट लोका रे आथो दे फसाईता रा।

12 पईले आऊँ सुखो रे रऊँ था, पर तिने आऊँ चूर-चूर करिता रा;

तिने आऊँ आपणा नशाणा बणाई की

मेरी क्याड़ी पकड़ी की मेरे टुकड़े-टुकड़े करीते।

13 तेसरे तीर मेरे चऊँ कनारे उडने लगी रे,

से निर्दयी ऊई की मेरे गुर्देया खे उजोआ

ओर मेरा पित्त जमीना दे बाह्यी देओआ।

14 से शूरवीरो जेड़ा मां पाँदे अमला करी की माखे

चोटा पाँदे चोट पऊँचाई की काईल करोआ।

15 कऊँकि आऊँ शोग करने लगी रा, आऊँ टाट पईनुँआ जो मैं एकी साथे सिली ती दी ए,

ओर आऊँ एती बऊत दु:खी ऊई की स्वाई पाँदे बैठी रा।

16 मेरा मूँ रोंदे-रोंदे लाल ऊईगा रा

ओर मेरिया आखी पाँदे अन्दकूप न्हेरा छाईगा रा;

17 तेबे बी मैं आपणे आथे की कोई ईंसा नि करी राखी;

ओर मेरी‍ प्रार्थना पवित्र ए।

18 ओ तरती, जो मेरिया तँईं बुरा ए; तिजी खे लकोई की नि राख!

न्याय मांगणे रिया तँईं जो आऊँ रोया से लुकेया दा नि रओ।

19 देखो, एबु बी स्वर्गो दे मेरा गवाह् ए

ओर मेरे बारे दे सई गवाई देणे वाल़ा ऊबे ए।

20 मेरे दोस्त ई मांते कृणा करोए,

पर आऊँ परमेशरो रे सामणे मताद मांगदे रोऊँआ,

21 आऊँ एड़े माणूंए खे चाऊँआ जो मेरिया तरफा ते परमेशरो रे सामणे मेरे पक्षो रा समर्थण करो,

जिंयाँ कोई माणूं आपणे पड़ोसिये रे पक्षो दे मकद्दमा लड़ोआ।*16:21 अय्यू. 31:35

22 कऊँकि कुछ साल बाद आऊँ तेसा बाटा रे चली जाणा,

जेथा ते कोई माणूं फेर वापस नि आऊँदा।*16:22 अय्यू. 10:21