अय्यूब 21

अय्यूबो रा सोपरो खे ज्वाब

1 फेर अय्यूबे आपणे दोस्ता खे ज्वाब दित्तेया,

2 "त्यानो साथे मेरी गल्ल सुण;

ओर तेरी शान्ति येई ओ।"

3 तुसे थोड़िया जिया मेरिया गल्ला बी सुणी लओ,

जेबे आऊँ गल्ला करी की खत्म ऊई जाऊँ, फेर तुसे चाए मेरा मजाक करदे रणा।

4 आऊँ माणूंए साथे बईस नि करने लगी रा, मेरी बईस परमेशरो साथे ए,

इजी री खातर आऊँ बेचैन आ।

5 मेरी तरफा खे देखो ओर हैरान ओ;

ओर मेरी गल्ल सुणी की कुछ नि बोलो।

6 जेबे आऊँ आपणे कष्टा खे याद करूँआ तेबे आऊँ कबराई जाऊँआ

ओर मेरा शरीर थरथराणे लगी जाओआ।

7 क्या बजा ए कि दुष्ट लोक जिऊँदे रओए,

बल्कि स्याणे बी ऊई जाओए ओर तिना री तअन-दौलत बढ़दी जाओई।*21:7 अय्यू. 12:6

8 सेयो आपणे बच्चेया खे बड़े ऊँदे ऊए देखोए।

तिना रे पोते तिना खे खुश करोए।

9 परमेशर तिना रे कअरो पाँदे मुसीबत नि ल्याऊँदा;

ओर ना तिना पाँदे कदी सजा री सोठी अमला करोई।

10 तिना रे बल़द सदा गायी खे गाबण करोए ओर

तिना रिया गायी बच्चेया खे पैदा करोईया ओर सेयो बच्चा कदी नि गिरांदिया।*21:10 निर्ग. 23:26

11 दुष्ट माणूंआ रे, पेडा रे चूण्डो जेड़े बऊत सारे बच्चे ओए ओर सेयो तिना खे बारे जाणे देओए

ओर तिना रे बच्चे खुशिया साथे नाचोए।

12 सेयो डफली ओर बीणा बजांदे ऊए गाओए

ओर बंसरिया री आवाज सुणी की खुश ओए।

13 सेयो आपणी जिन्दगिया दे खुशिया ते रओए,

तिना खे मरने ते पईले बी कुछ दु:ख-तकलीफ नि ऊँदी।

14 तेबे बी सेयो लोक परमेशरो ते बोलोए, आसा ते दूर ओ!

आसा खे तेरिया बाटा रा ज्ञान जाणने री कोई इच्छा नि ए।

15 सर्वशक्तिमान परमेशर क्या ए, जो आसे तेसरी सेवा करिए?

ओर जे आसे तेसते प्रार्थना बी करिए, तो आसा खे क्या फायदा ऊणा?

16 तिना खे लगोआ कि तिने आपू खे अमीर बणाई ता दा ए। पर ये सच्च नि ए।

इजी री खातर आऊँ तिना सलाई खे नि सुणदा जो सेयो बोलोए।

17 तुसे कदी एड़ा बी देखेया कि दुष्ट जवानिया देई मरी गा?

तिना बीचा ते केसी एकी खे बी कदी परेशानी आई?

तिना खे परमेशरे कदी गुस्से दे सजा दित्ती ओ? एड़ा कदी नि ऊआ।

18 परमेशर तिना खे ईंयाँ नि ड्वाँदा जिंयाँ अवा पूए खे डवाई देओई;

सेयो कदी बी एकी बवण्डरो ते दूर नि कित्ते जाई सकदे। ओर सेयो दुष्ट माणूं पऊण-चूखाने साथे ड्वाए रे पूए जेड़े ओए।

19 तुसे बोलोए कि परमेशर तेसरे पापो री सजा तेसरे बच्चेया खे देओआ,

खरा ऊँदा कि परमेशर तेसरे पापो रा बदला तेसते ई लंदा, ताकि तेसखे कुछ महसूस ऊई सको।

20 दुष्ट आपणियां आखी साथे ई आपणा नाश देखो;

ओर आपू ई सर्वशक्तिमान परमेशरो रे गुस्से री सजा पुगतो।*21:20 पजन 75:8

21 कऊँकि तिना रे मरने ते बाद तिना खे एते गल्ला ते कोई फर्क नि पड़दा

कि तिना रे बच्चेया साथे क्या ऊणा।

22 क्या कोई माणूं परमेशरो खे ज्ञानो रिया गल्ला सखाई सकोआ?

जो देशो-देशो रे बड़े-बड़े राजेया रा न्याय करोआ।

23 कोई माणूं तो सुख-शान्तिया रे आपणी पूरी जिन्दगी कटी की,

बड़ी राम-दारिया रे रई की मरी जाओआ।

24 तेसरा शरीर मोटा-ताजा

ओर तेसरिया आड्डिया मजबूत रओईया।

25 ओर कोई माणूं आपणी जिन्दगिया रे पीतरे-पीतरे ई कुड़कुड़ाई की बिना सुखो

ते मरी जाओए।

26 पर अन्तो दे सेयो मरी जाओए ओर तिना खे माट्टिया दे दबाई देओए।

मरने ते बाद तिना दूई रे शरीरो दे कीड़े पड़ी जाओए।

27 मेरे दोस्तो देखो, आऊँ तुसा रे बचार जाणूंआ;

ओर तिना साजिशा खे बी, जो तुसे मेरे बारे अन्याय साथे करोए।

28 तुसे बोलेया, "गरीबा पाँदे अन्याय करने वाल़े अमीर माणूंआ रा कअर केई गया?

दुष्टा रे रणे रे डेरे केई रये?"

29 क्या तुसे यात्रा करने वाल़े लोका ते गल्ल नि कित्ती?

क्या तुसे तिना गल्ला खे नि जाणदे जो सेयो बताओए?

30 जेस दिने परमेशर गुस्से दे ऊई की सजा देओआ,

तेस दिने दुष्टो खे सदा छाडी देओए।*21:30 अय्यू. 20:29

31 केस माणूंए तेसरे चाल-चलणो रे बारे दे तेसरे मुंए पाँदे बताणा?

ओर तिने जो दुष्कर्म करी राखेया, तेतेरा बदला तेसखे केस देणा?

32 जेबे से मरी जाओआ तेबे बडिया इज्जती साथे तेसरा शरीर कब्रा तक पऊँचाया जाओआ

ओर लोक तेसरी कब्रा री रखवाल़ी करदे रओए।

33 जेती तेसरा शरीर राखोए तेती जमीन नरम ओई।

ओर ह्जारो लोक मरने वाल़े खे अलविदा बोलणे खे आओए।*21:33 मरने रे संस्कारो रे जुलूसो दे

34 मेरे दोस्तो, तुसा रे ज्वाबो रे तो चूठो ते अलावा ओर कुछ पनिए,

इजी री खातर तुसे माखे चूठी शान्ति कऊँ देओए?