अय्यूब 30

1 पर एबे जिना री उम्र मांते कम ए, सेयो मेरी आसिया लगाओए,

जिना रे बाओआ खे आऊँ एते जोगा पनि समजूँ था कि तिना खे आपणी पेडा-बाकरिया री चौकसी करने वाल़े कुत्तेया साथे बठयाल़ुँ,

2 इना रे बाओ पईले तागतबर थे। पर एबे सेयो स्याणे ऊईगे दे।

ओर सेयो इतणे कमजोर ए कि सेयो मेरिया तँईं कोई काम नि करी सकदे।

3 सेयो इतणे गरीब ओर पूखे थे

कि सेयो राती सुनसाण जगा दे सूकिया जड़ी खणी की खाओ थे।

4 सेयो जाड़ो रे नेड़े-तेड़े रा लोनिया-साग तोड़ी लओ थे

ओर झाऊए रे डाल़ो रिया जड़ा खाओ थे ताकि गर्म रई सको।

5 तिना खे माणूंआ बीचा ते नठाई देओ थे,

लोक तिना पीछे "चोर-चोर" करी की आका पाओ थे।

6 तिना खे चट्टानी री गुफा रे, जमीना रे गड्डेया रे

ओर काअटिया री संगड़ी जगा दे रणा पड़ोआ।

7 सेयो जाड़ो बीचे मरेलदे रओए

ओर बिच्छु पौधेया निठे कट्ठे पड़े रे रओए।

8 सेयो मूर्ख ओर नीच लोका रे वंशज ए,

जो कूटी-कूटी की एस देशो ते नठाईते थे।

9 एड़े ई लोक एबे मां पाँदे जचदे गाणे गाओए

ओर माखे ताना मारदे रओए।

10 सेयो मांते कृणा करोए

ओर मेरे मुंए पाँदे थूकणे ते पनि डरदे।

11 परमेशरे आऊँ कमजोर बणाईता रा, ओर तिने आऊँ लगभग काई दित्तेया दा ए।

इजी बजा ते सेयो मां साथे जो चाओ करी या बोली सकोए।

12 मेरे दाँणे कनारे बजारू लोक उठोए ओर माखे नठाओए

ओर सेयो माखे नाश करने रिया तँईं

आपणे नवें-नवें तरीके टोल़ोए।

13 तिने मेरी नठणे री बाट बन्द करिती दी,

ओर माखे नाश करने री कोशिश कित्ती;

ओर तिना खे रोकणे वाल़ा कोई नि ए।

14 जेबे सेयो मेरे नेड़े आओए तो आऊँ तिना खे रोकी नि सकदा।

जेबे आऊँ थाले रूड़ूँआ, तो सेयो मां पाँदे अमला करने खे दौड़ोए।

15 आऊँ कबराईगा

ओर मेरी अमीरी मानो अवा रे ड्वाईती

ओर मेरा एशो-राम बादल़ो जेड़ा लोप ऊईगा।

16 एबे आऊँ मरने वाल़ा ए,

मेरा हर दिन दु:खो रे गुजरोआ।

17 रात मेरिया आड्डिया खे चूर-चूर करी देओई

ओर माखे तकलीफ देणे वाल़ी पीड़ शान्त नि ऊँदी।

18 परमेशरे मां साथे जो कित्तेया ए,

तेतेरिया बजा ते मेरे टाल्ले टिले ऊईगे रे। ओर मेरी चामड़ी एबे सई तरीके री नि लगदी।

19 परमेशरे आऊँ चीकड़ो रे सेटी ता रा;

ओर आऊँ माट्टी ओर स्वाई जेड़ा ऊईगा रा।

20 ओ परमेशर, आऊँ तेरी दुहाई देऊँआ, पर तूँ माखे ज्वाब नि देंदा,

आऊँ खड़ा ओऊँआ, पर तूँ मेरिया तरफा खे कूरने लगेया।

21 तूँ मेरिया तँईं बदली की निर्दयी ऊईगा रा

ओर तूँ आपणे आथा रिया पुरिया तागती साथे माखे सताएया।

22 तुसे मां पाँदे अमला करने रिया तँईं एक तेज अवा पेजोए।

ओर तैं आऊँ पऊण-चूखाने दे नाश करिता दा ए,

23 माखे पता ए कि तुसा आऊँ छोड़ ई मरने देणा।

एड़ा एते तरतिया पाँदे

रणे वाल़े सबी माणूंआ साथे ओआ।

24 तेबे बी क्या कोई माणूं रूड़दे बखते आपणे आथ नि फैलांदा?

क्या कोई बिपदा रे बखते मतादा रिया तँईं दुहाई नि देंदा?

25 क्या आऊँ तेस माणूंए रिया तँईं रोऊँ नि था, जेसरे बुरे दिन आए थे?

ओर क्या मेरा प्राण गरीब माणूंए रिया तँईं दु:खी नि ओ था।

26 माखे खुशी ओर प्रयासे री उम्मीद थी,

पर मुसीबत ओर न्हेरा आई गा।

27 एड़ा दिन कदी नि ऊँदा जेबे आऊँ आपू खे ठीक महसूस करूँआ। हर दिन माखे तकलीफ ओई

ओर आऊँ आपू खे बमार महसूस करूँआ।

28 माखे दु:ख ओआ, ओर जेबे सूरज चमकोआ तेबे बी माखे न्हेरा ई दिशोआ।

आऊँ सभा रे खड़ा ऊई की मतादा रिया तँईं दुहाई देऊँआ।

29 मेरी आवाज गीदड़

या शुतुरमुर्गो रे रोणे जेड़ी उदास ओर दु:खी ए।

30 मेरा पूरा शरिर काल़ा ऊईगा रा

ओर बुखारो रिया गर्मिया ते आऊँ पूरा जल़ी गा रा।

31 इजी बजा ते मेरिया बीणा ते दु:ख ओर मेरिया

बंसरिया ते रोणे री आवाज निकल़ोई।