अय्यूब 34

एलीहूए रा वचन

1 तेबे एलीहू अय्यूबो रे दोस्ता खे ईंयाँ बोलदा गया,

2 "ओ अक्लमंदो! मेरिया गल्ला सुणो,

ओ ज्ञानियो! मेरिया गल्ला त्यानो साथे सुणो।

3 जिंयाँ जीबा साथे रोटिया रा स्वाद चाखेया जाओआ,

तिंयाँ ई वचन कानो साथे परखे जाओए।"

4 आसा खे ये तय करने री जरूरत ए कि कुण सई बोलणे लगी रा ओर आपू बीचे ये तय करना ए

सबी ते खरा क्या ए।

5 कऊँकि अय्यूबे बोली राखेया, "आऊँ निर्दोष ए

ओर परमेशरे माखे दु:ख देई की मां साथे अन्याय करी राखेया।

6 तेबे बी आऊँ सच्चा ए, तेबे बी चूठा ई ठईरूँआ।

मैं कोई पाप नि करी राखेया, परमेशरो रे अन्याय ते जो जख़्म माखे मिली रे, सेयो कदी पनि परने।"

7 क्या तैं कदी एस आदमिए अय्यूबो जेड़ा कोई देखी राखेया ए?

से कदी बी परमेशरो रा सम्मान नि करदा ए।

8 से हमेशा तिना लोका री संगत करोआ

जो बुरे काम करोए ओर दुष्ट लोका साथे बखत बिताओआ।

9 अय्यूबे ये बी बोलेया, "माणूंआ खे परमेशरो खे खुश करने री कोशिश करनी बेकार ए।"

10 इजी खे ओ समजदार लोको! मेरी गल्ल सुणो,

ये कदी पनि ऊई सकदा कि परमेशर दुष्टता रा काम करो

ओर सर्वशक्तिमान परमेशर बुराई करो।

11 से माणूंआ खे तिना रे जरिये कित्ते दे कामा रे मुताबिक ईनाम देओआ

ओर तिना साथे तेड़ा ई बर्ताओ करोआ जेते जोगे सेयो ए।

12 सच्चा परमेशर कदी बी दुष्टता रे काम नि करदा

ओर ना ई सर्वशक्तिमान परमेशर अन्याय करदा।

13 माणूंए खे किने तरतिया पाँदे अक्क दित्तेया?

या सारी दुनिया रा इन्तजाम किने कित्तेया?

14 जे से माणूंआ ते आपणा मन टाई देओ

ओर आपणी आत्मा ओर साआ आपू रेई समेटी देओ,

15 तो सारे प्राणी कट्ठे ई नाश ऊई जाणे

ओर माट्टिया ते बणेया रा माणूं फेर माट्टिया रेई मिली जाणा।

अय्यूबो पाँदे दूजा आरोप

16 अय्यूब, जे तांदे समज ए तो ये सुण;

ओर मेरिया इना गल्ला पाँदे त्यान दे।

17 क्या तुसे तर्मी परमेशरो री बेज्जती करने लगी रे?

क्या तुसा खे लगोआ कि तेसखे न्याय ते नफरत ए?

18 परमेशर कुछ राजेया खे बोलोआ कि सेयो नकम्मे ए,

ओर से कुछ अधिकारिया खे बोलोआ कि सेयो दुष्ट ए,

19 परमेशर परदाना रा पक्ष नि करदा;

से अमीर ओर गरीब दुँईं खे एक बराबर समजोआ;

कऊँकि सेयो दोनो तिने आपणे आथे की बणाई राखे।*34:19 याकूब 2:1, रोमी 2:11, नसी 22:2

20 आसे राती दे अचाणक मरी सकूँए।

परमेशर आसा पाँदे हमला करोआ ओर आसे नाश ऊई जाऊँए;

से बिना केसी मईणता ते पराक्रमिये खे काई देओआ।

21 परमेशरो रिया आखी माणूंआ रे चाल-चलणो पाँदे लगी री रओईया

ओर से तेसरे कदमा-कदमा री निगरानी करदा रओआ।

22 पापिए खे परमेशरो ते लकोणे

रिया तँईं एड़ा अन्दकूप न्हेरा केथी नि ए।

23 परमेशरे माणूंए रे न्याय रिया तँईं कोई बखत नि ठराया,

कि माणूं परमेशरो रे सामणे कचैरिया रे कदी जे जाओ।

24 परमेशर बड़े-बड़े तागतवरा खे बिना जांच-पड़ताल़ कित्ते ई चूर-चूर करी देओआ

ओर तिना री जगा पाँदे दूजेया खे खड़ा करी देओआ।

25 कऊँकि से तिना रे काम ठीक-टंगो रे जाणोआ,

से तिना खे राती देई एड़ा पल्टी देओआ कि सेयो चूर-चूर ऊई जाओए।

26 से तिना तागतबरा खे दुष्ट जाणी की सबी सामणे नाश करी देओआ,

27 कऊँकि तिने तेसरा अनुशरण करना छाडीता

ओर ज्ञानो री बाटा ते पटकी गे थे ओर तेसरे केसी बी नियमा पाँदे मन नि लगाया,

28 एथो तक कि तिना रे जरिए दु:खी कित्ते रे गरीबा री दुहाई परमेशरो तक पऊँची

ओर तिने दु:खी लोका री पुकार सुणी।

29 जेबे परमेशर चुप रओआ, तो तेसखे कुण दोषी ठराई सकोआ?

ओर जेबे से आपणा मूँ फेरी लओ, तेबे कुण तेसरा दर्शण पाई सकोआ?

पूरे देशो साथे ओर कल्ले माणूं, तिना दुँईं साथे तेसरा एक जेड़ा बर्ताओ ए।

30 ओर जे परमेशर आपणे आपू खे लकोई लो,

तो कोई बी अधर्मी माणूं तेसरिया प्रजा पाँदे राज करी की तिना खे जाल़ो दे फसाई सकोआ।

31 अय्यूब, क्या तैं परमेशरो रे सामणे आपणे पाप मानी राखे

ओर आगो खे पाप नि करने रा वादा कित्तेया ए?

32 फेर तेसते पूछो कि तुसे क्या गल़त कित्तेया ए,

ताकि तुसे इजीखे दुबारा नि करो।

33 अय्यूब! तूँ परमेशरो रे फैंसले खे मानदा नि; क्या इजी खे कि परमेशर तेरे मनो रे मुताबिक तेस माणूंए खे ईनाम देओ?

एते गल्ला रा फैंसला तां करना, ना कि मां करना,

इजी री खातर जो कुछ ताखे समज आओआ, से कर।

34 सारे ज्ञानी माणूंआ माखे ये बोलणा,

बल्कि मेरिया गल्ला सुणने वाल़ेया अक्लमंद माणूंआ बी येई बोलणा कि

35 अय्यूब ज्ञानो रिया गल्ला नि बोलदा

ओर ना तेसरे वचन समजा दे आओए।

36 अय्यूब, ये खरा ए कि तां साथे बुरिया गल्ला ऊणे लगी रिया।

तैं एड़िया गल्ला बोलिया जेड़ा कोई बुरा माणूं बोलोआ।

37 तुसे कई बार परमेशरो रे खलाफ पाप कित्तेया ए,

ओर आसा री बेज्जती बी कित्ती ए।