अय्यूब 38

प्रभुए रा अय्यूबो खे ज्वाब

1 तेबे यहोवे अय्यूबो खे बड़े पारी तूफानो बीचा ते ये ज्वाब दित्तेया,

2 अय्यूब, जो काम आऊँ करूँआ, तिजी रे बारे दे तैं बऊत सवाल पूछे ए।

पर तूँ जो पूछेया तिजी रे बारे दे सई दे ताखे समज नि ए।

3 एबे मेरा सामणा करने खे त्यार ऊई जा!

क्या तूँ मेरे जरिये पूछे दे सवाला रा ज्वाब देई सकेया?*38:3 अय्यू. 40:7

4 जेबे मैं तरतिया री निऊँ पाई, तेबे तूँ केई था?

जे तूँ आपू खे समजदार समजेया तो तूँ मेरे इना सवाला रे ज्वाब दे।

5 तरतिया रा बन्ना किने ठराया, क्या तूँ जाणेया!

तिजी पाँदे सूत बानी की से किने नापी?

6 तरतिया री निऊँ कुणजी चीजा पाँदे राखी रिये

या तेतेरे कुणे रा पात्थर किने लगाया?

7 जेबे मैं ये कित्तेया, तो स्वर्गदूते गाणा गाया।

सेयो बऊत खुश थे ओर तारे बी गांदे नजर आए। 8 जेबे शुरूए दे समुद्र बणाया था

तो किने बन्ना लगाया कि तरतिया पाँदे पाणिये री बाढ़ नि आओ?

9 समुद्रो पाँदे मैं बादल़ बणाए।

ओर सब कुछ न्हेरा था।

10 मैं ये ठराया कि जमीन केई ऊणी।

ओर समुद्र तेती नि आई सकेया।

11 मैं समुद्रो खे बोलेया, "एथो तक ओर आगे नि!

एती तेरिया तागतबर लईरा रूकणिया चाईयो।"

12 अय्यूब, क्या तैं कदी प्याग शुरू ऊणे री आज्ञा दित्ती ए?

क्या तैं कदी तड़के खे एक नवां दिन शुरू करने रिया तँईं बोलेया ए?

13 क्या तैं कदी तड़के खे सारिया तरतिया पाँदे फैलणे खे बोलेया ए,

जेतेरिया बजा ते दुष्ट लोक प्रयासे ते दूर नठोए?

14 तड़के ते बाद जेबे प्रयासा ऊई जाओआ,

तो पाह्ड़िया ओर काअटिया एकी टाल्ले दे कल़ुँजा जेड़िया साफ दिशणे लगोईया।

15 दुष्टा खे दिनो रा प्रयासा बऊत तेज ओआ

ओर तिना खे चगड़ा करने ते रोकोआ।

16 क्या तूँ कदी समुद्रो री सूबल़ा तक पऊँची रा

या डूगे समुद्रो री गईराईया दे कदी कूमी-फिरी रा?

17 क्या किनी तुसा खे तेते जगा रा दरवाजा दखाया ए

जेती मरे दे लोक ए, जेती बऊत न्हेरा ए?

18 क्या तैं तरतिया री चौड़ाई ठीक टंगो रे समजी राखी?

अय्यूब, जे तूँ इना सारेया सवाला रे ज्वाब जाणेया तो माखे बताई दे।

19 जेती प्रयासा रओआ तेथो खे जाणे री बाट किसिए

ओर न्हेरे री जगा केईए?

20 क्या तूँ तिना खे तिना रे बन्ने तक टाई सकेया

ओर तिना रे कअरो री बाट पछयाणी सकेया?

21 पक्का तूँ तो ये सब कुछ जाणो ओगा! कऊँकि तूँ तो तेस बखते जम्मी चुकेया था

ओर तूँ बऊत उम्रा राए ना।

22 क्या तूँ कदी बर्फा रे पण्डार-कअरो रे गया राए

या तैं कदी ओल़ेया रे पण्डार देखी राखे?

23 जो मैं मुसीबता रे बखतो खे ओर युद्ध

ओर लड़ाईया रे दिना खे राखी राखे?

24 कुणजिया बाटा ते प्रयासा फैलाया जाओआ

ओर पूर्वी अवा तरतिया पाँदे चलाई जाओई?

25 जेबे बऊत बरखा ओई तेबे तिजी रे पाणिए खे नाल़ किने बणाए

ओर कड़कणे वाल़ी बिजल़िया खे बाट किने बणाई,

26 सुनसाण जगा दे जेती कोई माणूं नि रंदा किने बर्खा कित्ती?

27 ऊजड़ जमीन किने पाणिये की सिंजी ताकि अरा काआ जम्मणे लगो?

28 क्या बरखा रा कोई संसारिक बाओ आ

ओर पाल़े रे टीपे किने पैदा कित्ते?

29 बर्फ केसरे गर्भो ते निकल़ी री

ओर सर्गो ते टपकणे वाल़े पाल़े खे कुण पैदा करोआ?

30 पाणी पात्थरो जेड़ा जम्मी जाओआ

ओर समुद्रो री परत जम्मी जाओई।

31 क्या तूँ कृतिका-नक्षत्रो रा गुच्छा*38:31 उत्तरी सर्गो दे तारेया रा चूण्ड गूँदी सकेया

या मृगशिरा*38:31 सर्गो रे बीचे तारेया रा चूण्ड रे बन्दन खोली सकेया?

32 क्या तूँ तारेया खे बोली सकेया कि सेयो कदी चमको?

क्या तूँ सप्‍तर्षिया खे साथिया समेत लई की चली सकेया?

33 क्या तूँ सर्गो रे रीति-रवाजा खे जाणेया

ओर तरतिया पाँदे तिना रा अक्क ठराई सकेया?

34 क्या तूँ बादल़ा तक आपणी आवाज पऊँचाई कि तिना खे आज्ञा देई सकेया,

कि सेयो तां पाँदे बऊत पाणिए री बरखा करी सको?

35 क्या तूँ बिजल़िया खे पड़ने री आज्ञा देई सकेया

ओर से ताखे बोलो कि आऊँ आजीर ए?

36 किने पीतरे समज परी राखी

ओर मनो रे समजणे री शक्ति किने देई राखी?

37 कुण माणूं आपणियां अक्ला साथे बादल़ा खे गिणी सकोआ?

ओर सर्गो रे पाणिए रिया कुप्पिया खे कुण लटी सकोआ?

38 जेते कि तूड़ जम्मी जाओई

ओर माट्टिया रिया टीमा एकी-दूजे साथे चिपकी जाओईया।

39 क्या तूँ शेरनिया खे शिकार पकड़ी सकेया

ओर जवान शेरा रा पेट परी सकेया,

40 जेबे सेयो आपणियां गुफा रे बैठी रे ओ

ओर लूकी की ताका रे दुबकी की बैठे रे ओ?

41 फेर जेबे काओ रे बच्चे पूखा रे मारे परमेशरो री दुहाई देओए, जेबे सेयो बिना खाये-पिये उडदे रओए,

तेबे तिना खे खाणे खे कुण देओआ?