1 अय्यूबे आपणियां गल्ला ओर बी गईराईया ते बोलिया,

2 "खरा ऊँदा जे मेरी आज की दशा पिछलेया मीन्नेया जेड़ी ऊँदी,

जिना दिना रे परमेशर मेरी रक्षा करो था;

3 परमेशर हमेशा मां साथे ओ था

न्हेरे दे चलणे रिया तँईं से माखे प्रयासा देओ था।"

4 सेयो तो मेरी जवानिया रे दिन थे,

जेबे परमेशर मेरा दोस्त था ओर से मेरे कअरो री रक्षा करो था।

5 तेस बखतो तक तो सर्वशक्तिमान परमेशर मां साथे रओ था

ओर मेरे बच्चे मेरे चऊँ कनारे रओ थे।

6 तेबे आऊँ आपणे पैरा खे मल़ाईया साथे तोऊँ था ओर

जो चट्टानी मेरे नेड़े थिया तिना ते जैतूनो रे तेलो रिया नदिया निकल़ो थिया।

7 जेबे-जेबे आऊँ कअरो ते निकल़ी की शईरो रे प्रवेश-द्वारो पाँदे आऊँ था

ओर तेती चौको पाँदे आपणा आसण लगाऊँ था,*29:7 (बिध. 21:19), (रूत 4:1, 11), (2 राजा 7:1,18)

8 तेबे-तेबे जवान माखे देखी की लूकी जाओ थे

ओर स्याणे उठी की खड़े ऊई जाओ थे।

9 परदान लोक बी गल्ला करनिया बन्द करी देओ थे।

ओर सेयो आथो साथे आपणा मूँ बन्द करी की राखो थे।

10 परदान लोक चुप रओ थे

ओर तिना री जीब ताल़ूए साथे चिपकी जाओ थी।

11 जेबे कोई माणूं मेरी गल्ल सुणो था, तेबे से माखे तन्य बोलो था

ओर जेबे कोई माणूं माखे देखो था, तेबे मेरे बारे गवाई देओ था,

12 कऊँकि आऊँ मतादा रिया तँईं चींगणे वाल़े गरीबो खे बचाऊँ था,

ओर अनाथ बच्चेया खे बी छुड़ाऊँ था, जिना री कोई मताद करने वाल़ा नि था।

13 जो माणूं मरने वाल़ा ओ था से माखे आशीर्वाद देओ था

ओर मेरी मताद पाई की बिदुआ खुशिया रे मारे दिलो ते गाओ थिया।

14 सब जाणो थे कि मैं हमेशा तर्मो रा काम कित्तेया ए।

आऊँ सदा निष्पक्ष था ओर आऊँ सदा ईमानदार बी था।

15 अन्देया खे आऊँ आखी,

ओर लंगड़ेया खे पैर था।

16 आऊँ गरीब लोका खे बाओ जेड़ा था

ओर जिना खे आऊँ जाणूं पनि था तिना रे मकद्दमे री बी पड़ताल़ करुँ था ओर तिना री मताद करुँ था।

17 मैं दुष्ट लोका री तागत नाश करी ती ओर

तिना रे जरिए सताए दे लोक बचाए।

18 तेस बखते आऊँ सोचेया करुँ था, जदो तक आऊँ स्याणा नि ऊई जांदा, तदुओ तक आऊँ पक्का ई बचेया दा रणा,

ओर आऊँ आपणे परिवारो रे सामणे कअरे ई मरना।

19 मेरी जड़ पाणिए रिया तरफा खे बढ़ी

ओर मेरिया डाल़िया पाँदे पूरी रात पाल़ा पड़ेया।

20 मेरा मान-सम्मान जेड़ा का तेड़ा बणेया रा रणा

ओर आऊँ हमेशा एक महान मर्दो जेड़ा बणेया दा रणा।

21 लोक मेरिया गल्ला त्यानो साथे सुणो थे, ओर माखे न्याल़दे रओ थे

ओर मेरी सलाह् जाणने रिया तँईं चुपचाप बैठे रे रओ थे।

22 जेबे आऊँ बोली चुकूँ था, तेबे सेयो ओर कुछ नि बोलो थे,

मेरिया गल्ला तिना पाँदे बरखा जेड़िया बरसो थिया।

23 सेयो मेरिया तिना ते गल्ला करने रा इन्तजार करने लगी रे थे। जो गल्ला मैं बोलिया थिया,

सेयो तिना खे किमती थिया, जिंयाँ बरसाती दे बरखा।

24 आऊँ तिना पाँदे आसेया जेबे तिने आपणी ईम्मत खोई ती दी थी;

मेरे आसदे ऊए मुंए ते तिना खे ईम्मत मिली।

25 मैं काम सम्बाल़ेया ओर फैंसले लये; आऊँ तिना री अगुआई एक राजे रे रूपो दे करूँआ,

जिया तिना रिया सेना री अगुआई करोआ,

ओर तिना रिया उदासिया दे तिना खे ईम्मत देओआ।