1 माणूंए खे तरतिया पाँदे कठण मईणत करनी पड़ोई

ओर तेसरी जिन्दगी एकी मजदूरो जेड़ी ओई।*

2 जेड़ा कोई दास सारा दिन बऊत काम करी कि सांजके बखते छांयी रा इन्तजार करोआ,

माणूंए रा जीवन तेस मजदूरो जेड़ा ए जो सारा दिन काम करी की सांजके बखते आपणी मईणता री आस राखोआ; छांयी री इच्छा करोआ, या मजदूर आपणी मजदूरिया री उम्मीद राखोआ;

3 आऊँ बी मीन्ने रे मीन्ने बेकारो रा जीवन जिऊँणे लगी रा,

हर राती ते बाद माखे शोक ई आओआ।*

4 जेबे आऊँ लेटी जाऊँआ, तेबे बोलूँआ,

आऊँ कदी उठणा? ओर रात कदी बीतणी?

पर राती लाम्बिया ए ओर प्याग ऊणे तक तड़फदा-तड़फदा रयी जाऊँआ।

5 मेरे सारे शरीरो दे कीड़े ए।

मेरिया सारिया चामड़िया दे पीड़ ए।*

6 मेरिया जिन्दगिया रे दिन जुलाए री टाल्ले बुणने री खड्डिया रे सटलो ते जादा फुर्तिया साथे चलणे वाल़े

ओर दु:खो साथे बीतदे जाओए।

7 ओ परमेशर, याद राखणा, मेरा जीवन तो सिर्फ एक साओ जेड़ा ए;

मेरी खुशी पईले ई खत्म ऊई चूकी री ए।

8 जो माखे एबे देखणे लगी रा, तेस आऊँ फेर नि देखणा; प्रभु,

तेरी नजर मां पाँदे ए पर आऊँ तां सामणे-सामणे खत्म ऊई जाणा।

9 जिंयाँ बादल़ छाँटी की लोप ऊई जाओए,

तिंयाँ ई जो लोक मरी जाओए सेयो वापस नि ऊई सकदे;

10 से आपणे कअरो खे फेर वापस नि आई सकदा

ओर ना से आपणियां जगा रे फेर मिलणा।

11 इजी री खातर मां बोलदे ई जाणा

ओर आपणे मनो रा दु:ख परमेशरो गे खुली की बताणा

ओर आपणियां जिन्दगिया रे दु:खो रिया बजा ते शकाईत करदे रणा।

12 क्या आऊँ समुद्र ए, या अजगर ए,

जो तैं मां पाँदे पईरा बठयाल़ी राखेया?

13 जेबे-जेबे आऊँ सोचूँआ कि माखे माँजे पाँदे राम मिलणा,

ओर बछौणे पाँदे मेरा दु:ख कुछ कम ऊई जाणा,

14 तेबे-तेबे तूँ माखे डराऊणे सुफनेया साथे डराई देया

ओर बुरे-बुरे सुफनेया साथे डराई देया।

15 एथो तक कि आऊँ इतणा डरी जाऊँआ कि मेरा जिऊ आपू खेई फाँसी लगाणे खे बोलोआ

ओर माखे एड़िया जिन्दगिया ते जादा मरना खरा लगोआ।

16 माखे आपणी जिन्दगिया ते कृणा आओई;

आऊँ सदा जिऊँदा नि रणा चांदा।

माखे कल्ला छाडी दे कऊँकि मेरी जिन्दगी अवा रे चुलारे जेड़ी ए।

17 माणूं क्या ए, कि तूँ तेसखे इतणा मान-सम्मान देओ

ओर आपणा मन तेस पाँदे लगाए

18 तुसे आसा खे प्यागा ते लई की सांजा तक कऊँ परखदे रओए?

19 तां कदुओ तक मेरिया तरफा खे एक टक नजर लगाई की राखणी

ओर माखे एकी पला खे बी कल्ला पनि छाडदा कि आऊँ आपणा थूक बी कूटी सकूँ?

20 ओ माणूंआ पाँदे नजर राखणे वाल़े, मैं पाप तो करी राखेया ऊणा, पर मैं तेरा क्या बिगाड़ी राखेया?

तैं आऊँ आपणा नशाणा कऊँ बणाई राखेया,

एथो तक कि आऊँ आपू पाँदे आपू ई बोज बणी गा रा?

21 तूँ मेरे पाप माफ कऊँ नि करदा?

ओर मेरे पाप दूर कऊँ नि करदा?

एबे तो आऊँ मरी जाणा ओर माट्टिया देई मिली जाणा

ओर तां माखे टोल़ने री कोशिश करनी, पर आऊँ नि मिलणा।