अय्यूब 15

एलीपजेरो इलज़ाम

1 तैखन तेमान नगरेरे रानेबाले एलीपजे ज़ोवं,

2 "कुन अक्लमन्दे जाइज़ आहे कि अज्ञानता सेइं साथी जुवाब दे,

या अपने आपे पूर्वी हवाई सेइं भरे?

3 कुन तै बेकार गल्‍लन सेइं,

या बेफैइदी गल्‍लन सेइं बेंस केरे?

4 बल्के तू परमेशरेरो डर मन्नो शैरी देथो,

ते परमेशरेरी भक्ति केरनी होरन करां भी छुटातस।

5 तू अपने ऐशी सेइं अपनो अधर्म बांदो केरतस,

ते च़लाक लोकां केरे ज़ोनेरे रीति पुड़ ज़ोतस।

6 अवं त नईं पन तेरू आशी तीं दोषी ठहराते;

ते तेरी गल्‍लां तेरे खलाफ गवाही देतिन।

7 कुन पेइलो मैन्हु तूए ज़र्मो?

कुन तेरू ज़र्म पहाड़न करां भी पेइलू भोवं?

8 कुन तू परमेशरेरी सभाई मां बिशतां शुनतो थियो?

कुन अक्लरो ठेको तींए नेवरोए

9 तू एरू कुन ज़ानतस ज़ैन अस न ज़ानम?

तीं मां एरी कौ ज़ेरि समझ़े ज़ै असन मां नईं?

10 अस लोकन मां त छ़ित्ते दोग्गे बाले ते बड़े सियाने मैन्हु आन,

ज़ैना तेरे बाजी करां भी जादे उमरारेन।

11 परमेशरेरी शान्ति देने बैली गल्‍लां,

ते ज़ैना वचन तेरे लेई नर्म आन, कुन इना तेरी नज़री मां घटिया आन?

12 तेरो मन किजो तीं खिचतां नेते?

ते तू अछ़्छ़ी सेइं किजो इशारे केरतस?

13 तू भी अपनि आत्मा परमेशरेरे खलाफ केरतस,

ते अपने ऐशी सेइं बेकार गल्‍लां ज़ोतस।

14 मैन्हु आहे कुन कि तै बेकसूर भोए?

ते ज़ैस कौन्शां ज़र्म दित्तोरू तै आहे कुन कि बगैर दोषे भोइ सके?

15 हेर, परमेशर अपने पवित्रन*15:15 पवित्रन स्वर्गदूतन पुड़ भी विश्वास न केरे,

ते सुर्ग भी तैसेरी नज़री मां शुद्ध नईं।

16 फिरी मैन्हु बड़ो भिट्टो ते भ्रष्टे ज़ै

बुराई पैनेरी ज़ेरि पीते।

17 अवं तीं समझ़ देइलो, एल्हेरेलेइ मेरी शुन,

ज़ैन मीं लाहेरूए, तैस्सेरे बारे मां अवं बियान केरताईं।

18 तैन्ना गल्‍लां ज़ैना अक्लमन्द मैन्हेइं अपने सियानन करां शुन्तां

बगैर छ़ुपेइतां ज़ोई।

19 सिर्फ तैन्ने जो ज़मीन दित्ती जेवरी थी,

ते तैन केरे दरमियाने मां कोई बखलो एइतो-गातो न थियो।

20 दुष्ट मैन्हु ज़िन्दगी भर तकलीफे सेइं तड़फते,

ते ज़ुलम केरनेबालेरे ज़िन्दगरे सालां केरि गिनती दुख झ़लनेरे लेई ठहराई जेवरीए।

21 तैसेरे कन्ने मां डराने बाली आवाज़ घुमती रहतीए,

सुखेरे वक्त भी नाश केरनेबालो*15:21 नाश केरनेबालो डैकू तैस पुड़ हमलो केरते।

22 तैस आंधरे मरां फिरी निसनेरी कोई उमीद न भोए,

ते तलवार तैस मारनेरे लेई तियार रहतीए।

23 तै रोट्टरे लेई मारो-मारो फिरते, कि कोड़ि मैल्हे?

तैस याकीन रहते, कि तैसेरो एजनेबालो वक्त आंधरोए।

24 मुसीबत ते हादसे सेइं तैस डर लगोरो रहते,

एरे राज़ेरे ज़ेरे ज़ै जंगरे लेई तियार भोए, तैना तैस पुड़ हावी भोतन।

25 तैने त परमेशरेरे खलाफ हथ अग्रोवं कियोरोए,

ते सर्वशक्तिमान परमेशरेरे खलाफ तै खड़ो भोते,

26 ते क्रोड़ी खड़ी केरतां ते अपनि मोट्टी-मोट्टी

ढालां हिरातो घमण्डे सेइं तैस पुड़ हमलो केरते;

27 एल्हेरेलेइ कि तैसेरे तुत्तरे पुड़ चिकनाई पेई जेवरीए,

ते तैसेरी कमरी मां चर्भी ज़म्मोरीए।

28 ते तै उज़ाड़ोरे नगरन मां बेस्सी जेवरोए,

ते ज़ैना घरां राने काबल नईं,

ते घिरेंड भोने जो छ़डोरन, तैन मां बेस्सी जेवरोए।

29 तै अमीर न रालो, ते न तैसेरी जाईदात बनोरी राहेली,

ते एरे लोकां केरे उडारेरी फसल ज़मीनरे पासे न झुकेली।*15:29 फसल ज़मीनरे पासे न झुकेली। तैसेरी छाव ज़मीनरे पासे न झुकेली।

30 तै आंधरे मरां कधी न निस्सेलो,

ते तैसेरे डाल अग्गरे लप्पी सेइं फुकोई गाले,

ते परमेशरेरे ऐशेरे शाहे सेइं तै उडरी गालो।

31 तै अपने आपे धोखो देइतां बेकार गल्‍लां केरो भरोसो न केरे,

किजोकि तैसेरे बदले तैस धोखो मैल्हेलो।

32 इन तैसेरे वक्ते करां पेइले पूरू भोइ गालू;

तैसेरे डाल नीले न राले।

33 दाछ़रे ज़ेरे तैसेरे कच़्च़े फल झ़ेड़ी गाले,

ते तैसेरां फूड़ू ज़ैतूनेरे बुट्टे केरां ज़ेरां झ़ड़ेलां।

34 किजोकि अधर्मी लोकां केरे खानदाने सेइं किछ बेनि न गालू,

ते ज़ै रिश्पत नेते, तैन केरे तेम्बु अग्गी सेइं फुकोले।

35 तैन्न ज़ुलमेरो गर्भ रहते, ते तैना बे हद ज़ुलमे ज़र्म देतन

ते तैना अपने दिले मां धोखेरी गल्‍लां बनातन।"