अय्यूब 38

यहोवा अय्यूबे जुवाब देते

1 तैखन यहोवा अय्यूबे ऐंधी मरां एन्च़रे जुवाब दित्तो,

2 "ई कौने ज़ै बगैर ज्ञानेरी गल्‍लां ज़ोइतां

योजना बिगाड़नी चाते?

3 मड़देरी ज़ेरि अपनि कमरबन्ध*38:3 कमरबन्ध तियार भो,

किजोकि अवं तीं सेइं सवाल केरताईं, ते तू मीं जुवाब दे।

4 ज़ैखन मीं ज़मीनरी बुनीयाद रख्खी, तैखन तू कोड़ि थियो?

अगर तू समझ़दारस त जुवाब दे।

5 तैसेरी नाप केनि ठहराई, कुन तू ज़ानतस

तैस पुड़ केनि सूत लावं?

6 तैसेरी बुनीयाद कौस पुड़ रख्खी जेई,

या केनि तैसेरे कूनेरो घोड़ रख्खो,

7 ज़ैखन झ़ेझ़ेरे तारे अकोट्ठे भोइतां आनन्दे सेइं गीतां ज़ोते थिये

ते परमेशरेरे सब स्वर्गदूत जयजयकार केरते थिये?

8 फिरी ज़ैखन समुन्दर एरहो निस्सो ज़ेन्च़रे तै गर्भे मरां निस्सो,

तैखन केनि दार बन्द केरतां तै रोको;

9 तै अवं आईं, ज़ैनी तै बिदलारी सेइं ढक्‍को

ते बड़े आंधरे मां पलेट्टो,

10 ते समुन्दरेरे लेई हद बनाई

ते इन ज़ोइतां अड्डे ते पल्‍ले लेइतां दित्ते,

11 ते मीं समुन्दरे सेइं इन ज़ोवं ‘इड़ी तगर एई, ते अग्रोवं न गा,

ते तेरी उछ़ड़ने बैली छ़ेल्ही इड़ी रुकी गान।’

12 कुन तीं ज़िन्दगी भर कधी झ़ेझ़ी जो हुक्म दित्तो,

ते ट्लेकड़ोने तैसेरी ठार हिराई,

13 ताके तै धेरतरे पासन कैबू मां केरे,

ते दुष्ट लोक तैस मरां हिलाए गान?

14 तै एन्च़रे बदलते ज़ेन्च़रे मोहरी हैठ चिकनी मित्ती बदलतीए,

ते सब चीज़ां ज़ेन्च़रे लिगड़ां लेइतां लेइहोतिन।

15 दुष्टन करां तैन केरि लौ रोकी गातीए,

ते तैन केरि अग्रोवं कियोरी पाखड़ ट्लोड़ी गाचे।

16 कुन तू कधी समुन्दरेरे नागन तगर पुज़ोरोस,

या डुग्घे समुन्दरेरे तले मां कधी च़लोरो फिरोरोस?

17 कुन मौतरे फाटक तीं पुड़ बांदे भोए,

कुन तीं बड़े आंधरेरे फाटकन कधी हेरी बटोरेन?

18 कुन तीं धेरतरी चौड़ाई पूरे तरीके सेइं समझ़ी?

अगर तू इन सब ज़ानतस, त ज़ो।

19 लौअरे घरेरी बत कोड़िए,

ते आंधरेरी ठार कोड़िए?

20 कुन तू तैस तैसेरे हद्दी तगर पुज़ेई सकतस,

ते तैसेरे घरेरी बत पिशैनी सकतस?

21 पक्‍कू तू इन सब किछ ज़ानतो भोल्हो! किजोकि तू त तैस वक्ते पैदा भोवरो थियो,

ते तेरी उमर बड़ीए।

22 फिरी कुन तू कधी हिंवेरे भण्डारे मां जेव,

या कधी आणरे गुदाम तीं लाहोरेन,

23 ज़ै मीं मुसीबतरे मौके ते जंग

ते लड़ाईअरे दिहाड़ेरे लेई रेखी छ़डोरीए?

24 कोस बत्ती सेइं लौ खिलारी गातीए,

ते पूर्वी हवा धेरती पुड़ च़लाई गाचे?

25 हड़ैइयरे लेई केनि नालो बनाव,

ते अम्बर झ़पनेरे लेई बत बनेवरीए,

26 कि गैर आबाद मुल्खे मां ते जंगले मां ज़ैड़ी कोई मैन्हु न राए झ़ड़ी बखेइतां,

27 उज़ाड़ोरे मुल्खे मां सग्गे, ते नीलो घास उगाए?

28 कुन झ़ेड़रो कोई बाजीए,

ते ट्लेलरे तेप्पु केनि पैदा किये?

29 केसेरे गर्भ मरां हिवं निस्ते,

ते अम्बरे मरां बिछ़ड़ोरी ओशी कौन पैदा केरते?

30 पानी घोड़ेरू ज़ेरू डंगते,

ते डुग्घे पैनेरे बह डंग लगते।

31 कुन तू कचपचियारो*38:31 कचपचियारो उत्तरेरे पासे अम्बरे मां तारे। गुच्छो अकोट्ठो केरि सकतस

या मृगशिरारे*38:31 मृगशिरारे अम्बरेरे मझ़ाटेरे तारे। बन्धन खोल्‍ली सकतस?

32 कुन तू राशां ठीक-ठीक वक्ते कढतस,

या सप्तर्षे सैथन सने नेइतां च़ेलि सकतस?

33 कुन तू अम्बरेरी विधन ज़ानतस

ते धेरती पुड़ तैन केरो अधिकार ठहरेई सकतस?

34 कुन तू बिदलारी तगर अपनि आवाज़ पुज़ेई सकतस,

ताके बड़ी झ़ड़ी बेखतां तीं ढक्‍के?

35 कुन तू झ़पने जो हुक्म देइ सकतस, कि तै गाए,

ते तीं सेइं ज़ोए, ‘अवं हाज़र आईं?’

36 केनि बिदलारी मां अक्लरी लौ भरोरोए?*38:36 केनि बिदलारी मां अक्लरी लौ भरोरोए? केनि एंत्रीं पासे मां अक्ल पैदा की।

ते मने मां समझ़नेरी शक्ति केनि दित्तोरीए?

37 कौन अक्ली सेइं बिदलारी गेनि सकते?

ते कौन अम्बरेरे कुप्पी उलटेइ सकते,

38 ज़ैखन धूड़ ज़ेम्मी गाचे,

ते ढल्‍लां एक्‍की होरि सेइं ज़ुड़ी गातन?

39 कुन तू शेरनरे लेई शिकार ट्लेइ सकतस,

ते जुवान शेरां केरू पेट भेरि सकतस,

40 ज़ैखन तैना कुढन मां बिश्शोरे भोन

ते आड़ी मां मारनेरे लेई ढोक देइतां बिश्शोरे भोन?

41 फिरी ज़ैखन कंव्वां केरे बच्‍चे परमेशरेरी फरियाद केरतां बगैर खुराकां उडरतन,

तैखन तैन्न खाने जो कौन देते?"