अय्यूब 4

एलीपजेरी गल्‍लां

1 तैखन तेमान नगरेरे रानेबाले एलीपजे ज़ोवं,

2 "अगर कोई तीं सेइं किछ ज़ोए,

त कुन तीं बुरू लग्गेलू?

पन ज़ोने बगैर कौन रेइ सकते?

3 शुन, तीं पेइले बड़े लोकन शिक्षा दित्तोरीए,

ते कमज़ोर लोक मज़बूत कियोरेन।

4 बिछ़ड़ते लोक अपने गल्‍लन सेइं सम्भालरोरेन,

ते थरकते लोक तीं मज़बूत कियोरेन।

5 पन हुनी आफत त तीं पुड़ एवरीए,

ते तू न उमीद भोतस;

तै तीं सेइं हुरो, ते तीं हिम्मत हारी।

6 कुन परमेशरेरो डर तेरो सहारो नईं?

ते कुन तेरो रोड़ो चाल चलन तेरी उमीद नईं?

7 इस गल्‍ली पुड़ ध्यान दे, कि कोई बेकसूर भी

कधी नाश भोवरोए? या धर्मी भी मारे जेवरेन।

8 मेरी नज़री मां त ज़ैना लोक पाप ते

दुखेरू बीज़ बेतन, तैन्ना तेन्च़रे तैसेरी फसल कटतन।

9 तैना त परमेशरेरे शाहे सेइं नाश भोतन।

ते तैना परमेशरेरे सरकी सेइं भस्म भोइ गातन।

10 शेरेरू गरज़नू ते खतरनाक शेरेरू गरज़नू बन्द भोइ गाते,

ते जुवान शेरां केरे दंत ट्लोड़े गातन।

11 शिकार न मैल्हने सेइं बुढो शेर मेरि गाते,

ते शेरनरे बच्‍चे तितर बितर भोइ गातन।

12 अक गल च़ुपच़ारे मीं तगर पुज़ाई जेई,

ते तैसारी भनक मेरे कन्ने मां पेई।

13 राती सुपना केरि फिक्री मां ज़ैखन

मैन्हु डुग्घी निड्ली मां झ़ुलतन।

14 अवं डरो ते मीं थर्क लग्गी कि

मेरी सब हेड्डी हिल्‍ली जेई।

15 तैखन अक आत्मा*4:15 आत्मा इसेरो मतलब हवा भी भोइ सकते। मेरे आमने सामने भोइतां च़ली;

मेरी जानी शिलकंटे च़ढ़े।

16 तै च़ुपच़ारे रुकी जेई ते मीं तैसेरी शकल न पिशानी।

पन मेरे एछ़्छ़ी केरे सामने कोई रूप थियूं;

पेइली त खामोशी भोइ जेई, फिरी मीं अक शब्द शुनो।

17 ‘कुन नाश भोनेबालो इन्सान परमेशरे करां जादे धर्मी भोल्हो?

कुन मैन्हु अपने बनानेबाले करां जादे पवित्र भोइ सकते?

18 हेर परमेशर अपने सेवकन पुड़ भरोसो न रख्खे,

ते अगर तैन मां कोई दोष मैल्हे त अपने स्वर्गदूतन दोषी करार देते।

19 फिरी ज़ैना मित्तरे घरन मां रहतन,

ते ज़ैन केरि मुनीयाद मित्ती मां रख्खोरीए,

ज़ैना कीड़ां केरे ज़ेरे ढ्लेन्च़े गातन,

तैन केरि कुन गिनती आहे।

20 तैना झ़ेझ़ेरे देंते ड्लवझ़ी तगर नाश भोते रहतन,

तैना हमेशारे लेई नाश किये गातन,

ते कोई तैन केरो खियाल भी न केरे।

21 कुन तैन केरे डेरां केरि डोरी तैन्ने मां,

अन्तरे न केट्टी गान? तैना बगैर अक्लां मेरि गातन?’"*4:21 मेरि गातनमतलब ज़ैन किछ तैन कांए तैन सब निव गालू।