अय्यूब 41

1 "फिरी कुन तू लिव्याताने*41:1 लिव्याताने अक समुन्दरी जीप मेछ़ली ट्लानेरे कंटे सेइं खिच्‍ची सकतस,

या डोरी सेइं तैसेरी ज़ामोड़ी दबेइ सकतस?

2 कुन तू तैसेरे नक्‍के मां नकेल लेई सकतस

या तैसेरे ज़ैमोड़ी क़िले सेइं कोश्शी सकतस?

3 कुन तै तीं सेइं बड़े छंदे केरेलो,

या तीं सेइं मिट्ठी गल्‍लां ज़ोलो?

4 कुन तै तीं सेइं करार बन्धेलो

कि तै हमेशा तेरो गुलाम राए?

5 कुन तू तैस सेइं एन्च़रे खैढेलो ज़ेन्च़रे च़ुड़ोली सेइं,

या अपने निक्‍की कुइयां*41:5 निक्‍की कुइयां नौकरैनी केरो दिल टरे लाने जो तैस बेन्धतां रखेलो?

6 कुन मेछ़ली ट्लानेबाले दल तैस बिकाव माल समझ़ेले?

कुन तै तैस बुपारी लोकन मां बंटेलो?

7 कुन तू तैसेरो चमड़ो भाले सेइं,

या तैसेरो दोग मेछ़ली ट्लाने बालेरे भाले सेइं कोश्शी सकतस?

8 तू तैस पुड़ अपनो हथ रख, त लड़ाई कधी न बिसरेलो,

ते एजने बाले वक्ते मां कधी एरू न केरेलो।

9 हेर, तैस ट्लानेरी उमीद बेफल रहतीए;

तैसेरे सिर्फ हेरने सेइं हिम्मत ट्लुटी गातीए।

10 कोई एरहो हिम्मती बालो नईं, ज़ै लिव्याताने भड़काए;

फिरी एरहो कौने ज़ै मेरे सामने रेइ सके?

11 केनि मीं पेइले दित्तोरूए, ज़ेसेरे बदले मीं देनू पे!

हेर, ज़ैन किछ सारे धेरती पुड़े, सब मेरू आहे।

12 अवं मगरमच्छेरे अंगां केरे बारे मां,

ते तैसेरे बड़े ज़ोरे ते तैसेरी बनावटरी शोभारे बारे मां च़ुप न रेइलो।

13 तैसेरे बेइयें लाने कौन खोल्‍ली सकते?

तैसेरे दंतां केरि दूईये बारां केरे मतलब ज़ामोड़ां केरे मझ़ाटे कौन एज्जेलो?

14 तैसेरे ऐशेरे दूईये किवाड़ कौन खोल्‍ली सकते?

तैसेरे दंत च़ेवरे पासन डरनेबालेन।

15 तैसेरे पिठरी लकीरां घमण्डेरी वजा आन;

तैना ज़ेन्च़रे मज़बूती सेइं मुहरबन्द कियोरेन।

16 तैना एक्‍की होरि सेइं एरे ज़ुड़ोरेन,

कि तैन मां किछ हवा भी न गेइ सके।

17 तैना एप्पु मांमेइं मिलेवरेन

ते एरे ज़ुड़ोरेन, कि अलग-अलग न भोइ सकन।

18 फिरी तैसेरे छ़िकने सेइं लौ चमकतीए,

ते तैसेरी एछ़्छ़ी झ़ेझ़ेरे पलकां केरि ज़ेरि आन।

19 तैसेरे ऐशी मरां बलती पितल निसतीए,

ते अग्गरी च़िन्गां छुटतिन।

20 तैसेरे नक्‍के सेइं एरहो तू निसते,

ज़ेरो उबलोरो पतीलो ते बलते निरैठी सेइं।

21 तैसेरे शाहे सेइं अगरां बलने लगां,

ते तैसेरे ऐशी सेइं अग्गरी लौ निसतीए।

22 तैसेरो मेट्टू मां ताकत बनोरी रहतीए,

ते तैसेरे सामने डर नच़तो रहते।

23 तैसेरे मासे पुड़ मास च़ड़ोरू आहे,

ते एरू एप्पु मांमेइं ज़ुड़ोरू आहे ज़ैन हिल्‍ली न सके।

24 तैसेरो दिल घोड़ेरो ज़ेरो मज़बूते,

बल्के ढ्लाटेरो बुनियों ढ्लेइटोलेरो ज़ेरो मज़बूते।

25 ज़ैखन तै उठने लगते, तैखन सामर्थी भी डेरि गातन,

ते डरके मारे तैन केरि समझ़ गाईब भोइ गाचे।

26 अगर कोई तैस पुड़ तलवार च़लाए, त तैस सेइं किछ न बेनि गालू;

ते न भाले ते न बर्छी ते न तीरे सेइं।

27 तै लोंहे भूंसेरो ज़ेरो,

ते पितली शड़ोरे लेकड़रो ज़ेरो समझ़ते।

28 तै तीरे सेइं कढो न गाए,

गोफनेरे घोड़ तैसेरेलेइ भूंसेरे ज़ेरेन।

29 लट्ठां भी भूंसेरी ज़ेरि गेनि गैतिन;

तै बर्छेरे च़लने पुड़ हसते।

30 तैसेरे बुनीयें हिस्से तिखे केपरारे ज़ेरे आन,

च़िकरी पुड़ ज़ेन्च़रे दीलोते।

31 तै डुग्घे पैनी एन्च़रे दाड़ते ज़ेन्च़रे सकले मां पानी उबलते

तैसेरे वजाई सेइं नील दरिया मरहमेरी हैण्डरे ज़ेरो भोते।

32 तै एप्पु चमकीलो निशान छ़डते।

डुग्घू पानी मन्ना छ़ित्तू लेइहोने लगते।

33 धेरती पुड़ तैसेरे बराबर ते कोई नईं,

ज़ै एरहो निडर बनाव जेवरोए।

34 ज़ैन किछ उच्‍चु आहे,*41:34 उच्‍चु आहे घमण्ड तैस तै तकतो ही रहते,

तै सब घमण्डी जंगली जानबरन पुड़ राज़ोए।"