1 इसहाक याकूब के बुलाइस, इसहाक उके आसीस दइके कथै, तै कनान देस के टोरियन मसे कउनो के संग काज झइ करबे। 2 इहैनिता हइ जिघा के छांड अउ पद्दनराम हे अपन नाना बतूएल के इलाका छो जा, उछो तोर मामा लाबान रथै, ओखर कउनो अक्ठी टोरिया लग काज कर। 3 मै सक्तिमान भगवान लग बिनती करथो कि ऊ तोके आसीस दे, अउ तोर बोहत टोरवा पइदा होय, मै बिनती करथो कि तै बोहत जात के बाफ बन। 4 मै बिनती करथो कि जउन मेर लग भगवान अब्राहम के आसीस दय रहै, उहै मेर तहुं के आसीस दे, मै बिनती करथो कि भगवान तोके अब्राहम के आसीस दे, जेखर लग तै जिहां रथस ऊ देस हे तोर अधिकार होय, जेही भगवान अब्राहम के दय रथै।✝28:4 उत्पति 17:4-8 5 हइ मेर लग इसहाक याकूब के पठोय देथै, ऊ पद्दनराम इलाका हे मामा लाबान के लिघ्घो कढ गइस, अरामी बतूएल लाबान अउ रिबका के बाफ रथै, अउ रिबका याकूब अउ एसाव के दाय रथै।

6 एसाव के पता चलथै कि इसहाक याकूब के आसीस दइके पद्दनराम इलाका छो पठोय हबै कि ऊ उंहा के टोरिया लग काज करै, इसहाक उके आसीस देत इहो आदेस दय हबै, "कि तै कनान देस के टोरियन लग कउनो के संग काज झइ करबे।" 7 एसाव समझिस कि याकूब अपन बाफ-दाय के बात सुनके पद्दनराम इलाका छो कढ गय हबै। 8 एसाव इहो समझिस कि ओखर बाफ इसहाक नेहको चाहथै कि ओखर टोरवा कनानी टोरिया लग काज करै। 9 एसाव के दुइठे डउकी पहिलेन लग रथै, पय ऊ इस्माइल के टोरिया महलत लग काज करिस, इस्माइल अब्राहम के टोरवा रथै, महलत नबायोत के बेहन रथै।

10 याकूब बेरसेबा के छांड के अउ ऊ हारान सहर छो कढ गइस। 11 याकूब के यातरा करत टेम बेरा बुढ जथै, इहैनिता ऊ रात बितामै के निता अक जिघा ठहरै गइस, याकूब ऊ जिघा अक्ठी पथरा देखिस अउ सोमै के निता ओखर उप्पर अपन मूंड रखके सोइस। 12 याकूब स्वरगदूत के ऊ सीढी हे चढत-उतरत देखिस अउ भगवान के ऊ सीढी के लिघ्घो ठाढ देखथै, 13 भगवान ओखर लिघ्घो ठाढ हुइके कथै, मै तोर बाबा अब्राहम के भगवान यहों, अउ तोर बाफ इसहाक के भगवान यहों, जउन भुंइ हे तै सोय हबस, उके मै तोके अउ तोर लरकन के दइहों। 14 तोर लरका ओतका हुइहिन जेकता भुंइ के माटी के नान-नान पथरा हबै, उन पूरब, पच्छिम, उत्तर दख्छिन हे फइल जइहिन, भुंइ के सगलू परवार तोर लरका के कारन मोर लग आसीस पइहिन। 15 मै तोर संग हव, जिहां कहि तै जइहे, मै तोके बचाइहों, मै तोके हइ देस हे वापिस लइहों, जउन बात मै तोर लग कहे हव, जब तक उके पूर न कर लो तब तक तोके कबहुन नेहको छांडिहो। 16 तब याकूब नींद लग जगिस, ता ऊ कथै, जरूर हइ जिघा भगवान आथै, मै हइ नेहको जानथो। 17 याकूब डर गइस, ऊ कथै, "हइ बोहत बडा जिघा हबै, हइ तो भगवान के घर आय, हइ तो स्वरग कर दूरा हबै।" 18 याकूब दूसर रोज सुबेन्ने उठिस, ऊ पथरा के उठाइस अउ ओही बगल हे ठाढ कर दइस, तब ऊ ओखर उप्पर तेल चढाइस, हइ मेर लग ऊ भगवान के सुरता के निता खम्भा बनाइस। 19 ऊ सहर कर नाम लूज रथै, पय याकूब उके बेतेल*28:19 भगवान कर घर धरिस। 20 याकूब अक्ठी बचन दइस, ऊ कथै, "अगर भगवान मोर संग रही अउ भगवान जिहां कहि मै जइहों, ऊ मोके बचइ, अगर भगवान मोके खाय के निता अउ पहिनै के निता कपडा देही, 21 अगर मै अपन बाफ के लिघ्घो सान्ति लग लउटो, अगर भगवान हइ सगलू चीज करही, ता भगवान मोर भगवान होही। 22 हइ जिघा हे मै हइ पथरा के ठाढ करे हव, भगवान के पवितर जिघा होही अउ भगवान जउन कुछु तै मोके देही ओखर दसमांस मै तोके दइहों।"