Jeremias 23

ጾሳይ ባረ ሁጲያዉ ኦና ጌዳዋንታ

1 መና ጎዳይ ሀዋዳን ያጌ፤ "ታ ሄን ጋደን ደእያ ዶርሳቱዋ ባይዝያነ ላልያ ሄንንቻቶ አየ አና!" ያጌ።

2 መና ጎዳይ እስራኤልያ ጾሳይ ባረ አሳ ሄምያ ሄንንቻቱዋባ ሀዋዳን ያጌ፤ "ህንተ ታ ዶርሳቱዋ ላሊደ፥ ዎራ የደርሴድታ። ህንተ ኡንቱንታ ጾሞስቤና ድራዉ፥ ታን ህንተ ኦዳ ኢታተዉ ኡባዉ ህንተና ሙሩዋን ጾሞሳና ያጌ መና ጎዳይ። 3 ሄዋፐ ጉይያን፥ ታ ዉድያፐ አቴዳዋንታ ካሰ ላሌዳ ቢታ ኡባፐ ታን ታ ሁጲያን ሺሻና። ኡንቱንታ ጉየ ኡንቱንታ ሄን ጋድያ ዛራና። ኡንቱንቱካ ሀዋን የለቲደ ጮራታና። 4 ታን ኡንቱንታ ሎይ ሄምያ ሄንንቻቱዋ ኡንቱንቶ ዎና። ኡንቱንቱ ላኤን ያይክኖነ ዳጋምክኖ፤ ኡንቱንቱፐ እቱነ ባየና። ታን መና ጎዳይ ሀዋ ኦዳድ" ያጌ።

5 መና ጎዳይ ሀዋዳን ያጌ፤ "ታን ዳዊተዉ ጽሎ አጫ ደንና ጋላሳቱ ያና። እ ካትያዳን ካዉታናነ አዳ ኤራተን ሞዳና፤ ቢታን እ ሱረባነ ጽሎባ ኦና።✝23:5 ኤር. 33:14-16 6 እ ካተትያ ላይን ይሁዳይ አታና፤ እስራኤሊካ ሳሮ ደአና። እ ጼሰታና ሱንይ መና ጎዳ፥ ኑ ጽሎተ ጌተታና" ያጌ።

7 ሄዋ ድራዉ፥ ጾሳይ ሀዋዳን ያጌ፤ "አሳይ፥ ‘እስራኤልያ አሳ ግብጼ ቢታፐ ከሲደ አሄዳ መና ጎዳይ ኤሮ’ ያጊደ ጫቂያዋ አጋና። 8 ሽን፥ ‘እስራኤልያ ዘረ ሁጲሳ ባጋ ቢታፐነ እ ላሌዳ ቢታቱዋ ኡባፐ አሄዳ መና ጎዳይ ኤሮ’ ያጊደ ጫቃና ጋላሳቱ ያና። ሄዋፐ ጉይያን ኡንቱንቱ ባረንቱ ቡዞ ቢታን ደአና" ያጌ።

ዎርዶ ትምቢትያ ኦድያዋንቱባ

9 ትምቢትያ ኦድያዋንቱባ ታን ቆፕያ ዎደ፥ ታ ዎዛናይ ካዩዋን መኤ፤ ታ መቀቱ ኡባይካ ኮኮሪኖ። መና ጎዳ ድራዉነ አ ጌሻ ቃላ ድራዉ፥ ታን ማቴዳ አሳ ማላ፥ ዎይንያ ኤሳይ ዎልቃ ድጌዳ አሳ ማላ ግዳድ። 10 አያዉ ጎፐ፥ ቢታይ ሻርሙጻቱዋን ኩሜዳ። ሸቃ ድራዉ፥ ቢታይ ዬኬ፤ ባዞ ሄን ጋደቱካ መሌድኖ። ትምቢትያ ኦድያዋንቱ ኢታ ኦግያ ሀመቲኖ፤ ባረንቱ ዎልቃካ ልከ ግደናሳን ጎኤቲኖ።

11 መና ጎዳይ፥ "ትምቢትያ ኦድያዌነ ቄሲነ ላኡካ ቱኔድኖ፤ ሀራይ አትና፥ ታ ጌሻ ጎልያንካ ኡንቱንቱ ኢታተ ታን ደማድ" ያጌ።

12 ቃይካ መና ጎዳይ፥ "ሄዋ ድራዉ፥ ኡንቱንቱ ኦጊ ሀልጻና፤ ኡንቱንቱ ማዉ ላገቲደ፥ አን ኩንዳና። ኡንቱንቱ ቃጻየትያ ላይ ታን ኡንቱንቱ ቦላን ኢታባ አሀና" ያጌ።

13 ቃይካ እ ሀዋዳን ያጌ፤ "ሳማርያን ደእያ ትምቢትያ ኦድያዋንቱ ግዶን ሸነይያዋ በኣድ። ኡንቱንቱ ባኣላ ሱንን ትምቢትያ ኦዲኖነ ታ አሳ እስራኤልያ ዎራ ካለኖ። 14 ቃይ የሩሳላመን ደእያ ትምቢትያ ኦድያዋንቱ ግዶንካ ዳጋንያባ በኣድ።✝23:14 ዶመ 18:20፤ ህዝ. 16:49 ኡንቱንቱ ሻርሙጺኖነ ዎርዶቲደ ሀመቲኖ። ኦንነ ባረ ኢታ ኦሱዋፐ ስመናዳን፥ ኡንቱንቱ ኢታ ኦያዋንታ ገደ ምንኖ። ኡንቱንቱ ኡባይካ ታዉ ሶዶማ ማላ፤ የሩሳላመ አሳይካ ጋሞራ ማላ" ያጌ።

15 ሄዋ ድራዉ፥ ኡባፐ ዎልቃማ መና ጎዳይ ትምቢትያ ኦድያዋንቱባ ሀዋዳን ያጌ፤ "የሩሳላመን ደእያ ትምቢትያ ኦድያዋንቱፐ ቱናባይ ከሲደ፥ ቢታ ኡባን ላለቴዳ ድራዉ፥ ታን ኡንቱንታ ጫምያ ቁማ ምዛና፤ ታን ኡንቱንታ ዎያ ሃ ኡሻና" ያጌ።

16 ኡባፐ ዎልቃማ መና ጎዳይ ሀዋዳን ያጌ፤ "ትምቢትያ ኦድያዋንቱ ኦድያባ ስሶፕተ። ኡንቱንቱ ሀነናባ፥ ሀናና ጊደ፥ ዎርዱዋ ኦዲኖ። መና ጎዳይ ባረ ዶናፐ ኦድና ግደናን፥ ኡንቱንቱ ባረፐ ቆፕ አኪደ፥ ሳፃ ኦዲኖ። 17 ታና ካያዋንታ ኡንቱንቱ፥ ‘መና ጎዳይ፥ ህንተ ሳሮ ደአና’ ያጌ ያጊኖ። ቃይ ባረንቱ ዎዛና ሙመተ ካለያዋንታ ኡባ ኡንቱንቱ፥ ‘ህንተ ቦላ አያ ኢታባይነ ዬና’ ያጊኖ" ያጌ።

18 ሽን በአናዉ ዎይ አ ቃላ ስሳናዉ መና ጎዳይ ዞርያሳን ኡንቱንቱፐ ኦንነ ኤቂቤና። አ ቃላ ሀይዜዳዌ ዎይ ስሴዳዌ ኦንነ ባዋ። 19 መና ጎዳ ጎቲ፥ አ የግያ ቤታይ ሀንቁ ሀዌሾ ከሴዳ! እ ኢታ አሳቱዋ ሁጲያን ኤቃና። 20 አ ዎዛና ቆፋ ኦደ ፖለናን ደኢድ፥ መና ጎዳ ሀንቁ ስመና። ዉርሰ ጋላሳቱዋን ሀዋ ህንተ አኬካና።

21 ጾሳይ ሀዋዳን ያጌ፤ "ታን ትምቢትያ ኦድያዋንታ ኪታበይከ፤ ሽን ኡንቱንቱ ዎጺኖ። ታን ኡንቱንቶ ኦዳበይከ፤ ሽን ኡንቱንቱ ትምቢትያ ኦዲኖ። 22 ኡንቱንቱ ታን ዞርያሳን ኤቄዳዋ ግድንቶ፥ ታ ቃላ ታ አሳዉ ኦዳና ሽን! ኡንቱንቱ ኡንቱንቱ ኢታ ኦግያፐነ ኡንቱንቱ ኢታ ኦሱዋፐ ዛራና ሽን!" ያጌ።

23 ቃይካ መና ጎዳይ፥ "ታን ማታ ጻላላ ጾሴ? ሃኮ ሳን ጾሳ ግድክታ? 24 ታን በኤናዳን፥ ጌማ ሳኣን ባረና ቆሳናዉ አሳይ ዳንዳዪ? ሳሉዋንነ ሳኣን ኩሜዳዌ ታና መና ጎዳ ግድክታ?" ያጌ መና ጎዳይ።

25 ጾሳይ ሀዋዳን ያጌ፤ "ታ ሱንን ዎርዱዋ ትምቢትያ ኦድያዋንቱ ግያዋ ስሳድ። ኡንቱንቱ፥ ‘ታን አኩመታድ፤ ታን አኩመታድ!’ ያጊኖ። 26 ሀ የዉ ባረ ዎዛና ጭሙዋ ትምቢትያ ኦድያ ዎርዶ ናበቱዋ ዎዛናን አዉደ ጋካናዉ ጋምአኔ? 27 ኡንቱንቱ አዎቱ ባኣላ ግያ ኤቃ ጋሱዋን ታ ሱን ዶጌዳዋዳን፥ ኡንቱንቱ እቱ እቶ ኦድያ አኩሙዋን ታ አሳይ ታ ሱን ዶጋናዳን ኦናዉ ቆፒኖ። 28 አኩሙዋ አኩመቲደ ትምቢትያ ኦድያዌ ባረ አኩሙዋ ኦዶ። ሽን ታ ቃላ ስሴዳዌ ሄ ቃላ አሸናን ጉጀናን ኦዶ። ዳላይነ ዛርጋይ ሀቃን ጋከቲ? ያጌ መና ጎዳይ። 29 ታ ቃላይ ታማ ማላ ግደኔ? ዛላ መንሬያ ማዶሻ ማላ ግደኔ?" ያጌ መና ጎዳይ።

30 መና ጎዳይ ሀዋዳን ያጌ፤ "ሄዋ ድራዉ፥ ታን ታ ቃላ እቱ እቱዋፐ ዉእያ ትምቢትያ ኦድያዋንቱ ቦላ ደአይ። 31 ሄዋዳንካ፥ ባረንቱ እንጻርሳን ሃሳዪደ፥ መና ጎዳይ ያጌ ያግያ ትምቢትያ ኦድያዋንቱ ቦላ ደአይ ያጌ መና ጎዳይ። 32 ታን መና ጎዳይ ሀዋ ኦዳይ! ዎርዱዋ አኩመቲደ፥ ትምቢትያ ኦድያዋንቱ ቦላ ታን ግዳና። ኡንቱንቱ ሄ አኩሙዋ ኦዲደ፥ ባረንቱ ዎርዱዋንነ ባረንቱ ጬቁዋን ታ አሳ ዎራ ካለኖ። ታን ኡንቱንታ ኪታበይከ ዎይ፥ ኦድተ ጋበይከ። ኡንቱንቱ ሀ አሳ አይነ ማድክኖ። መና ጎዳይ ሀዋ ኦዳድ" ያጌ።

ጾሳ ኪታ

33 መና ጎዳይ ታና ሀዋዳን ያጌዳ፤ "ኤርማሳ፥ ሀ አሳፐ እቱ፥ ዎይ ትምቢትያ ኦድያዌ፥ ዎይ ቄሲ፥ ‘መና ጎዳ ኪታይ አዬ?’ ጊደ ኦቾፐ፥ ኔን ኡንቱንታ፥ ‘መና ጎዳ ኪታይ ህንተና፤ ሄዋ ድራዉ፥ ታ ህንተና አጋ ባሻና’ ያጌ ያጋ። 34 ትምቢትያ ኦድያዌ፥ ዎይ ቄሲ፥ ዎይ አሳፐ እቱ፥ ‘ሀዌ መና ጎዳ ኪታ’ ያጊደ ሃሳዮፐ፥ ታን ሄ ብታንያነ አ ሶ አሳ ሙራና። 35 ሄዋ አጊደ አሳይ፥ ‘መና ጎዳይ ዋጌዴ?’ ዎይ፥ ‘መና ጎዳይ ኦዴዳባይ አዬ?’ ያጊደ ባረ ላገቱዋነ ባረ ዳቦቱዋ ኦቻናዉ በሴ። 36 ሄዋ ድራዉ፥ ኦንነ፥ ‘መና ጎዳ ኪታ’ ያጊደ ላኤን ሃሳያናዉ በሰና። አያዉ ጎፐ፥ አዉ ዶናፐ ከስያ ቃላይ አዎ ኪታ ግዴ። ሄዋን ደኡዋ ጾሳ፥ ኡባፐ ዎልቃማ መና ጎዳ፥ ኑ ጾሳ ቃላ ህንተ ምርቂታ።

37 "ኔንካ ትምቢትያ ኦድያዋንታ፥ ‘መና ጎዳይ ህንተና ዋጌዴ? ዎይ፥ መና ጎዳይ አያ ኦዴዴ?’ ያጋደ ኦቻናዉ በሴ። 38 ሽን ህንተ፥ ‘ሀዌ መና ጎዳ ኪታ’ ጎፐ፥ መና ጎዳይ ሀዋዳን ያጌ፤ ‘ታን ህንተና፥ ሀዌ መና ጎዳ ኪታ ጎፕተ’ ያግናካ ህንተ፥ ‘ሀዌ መና ጎዳ ኪታ’ ጌድታ። 39 ሄዋ ድራዉ፥ ቱሙዋፐ ታን ህንተና ዶጋና፤ ህንተዉነ ህንተ አዎ እሜዳ ካታማ ታ ስንፐ ዎራ ኦላና። 40 ታን ህንተ ቦላ መና ካዉሻነ መናዉ ዶገተና ዬላ አሀና ያጌ" ያጌዳ።