Jeremias 9

1 ታ ሁጲ ሃ ኦላ ግዴረኔሻ! ታ አይፈቱካ አፎ ፑልቶ ግዴርክኖሻ! ያትንቶ ታን ታ አሳቱዋፐ ሞርከቱ ኩሽያን ሀይቄዳዋንቶ ቃማነ ጋላስ ዬካና ሽን! 2 ታ አሳፐ ሻከታደ ባና ማላ፥ ታዉ ባዙዋን ሲራይ አቅያ ሳአይ ደኤረኔሻ! አያዉ ጎፐ፥ ኡንቱንቱ ኡባይ ሻርሙጻ፤ ኡንቱንቱ ማካልያ አሳ ዛታ።

3 መና ጎዳይ ሀዋዳን ያጌ፤ "ታ አሳቱ ባረንቱ እንጻርሳን ኦዳናዉ ኡባ ዎደ ጊግ ኡቴድኖ፤ ኡንቱንቱ ቢታን ቱሙዋ ድራዉ ዎርዱ ምኔዳ። ኡንቱንቱ ኢታፐ ኢታዉ አኖ፤ ታና ኤርክኖ" ያጌ።

4 ቃይካ ጾሳይ ሀዋዳን ያጌ፤ "ሾሩ ሾሩዋፐ ናገትተ፤ ህንተ እሻቱዋካ አማነቶፕተ። አያዉ ጎፐ፥ እሻይ ኡባይ ጭምያዋነ ሾሮ ኡባይ ዝግርያዋ። 5 ሾሩ ሾሩዋ ጭሜ፤ እቱነ ቱሙዋ ሃሳየና። ኡንቱንቱ ባረንቱ እንጻርሳ ሃሳያናዉ ታማርስ ዎድኖ። ኡንቱንቱ ናጋራ ኦደ ዳቡሪኖ። 6 ኔን ጭሙዋ ግዶን ደኣሳ። ኡንቱንቱ ባረንቱ ጭሙዋን ታና ኤረናን እጼድኖ" ያጌ መና ጎዳይ።

7 ሄዋ ድራዉ፥ ኡባፐ ዎልቃማ መና ጎዳይ ሀዋዳን ያጌ፤ "ታን ኡንቱንታ ሴርሳደ ፓጫና። ታ አሳ ድራዉ፥ ስም ታን ሀራባ አያ ኦናዉ ዳንዳያይታ? 8 ኡንቱንቱ እንጻርሳይ ዎያ ዎንዳፍያ ማላ፤ ኡንቱንቱ አን ጭሙዋ ሃሳዪኖ። ባረንቱ ዶናን እቱ እቶ ሳሮ ቃላን ሃሳዪኖ፤ ሽን ባረንቱ ዎዛናን ጲርያ ዎኖ። 9 ያትና፥ ታን ሀ የዎ ኡንቱንታ ሙራናዉ በስክታ? ታን ታ ሁጲያዉ ሀዋ ማላ ካዉተ ቦላ ሀሉዋ ከስክታ?" ያጌ መና ጎዳይ። 10 ታን ቃ ደረቶ ዬካናነ ዋሳና፤ ባዞ ሄን ጋደቱዋ ዝላላና። አያዉ ጎፐ፥ ኡንቱንቱ ባሼድኖ፤ ያና እት አሳይነ አና። መህያ ጻጉነ ስሰተና፤ ሳሉዋ ካፎቱነ ዶአቱ ባቃቲደ ብ ክቼድኖ።

11 ጾሳይ ሀዋዳን ያጌ፤ "የሩሳላመ ካታማ ታን ኮለቴዳ ኬላነ ዎራካናቱ ጌሱ ኦና ኦና። ይሁዳ ካታማቱዋካ ኦንነ ደኤና መላ ሳኣ ኦና" ያጌ።

12 ሀዋ አኬካናዉ አዳ ኤራንቻይ ኦኔ? እ ሀራ አሳዉ ኦዳና ማላ፥ መና ጎዳይ ባረ እንጻርሳን ኦስ ኦዴዴ? እት አሳይነ አ ግዱዋና አና ማላ፥ ቢታይ ባዪደ፥ ባዙዋዳን ኦኔዳዌ አያሴ?

13 መና ጎዳይ ያጌዳ፤ "ሀዌ ሀኔዳዌ፥ ኡንቱንቶ ታን እሜዳ ህግያ ኡንቱንቱ አጌዳ ድራሳ። ኡንቱንቱ ታዉ አዛዘተናንነ ሀ ህግያ ካለናን እጼዳ ድራሳ። 14 ሄዋ አጊደ፥ ኡንቱንቱ ባረንቱ ዎዛና ሙመተ ካሌድኖ፤ ኡንቱንቱ ባረንቱ አዎቱዋ ታማርሴዳዋዳንካ ባኣላ ግያ ኤቃቶ ጎይኔድኖ" ያጌዳ።

15 ሄዋ ድራዉ፥ ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ "በእተ፥ ታን ሀ አሳ ጫምያ ቁማ ሚዛናነ ዎያ ሃ ኡሻና። 16 ኡንቱንቱ ዎይ ኡንቱንቱ አዎቱ ኤረና ካዉተቱዋ ግዶን ታን ኡንቱንታ ላላና። ታን ኡንቱንታ ይሳና ጋካናዉ፥ ማሻን የደርሳና" ያጌ።

የሩሳላመ አሳይ ዝላሌዳ

17 ቃይካ ኡባፐ ዎልቃማ መና ጎዳይ ሀዋዳን ያጌ፤ "አነ ቆፕተ። ዬኩዋ ዬክያ ማጫ አሳቱዋ ጼሲደ አይስተ፤ ዝላሳ ዝላልያ ኤራንቻ ማጫ አሳቶ ኪትተ። 18 ኡንቱንቱ ኤለካ ዪደ፥ ኑ አይፊ አፎ ጽሉዋ ጾካና ጋካናስነ ኑ አይፍያ ጭሩ ሃ ፑልታና ጋካናዉ ኑ ቦላ ዝላልኖ። 19 ጽዮነን ሀዋዳን ግያ ዝላሳ ኮሻይ ስሰቴ፤ ‘አዬሮ! ኑን ባዬዶ! ኑን ሙለካ ካዉሼዶ! ኑ ጎሊ ኮለት ክቼዳ ድራዉ፥ ኑን ቢታ አጊደ ባናዉ ኮሼ’ ያጊኖ" ያጌ።

20 ህንተኖ፥ ማጫ አሳቶ፥ መና ጎዳ ቃላ ስስተ! ህንተ ሀይይ አ ዶናፐ ከስያ ቃላ ሀይዞ። ህንተ ማጫ ናናቱዋ ዝላሳ ታማርስተ፤ ሾራታ ሾራቶ ኮይሱዋ ታማርሱ። 21 አያዉ ጎፐ፥ ሀይቁ ናናቱዋ ኦግያን፥ ዎዳላቱዋካ ጉታራን ቄጺደ ዪደ፥ ኑ ማስኮተቱዋ ጋኬዳ፤ ኑ ካተ ጎለቱዋንካ ገሌዳ።

22 መና ጎዳይ ታና ሀዋዳን ያጊደ አዛዜዳ፤ "ጾሳይ ሀዋዳን ያጌ፤ ‘አሳ አሃይ ፕቱዋዳን ደምባን ላለታና፤ ኡንቱንቱ ጫክያዋንቱ ጫኪደ ኦሌዳ ካ ማላ፤ ኡንቱንታ ኦንነ ሺሸና’ ያጋ" ያጊደ አዛዜዳ።

23 መና ጎዳይ ሀዋዳን ያጌ፤ "አዳ ኤራንቻይ ባረ ኤራን ጬቆፖ፤ ዎልቃማይ ባረ ዎልቃን ጬቆፖ፤ ዎይ ዱሪ ባረ ዱረተን ጬቆፖ። 24 ሽን ጬቂያ ኡራይ ኦንነ ታና ኤርያዋንነ አኬክያዋን ጬቆ።✝9:24 1 ቆሮ. 1:31፤ 2 ቆሮ. 10:17 አገና ሲቁዋ፥ ሱረ ፕርዳነ ጽሎተ ሳኣ ቦላን ኦያ መና ጎዳ፥ ታና ኤርያዋን ጬቆ። አያዉ ጎፐ፥ ታን ሀዋንቱን ናሸታይ። ታን መና ጎዳይ ሀዋ ኦዳድ" ያጌ።

25 ቃይካ መና ጎዳይ ሀዋዳን ያጌ፤ "በእተ፥ ባረንቱ አሹዋ ጻላላ ቃጻረቴዳ አሳቱዋ ታን ሙራና ጋላሳቱ ዪኖ። 26 ሄዋንቱካ ግብጼ፥ ይሁዳ፥ ኤዶማ፥ አሞናነ ሞኣባ ቢታ አሳቱዋነ ባረንቱ ሁጲያ ሹፌርያ ሜዲደ፥ ባዙዋን ደእያ አሳቱዋ ኡባቱዋ። አያዉ ጎፐ፥ ሀ ካዉተቱዋ ኡባ አሳይ ቱሙዋፐ ቃጻረትቤና፤ እስራኤልያ አሳይ ኡባይካ ባረ ዎዛናን ቃጻረትቤና" ያጌ።