Êxodo 1

Lu’duko lwa V’aizilaeli ku' nsi' ya Misili

1 Aga hu' mina ga v’ana v’a ki’gosya v’amwa Izilaeli, ku' lina li’ngi' Yakobo, av’o ndi' waya nav’o ku' nsi' ya Misili, ki’la yu’mo wayaga na mugana gwakwe: 2 Lubeni, Simiyoni, Lawi, Yuda, 3 Isakali, Sebuloni, Benyamini, 4 Dani, Nafutali, Gadi na Asheli. 5 V’av’yalwa v’ose v’amwa Yakobo v’av’age maku’mi mupungati'. Itungo lyeni’lo Yosefu wasangwa watongelile kwenu’ko ku' Misili.

6 Aho lyav’i’ta itungo, Yosefu na v’adu’gu’ye, haki’mo na izyi’ka lya itungo lyeni’lo, v’agulalaga. 7 Ali’vi V’aizilaeli v’asangwa v’akiv’yala na kwingi’ha muno. Wingi wav’o wav’aga na nguzu muno na v’asambalaga mu nsi' yose.

8 Hangi' watemaga mutemi yu’ngi' mu nsi' ya Misili u’yo wav’age akamumanya Yosefu. 9 Nawe wav’awi’laga v’antu' v’akwe ati', "Lingagi, V’aizilaeli v’av’aga v’ingi muno, hangi' v’ali' na nguzu ku’ki’la iswe. 10 Yi’li’ku’dima ku’koov’e nzi’la ya ku’v’ahangi’li’zya ki’gele v’aleke kwingi’ha, ku’nguno u’lu' wigele wu’lu’gu' v’akowolile kwisangya na v’anisi v’iswe ku’lasana niswe, na ku’toloka mu nsi' yeni’yi'." 11 Hohene V’amisili v’atu’u’laga v’i’mi’li’zi v’a ku’v’i’mi’li’zya V’aizilaeli na v’av’atu’mamyaga mili’mo zya wu’sese. V’aizilaeli v’atu’mamaga mili’mo zya ku’muzyengela Falao*1:11 Lina Falao li’li' isumbi' lya wu’temi ku' Misili. kaya zya Pitomu na Lamesesi zya ku’tu’u’li’la viv’ango vyamwa Falao. 12 Ali’vi, aho v’atusiv’agwa, na hu' vyene v’endeleyaga kwingi’ha na ku’sambala mu nsi'. Ku’nguno yeni’yo V’amisili v’av’ogohaga muno V’aizilaeli. 13 Hohene V’amisili v’av’atu’mamyaga V’aizilaeli ku' wu’kandi. 14 V’av’av’ezyaga v’av’e na wikalo wu’lambu ku’nguno ya mili’mo mitimbu zya nswakala na matofali, na mili’mo zyose zya mu migu’nda. Mugati' na mili’mo zyose V’amisili v’av’atu’mamyaga V’aizilaeli ku' wu’kandi!

15 Hangi' mutemi wa Misili wav’awi’laga Shifula na Pua, av’o v’av’age v’ingi' v’a v’aki’ma v’a Ki’ebulania, ati', 16 "Ha itungo lya ku’v’av’yazya v’aki’ma v’a Ki’ebulania muv’e muli’wikomya. U’lu' wav’yalwa mwana wa ki’gosya mumuwu’lage, na u’lu' wa ki’ki’ma mumuleke azuwu’ke." 17 Ali’vi v’enav’o v’av’age v’amogohile Mulungu. V’akav’ezizye ki’ti' mutemi wa Misili i’vyo walagi’li’zizye, sumbwa v’av’alekaga v’ana v’a ki’gosya v’azuwu’ke. 18 Hohene mutemi wa Misili wav’itanaga v’ingi' v’enav’o na ku’v’awu’zya ati', "Ku' ki' mwav’ezyaga vyeni’vyo, ku’v’aleka v’ana v’a ki’gosya v’azuwu’ke?" 19 Nav’o v’asu’v’yaga ati', "V’aki’ma v’a Ki’ebulania v’ali' v’asiliganzi, na v’ali' na nguzu. V’akav’ile ki’ti' v’aki’ma v’a Ki’misili. Itungo v’ingi' v’akaali' ku’fika, v’eni’ki’li' v’ali’sangagwa v’ipeku’laga." 20 Ku’nguno yeni’yo, Mulungu wav’av’ezezyaga masoga v’ingi' v’enav’o, na V’aizilaeli v’ingi’haga na ku’v’a na nguzu nyingi. 21 Ku' i’vyo v’ingi' v’enav’o v’av’age v’ali’mogoha Mulungu, na Mulungu wav’apaga migana zyav’o v’eni’ki’li'.

22 Hangi' Falao wafumyaga ilagi’li’zyo ku' v’antu' v’akwe v’ose na ku’v’awi’la ati', "Ki’la mwana wa ki’gosya u’yo alav’yalwe na V’aebulania atagi’lwe mu mongo gwa Naili, ali’vi mwana wa ki’ki’ma mumuleke azuwu’ke."