1 Apfo Wafilisti tsawetowa na Waisiraeli, nawo Waisiraeli tsawawatsuma Wafilisti na wakomighwa mna ichidunda cha Giliboa. 2 Wafilisti tsawaghogha Sauli na iwanaghe, kuya wawakoma Yonasani, Abinadabu na Malikishua, iwana wa Shauli. 3 Ing'ondo tsa ng'ulu ng'ani kwa Sauli. Iwakwasa tsiminde hawamwonile tsawamlagha. 4 Baho Sauli kamlongela imsongolo ayula iyang'ali yomghalila tsisilaha tsake tsa ing'ondo, "Somola lipanga unihome nife, hela iwanu awano ing'awengile ngoma watsonighela chinyala." Lekeni imsongolo ayo yamghalile tsisilaha tsakalema, kwaapfila tsakapfuka sideke. Baho Sauli kasola lipanga lyake kalihomeka hasi, kuya kalighwila. 5 Kuya imsongolo ayula iyang'ali iyomghalila tsisilaha tsake hayonile Sauli kafa, naye kalighwila lipanga lyake, kuya kafa. 6 Apfo pfipfo Sauli pfayafile hamwe na iwanaghe wadatu, na iwanu wa ikaye yake wose. 7 Iwanu wose wa Isiraeli iwakalile mlwanda mwa Yezireeli, hawonile maasikali wose watsuma, na Sauli na iwanaghe wafa, waileka imiji yawo, nawo watsuma. Nawo Wafilisti waghenda wakala amwo.

8 Ilupfi yake, Wafilisti hawaghendile kuwatsula ipfinu pfawapfalile iwanu awo iwafile, tsawamwona Sauli na wanaghe waghwa mna chidunda cha Giliboa. 9 Wamtsula maghwanda, wamghana litwi, na tsisilaha tsake, kuya waghala wasenga waghende isi ya Wafilisti chila hanu, ili walalatse tsimbuli atso kwa ipfinyagho pfawo, na kwa iwanu. 10 Watsika tsisilaha tsake mng'anda mwa milungu yawo, kuya litwi lyake walikondeka mna ing'anda ya mlungu wao Dagoni. 11 Lekeni iwanu wose wa Yabeshi Gileadi hawahulike agho ghose Wafilisti ghawamtendele Sauli, 12 iwanu wose iwalihela wogha, walusola lukuli lwa Sauli na ng'uli tse iwanaghe, waighala Yabeshi. Waitsika imipate yawo hana ghumbiki ighukemighwa mwaloni ako Yabeshi, nawo wafunga ukuja kwa matsuwa saba. 13 Sauli tsakafa kwaapfila ng'amtegheletse IMNDEWA baye, kaleka kuwinza aghala ghayalongile IMNDEWA, ila yeye kaghenda kwa mtowa lamli yakalaghule. 14 Apfo IMNDEWA tsakamkoma na ufalume wake kamwing'a Daudi mwana wa Yese.