1 Mwanduso wa ghumwaka ghwao ghungi, ghumsimu ghwa iwafalume kughenda kwing'ondo, Yoabu tsakawalongotsa maaskali wake na kaitsingila isi ya Waamoni, Kuya kaghenda kuna ghumji ghwa Raba na kaghutsingila. Lekeni Daudi tsakasighala ako Yerusalem. Naye Yoabu tsakaghutowa ghumji ghwa Raba na kughuhinya ghendo. 2 Naye Daudi hayapfikile Raba, tsakalisola litaji lyayapfalile mwitwi, mulungu wawo Milikomu, baho tsakatanga ka litaji alyo tsalina kilo salasini na tano tsa nzahabu na mghati mwake tsamna libwe lya bei ng'ulu. Daudi tsakalisola libwe alyo keka mna litaji lyake. Pfipfila Daudi tsakaboka pfinu pfingi kulawa mna ghumji agho. 3 Kuya kawasola iwanu wa ghumji agho kaweka wasang'ane tsing'onde kwa misumeno, kwa tsisululu na kwa tsihoya. Apfo pfipfo Daudi pfayaitendile imiji yose ya Waamoni. Kuya Daudi na iwanu wake wose woya Yerusalemu.

4 Hambele tsakulawila ng'ondo na Wafilisti ako Gezeri. Sibekai iyolawa Hushati tsakalikoma tsinu kulu likemighwa Sipai, iyawile mtsukulu wa Warefai, nawo Wafilisti tsawatowighwa. 5 Tsakulawila keli ing'ondo na Wafilisti, naye Elihamani mwana wa Yairi tsakamkoma Lahimi ndughu yake Goriati kulawa Gati yane mghoha ka ghumbiki ghwa kufumila. 6 Kuya hambele tsailawila keli ing'ondo ako Gati, tsakuna tsinu lina pfidole sita, mna ghamoko na mna ghamaghulu, pfose tsapfidole ishilini na pfine. Yeye pfipfila tsakakawila mlukolo lwa mitsinu ya Refai. 7 Naye hayawalighile Waisiraeli, Yonasani mwana wa Shimea, ndughu yake Daudi tsakamkoma. 8 Awano tsa iwana wa imitsinu ako Gati, nawo tsawakomighwa na Daudi na iwanu wake.