1 Daudi tsaketsengela tsing'anda mna ghumji ghwa Daudi. Mumo katsenga hanu ha ukukala lisanduku lya Imulungu, kuya kalihimikila lihema. 2 Kuya kalonga, "Kuduhu imunu yungi wowose iyatsolighala lisanduku lye Imulungu ila Walawi, kwaapfila IMNDEWA kawasaghula wawo walighale na wamsang'anile yeye ghamatsuwa ghose!" 3 Apfo Daudi kawakema Waisiraeli wose iwali Yerusalemu, wakalidute lisanduku lya IMNDEWA na walighale hanu kuyalitsengele. 4 Kuya Daudi kawakema iwanu wa lweleko lwa Aruni na Walawi. 5 Kulawa mna ulukolo lwa Kohathi, tsawatsa tsina Urieli na ndughu tsake miya na ishilini aku Urieli kowalongotsa: 6 Kulawa ma ulukolo lwa Merari katsa Asaya na ndughu tsake miya mbili na ishili iyawalongotse 7 Kulawa mna ulukolo lwa Garishom, katsa Yoeli na ndughu tsake miya na salasini iyawalongotse, 8 Kulawa mna ulukolo lwa Elisafani, katsa Shemaya na ndughu tsake miya mbili iyawalongotse: 9 Kulawa mna ulukolo lwa Hebroni, watsa wanu samanini iyawalongotse Elieli: 10 na kulawa mna ulukolo lwa Usieli, katsa Aminadabu na kawalongotsa ndughu tsake miya na kumi na weli. 11 Daudi tsakawakema watambika weli. Sadoki na Abiathari, na Walawi sita: Urieli, Asaya, Yoeli, Shemaya, Elieli na Aminadabu, 12 kawalongela, "Mwemwe mwa wakulu wa kolo tsa Walawi. Apfo mwemwewe na Walawi wayenu, mwitende mwele na mghende mkalisole lisanduku lya IMNDEWA, Imulungu wa Isiraeli, mbaka hanu hala hanilitsengele. 13 Kwaapfila aho mwanduso mwemwe ng'amulidutile baye, apfo IMNDEWA, Imulungu wetu tsakatutowa kwaapfila ng'atulilalangitse baye ka apfila pfayalaghitse." 14 Apfo watambika na walawi wetenda wenyegho wele ili walighala lisanduku lye IMNDEWA Imulungu, Imulungu wa Isiraeli. 15 Walawi waliduta lisanduku mmahegha mwao kwa mihini yake, ka Musa pfayalaghitse, na ka apfila imbuli ya Imulungu pfailonga.

16 Daudi tsakawalaghitsa wakulu wa Walawi wawasaghule walawi wangi wembe wila tsa ukudeng'elela na watowe kwa kupfu tsingoma na pfing'wengwe, pfilimba na matoatsi. 17 Apfo Walawi wawasaghula awano wawe wanu iwakwimba, Hemani mwana wa Yoeli na ndughu yake Asafu mwana wa Berekia: na Ethani mwana wa Kushaia iyolawila mna ulukolo lwa Merari ndughu tsawo, na Ethani mwana wa Kushaya. 18 Kuya wawasaghula Walawi wano wawapfile, Sakaria, Yasieli, Shemiramothi, Yehieli, Uni, Eliabu, Benaya, Maaseya, Matithia, Elifelehu, Mikneya, hamwe na wakaliitsa libani, Obededomu na Yeieli, 19 Hemani, Asafu, Etani wasaghulighwa wembe na watowe matoatsi gha shaba. 20 Sakaria, Asieli, Shemiramothi, Yehieli, Uni, Eliabu, Maaseya na Benaya, tsawasaghulighwa watowe pfilimba kwa kuwinza mdundo ukemighwa Alomothi. 21 Lekeni Matitia na Elifelehu na mikneya na Obedi Edomu na Yeieli na Asasia tsawasaghulighwa wawe watowa pfilimbi kwa kuwinza mdundo ukemighwa Sheminithi. 22 Naye Kenania tsakasaghulighwa yawe chilongotsi wa iwalawi wakwimba, kwaapfila tsakadaha sideke ukwimba. 23 Berekia na Elikana tsawasaghulighwa wakalitse lisanduku lya laghano. 24 Watambika Shebania, Yoshafati, Nethaneli, Amasai, Sekaria, Benaya na Eliezeri tawasaghulighwa watowe malati hambele he sanduku lye Imulungu. Obedi edomu na Yehiya pfipfila tsawasaghulighwa wawe wakalitsa lisanduku.

25 Apfo Daudi na pfilingotsi wa Waisiraeli na pfilongotsi wemilile maasikali elufu elufu, waghenda kulisola Lisanduku lya IMNDEWA kulawa ukaye kwa Obedi edomu aku wodeng'elela. 26 Imulungu tsakawapfila Walawi awala iwalidutile lisanduku lya laghano lye IMNDEWA, apfo Daudi na pfilongotsi wamchinjila wang'ombe wamale saba na ng'unzu saba wawe nambiko. 27 Daudi tsakapfala lijoho lyitselu, na Walawi iwalidutile lisanduku alyo, na iwanu iwakwimba na Kenania, chilongotsi wa iwanu iwakwimba pfipfila wose tsawapfala majoho matselu. Daudi tsakapfala lijoho alyo hamwe na chitsibao chitselu. 28 Apfo, Waisiraeli wose tsawalighala Yerusalemu lisanduku lya laghano lya IMNDEWA. Wang'ali wodeng'elela kwa ukukemelela, aku wotowa malati, pfimbeta, na matoatsi na litsi kulu lya pfing'weng'we na pfilimba. 29 Sanduku lya laghano lya IMNDEWA haling'ali lyakwingila mna ghumji ghwa Daudi, Mikali, neghe Shauli kamsungulila kulawa hana lidilisha lyake, baho kamwona mfalume Daudi kopfina aku kodeng'elela, Mikali kambetsa mmoyo mwake.