1 Yakobo, iyakemighwe Isiraeli, tsakana wana wamale kumi na weli: Rubeni, Simeoni, Lawi, Yuda, Isakari, Zabuloni, 2 Dani, Yosefu, Benjamini, Nafutali, Gadi na Asheri.

3 Iwana wa Yuda iyeleke na Betishua, mwehe wake kulawa isi ya Kanaani, tsa Eri, Onani na Shela. Eri, imwana chaudele wa Yuda tsakeha hambele ha IMNDEWA, apfo IMNDEWA kamkoma. 4 Na Tamari, mkwe yake Yuda, tsa mwehe wa imwanaghe iyakomighwe, tsakamwelekela Yuda wana weli: Peresi na Zera. Apfo iwana wose wa Yuda tsa watano.

5 Peresi tsakana wana weli wamale: Hesironi na Hamuli. 6 Zera naye tsakana wana watano wamale: Zimri, Etani, Hemani, Kalikoli na Dara. 7 Mwana wa Karimi, tsakakemighwa Akari (Akari mana yake maghayo). Ayuno yuyula iyawaghalile ghamaghayo Waisraeli kwaapfila tsakepfisila ipfinu ipfilapfighwe kwa IMNDEWA. 8 Etani tsakana mwana mmale yumwe, naye tsakakemighwa Azariya.

9 Hesironi tsakana wana wadatu: Yerameeli, Ramu, na Kalebu. 10 Ramu tsakamweleka Aminadabu, naye Aminadabu tsakamweleka Nashoni, imkulu wa likabila lya Yuda. 11 Nashoni tsakamweleka Salimoni, naye Salimoni tsakamweleka Boazi, 12 Boazi naye tsakamweleka Obedi, naye Obedi tsakamweleka Yese. 13 Yese tsakeleka wana saba: Eliabu, imwanaghe chaudele, wa kabili tsa Abinadabu, wa kadatu Shama, 14 wa kane Netaneli, wa tano Radai, 15 wa sita Osemu na wa saba Daudi. 16 Lumbu tsawo tsa Seruya na Abigaili. Iwana wa Seruya tsa wadatu: Abishai, Yoabu na Asaheli. 17 Abigaili tsakamweleka Amasa. Amasa aba wake tsakakemighwa Yeteri, kulawa mna mweleko ghwa Ishimaeli.

18 Kalebu, mwana wa Hesironi, tsakakwela wehe weli, Asuba na Yerioti, Asuba kamwelekela wana wadatu: Yesheri, Shaobabu na Aridoni. 19 Asuba hayafile, Kalebu kamkwela Efurata iyamwelekele Huri. 20 Huri kamweleka Uri, naye Uri kamweleka Bezaleli.

21 Hesironi hayawile na miyaka sitini, kawasa na neghe Makiri aba wa Gileadi. Pinga ayo kamwelekela mwana mmale, taghwa jake Segubu. 22 Segubu tsakamweleka Yairi iyatawale miji ishilini na midatu mna isi ya Gileadi. 23 Lekeni wafalume wa Geshuri na Aramu tsawawapfamila na wawaboka miji ya Haroti Yairi na Kenati na pfijiji pfake, yose tsa miji sitini. Awo wose tsa lukolo lwa Makiri, aba wake Gileadi. 24 Hesironi hayafile, Kalebu kamkwela Efurata, chitsuka wa Hesironi,* aba wake. Efurata tsakamwelekela Kalebu mwana, taghwa lyake Ashuri, iyanduse ghumji ghwa Tekoa.

25 Yerameeli, imwana chaudele wa Hesironi, tsakana wana watano: mwanaghe chaudele tsakekemighwa Ramu, kuya koneka Buna, Oreni, Osemu na Ahiya. 26 Yerameeli tsakana pinga yungi taghwa lyake Atara. Ayuno kamwelekela Yerameeli mwana, taghwa lyake Onamu. 27 Ramu, imwana chaudele wa Yerameeli, tsakana wana wamale wadatu: Maasi, Yamini na Ekeri. 28 Iwana wa Onamu tsa Shamai na Yada. Nawo wana wa Shamai tsa Nadabu na Abishuri.

29 Abishuri tsakakwela pinga, taghwa lyake Abihaili, naye tsakamwelekela wana wamale weli, Abani na Molidi. 30 Iwana wa Nadabu tsa Seledi na Apaimu, lekeni Seledi tsakafa bila kweleka wana. 31 Apaimu tsakana mwana yumwe iyakemighwe Ishi. Ishi tsakamweleka Sheshani, na Sheshani tsakamweleka Alai.

32 Yada, ndughu yake Shamai, tsakana wana weli, Yeteri na Yonatani. Lekeni Yeteri tsakafa bila kweleka iwana. 33 Yonatani tsakana wana weli: Peleti na Zaza. Wose awo tsamweleko ghwa Yerameeli. 34 Sheshani tsakahela wana wamale ila tsakana wana mapinga waliyeka. Lekeni tsakana mtumwa Mmisri, taghwa lyake Yariha. 35 Apfo Sheshani kamwing'a Yariha mtumwa wake, neghe wake yumwe yamkwele, naye tsakamwelekela mwana taghwa lyake Atai. 36 Atai tsakamweleka Natani, na Natani tsakamweleka Zabadi. 37 Zabadi tsakamweleka Efulali, Efulali tsakamweleka Obedi. 38 Obedi tsakamweleka Yehu, naye Yehu tsakamweleka Azariya. 39 Azariya tsakamweleka Helesi, naye Helesi tsakamweleka Eleasa. 40 Eleasa tsakamweleka Sisimai, na Sisimai tsakamweleka Shalumu. 41 Shalumu tsakamweleka Yekamia, na Yekamia tsakamweleka Elishama.

42 Imwana chaudele wa Kalebu na ndughu yake Yerameeli tsakakemighwa Mesha. Mesha tsakamweleka Zifu, naye Zifu tsakamweleka Maresha, na Maresha tsakamweleka Hebroni.* 43 Hebroni tsakana wana wane, Kora, Tapua, Rekemu na Shema. 44 Shema tsakamweleka Rahamu, naye Rahamu tsakamweleka Yorikeamu. Rekemu ndughu yake Shema tsakamweleka Shamai. 45 Shamai tsakamweleka Maoni, na Maoni tsakamweleka Betisuri. 46 Kalebu tsakana pinga mdodo, taghwa lyake Efa. Naye kamwelekela Kalebu wana wadatu: Harani, Moza na Gazezi. Harani naye keleka mwana iyamkemile Gazezi.

47 Yadai tsakana wana sita: Regemu, Yotamu, Geshani, Peleti, Efa na Shaafu.

48 Kalebu tsakana pinga yungi mdodo taghwa lyake Maaka. Naye kamwelekela wana weli, Sheberi na Tirihana.

49 Maaka tsakamwelekela Kalebu iwana, iwana awo tsa Shaafu iyanduse ghumji ghwa Madimana, na yungi tsa Sheva, iyanduse ghumji ghwa Makibena na Gibea. Pfipfila Kalebu tsakana mwana pinga, taghwa lyake Akisa.

50 Kalebu pfipfila tsakana wana wangi kwa mwehe wake Efurata. Huri, imwanaghe chaudele, naye tsakana wana wadatu wamale, imwanaghe chaudele tsakakemighwa Shobali, iyanduse ghumji ghwa Kiriati Yearimu, 51 wa kabili tsakakemighwa Salima, iyanduse ghumji ghwa Betilehemu, na wa kadatu tsakakemighwa Herefu, iyanduse ghumji ghwa Beti Gaderi. 52 Na Shobali, iyanduse ghumji ghwa Kiriati Yearimu, pfipfila tsa sekulu wawo iwanu wa Haroe, na inusu ya wenye kaye wa ghumji ghwa Menuhoti, 53 hamwe na kolo atsino itsikalile Kiriati Yearimu, Waitiri, Waputi, Washumati na Wamishirai. Wazorati na Waeshtaoli tsawalawa mna tsikolo atso.

54 Salima, tsa sekulu wawo Wabetilehemu, Wanetofati na Waatroti Beti Yoabu na inusu ya Wamenahati iwo Wasori.

55 Tsikolo tsawalawile iwanu iwakwandika itsikalile mna ghumji ghwa Yabesi tsa atsino: Watirati, Washimeati na Wasukati. Awo wawo Wakeni, iwanu iwalawile mna mweleko ghwa Hamati, iyanduse ghumji ghwa Beti Rekabu.