1 Awano iwo iwamale iwamghendele Daudi ako Sikilagi, kwayepfisile kwa ukumpfuka mfalume Shauli, imwana wa Kishi. Awano tsa maasikali iwadahile ukwitowa ghoya iwamwapfile Daudi mng'ondo. 2 Iwanu awo wang'ali wolawila mna lukolo lwa Benjamini, lukolo lwayolawa Shauli. Awano tsawadaha pfinoghile kwasa tsiminde, na tsawadaha ukwasa ing'umbewe kwa ghumoko ghwa kujilo na kumoso. 3 Mkulu wawo tsakakemighwa Aiseri, na wakeli Yoashi, wose wano weli tsa iwana wa Shemaa kulawa Gibea, wamwenga tsa Yesieli na Peleti iwanaghe Asimaweti, na Beraka na Yehu iwolawila Anatoti. 4 Ishimaya kulawa Gibeoni, imunu yane ngupfu kulawa mna wala salasini na iyawile chilongotsi wawo, hamwe na Yeremia, Yahasieli, Yohanani na Yosabadi kulawa Gedera, 5 Elusai, Yeremoti, Bealia, na Shemaria, Shefatia kulawa Harufi 6 Elikana, Ishia, Asareli, Yoeseri na Yoshobeamu kulawa lukolo lwa Kora, 7 na Yoela, Sebadia, iwanaghe Yerohamu iyolawila Gedori.

8 Kuya iwanu kulawa likabila lya Gadi, tsawamuwinza Daudi akula kwayepfisile kunyika. Awano tsa maasikali iwane ngupfu na iwadahile ukukinda ingawo na ukwasa imighoha. Na pfihanga pfawo pfing'ali pfikoneka ka pfa simba, na wang'ali wotsuma ka dondolo mpfidunda. 9 Mkulu wawo tsa Ezeri, wa keli Obadia, na wa kadatu Eliabu, 10 wa kane Mishimana na wa tano Yeremia, 11 wa sita tsa Atai na wa saba Elieli, 12 wa nane tsa Yohanani na wa tisa Elisabadi, 13 wa kumi tsa Yeremia na wa kumi na imwe tsa Makibanai. 14 Iwanu awano wa likabila lya Gadi tsa pfilongotsi wa maasikali. Chilongotsi iyali mdodo ghendo tsakalongotsa wanu miya imwe, na iyali mkulu tsakalongotsa iwanu elufu imwe 15 Awano iwo iwanu awala iwalokile ghumto Yoridani mna ghumwetsi ghwa mwanduso, ghumto haghumemile kumwambu na kumwambu, iwanu awano wawawinga iwanu wose iwakalile mlwanda watsumile mashaliki na maghalibi mwa ghumto.

16 Iwanu wamwenga kulawa kabila lya Benjamini na lya Yuda tsawapfika kuna ingome akula kwayepfisile Daudi. 17 Daudi tsakalawa kunze kuwabokela, kawalongela, "Ka mnitsila ka sale tsangu ukunyapfila nowabokela kwa ghumoyo ghose, lekeni ka mtsa mnibiduke kwa awala iwonyihila wangoghe, hata ka sitendile baye chinu chochose chihile, Imulungu wa iwahenga wetu yone na yawamanile." 18 Baho Ghumuhe kamuhulumkila Amasai, mkulu wa iwanu awala selasini, kalonga, "Twetwe twa iwanu wako ghwe Daudi, twa chinu chimwe, ghweghwe mwana wa Yese! Ghweghwe kutsohuma ghendo, na imunu wowose iyokwapfila naye katsohuma! Kwaapfila iyokwapfila ghweghwe yuyo Imulungu wako." Baho Daudi, kawabokela na kawatenda wawe pfilongotsi mna maasikali wake.

19 Maasikali wamwega wa likabila lya Manase tsawatsuma welunga na Daudi, ahala hayokile na Wafilisti waghende waketowe na mfalume Shauli. Lekeni Daudi na iwanu wake ng'awawapfile baye Wafilisti. Apfo wakulu wa Wafilisti tsawalamla wamuwinge Daudi yoye Sikilagi, walonga, "Twitsehonza wenyegho tufe kwaapfila ayuno katsotubiduka na katsakuya kwa imkulu wake Shauli." 20 Daudi hayang'ali yakuya Sikilagi, iwanu wa likabila lya Manase tsawamghendela. Iwanu awo tsa, Adina na Yosabadi, Yediedi, Mikaeli, Yosabadi, Elihu na Siletai. Chila munu mna iwanu awano tsa chilongotsi wa maasikali elufu imwe mna likabila lya Manase. 21 Iwanu awo tsawamwapfila Daudi ukwitowa na makingili gha iwanu iwabamile kumpfamila, kwaapfila iwamale awo tsa wanu iwadahile ukwitowa ghoya. 22 Chila litsuwa iwanu tsawaghenda kumwapfila Daudi mbaka kawa na masikali wengi ka masikali we Imulungu.

23 Awano ahano iwo maasikali iwakindile tsisilaha iwamghendele Daudi ako Heburoni. Tsawaghenda wamboka Sauli ufalume na wamwing'a Daudi, ka apfila IMNDEWA pfayalongile. 24 Kulawa mna likabila lya Yuda iwakindile mighoha na ngawo kwa kughenda kwitowa, tsa elufu sita na miya nane. 25 Kulawa mna likabila lya Simeoni, tsa maasikali elufu saba na mia imwe, wose tsawadaha ukwitowa pfinoghile kung'ondo. 26 Kulawa kabila lya Lawi, tsawaghenda wanu maasikali elufu nne na miya sita. 27 Tsawaghenda hamwe na Yehoyada, imkulu wa ikaye ya Aruni, iyakalile na iwanu wake elufu tatu na miya saba. 28 Kulawa mna ikaye ya Sadoki, msongolo iyadahile ukwitowa mng'ondo, yeye tsakaghenda na pfilongotsi wa maasikali ishilini na weli iwolawa mna lukolo lwa aba wake mwenyegho. 29 Kulawa kabila lya Benjamini, kabila lyake Shauli iwanu elufu ndatu. Iwanu wengi tsawaghendelela na wawa chinu chimwe kuna ikaye ya Shauli. 30 Kulawa likabila lya Efuraimu, tsawaghenda maasikali elufu ishilini na miya nane iwadahile ukwitowa kung'ondo, na chila yumwe tsakatogholighwa mna lukolo lwake. 31 Kulawa mna inusu ya likabila lya Manase, maasikali elufu kumi na nane iwakemighwe kwa ghamataghwa waghende kumwika Daudi yawe mfalume. 32 Kulawa likabila lya Isakari, tsawaghenda wakulu miya mbili hamwe na ndughu tsawo iwawalongotse. Iwakulu awo tsawamanya matsuwa ghachi ghanogha na ghachi gheha na tsawamanya choni ichibamighwa Waisiraeli watende. 33 Pfipfila tsawaghenda wanu elufu hamsini kulawa likabila lya Zabuloni, wose tsawadaha ukwitowa kung'ondo. Tsawabapa tsisilaha tsose tsa ukumwapfila Daudi. 34 Kulawa kabila lya Nafutari wakulu elufu imwe hamwe na maasikali elufu ndatu miya saba iwakindile mighoha na tsingawo. 35 Kulawa kabila lya Dani, maasikali elufu ishilini na nane na miya sita iwakindile tsisilaha tsawakala ghoya ukwitowa kung'ondo. 36 Kulawa likabila lya Asheri, maasikali alufu alubaini iwadahile ukwitowa kung'ondo, wose tsawakala ghoya kwa ukwitowa. 37 Kulawa makabila gha Warubeni, Wagadi na inusu ingi ya likabila lya Manase iwakalile mashaliki mwa ghumto Yoridani, maasikali laki imwe na ishilini iwakindile chila silaha tsawakala ghoya kwa kughenda kung'ondo.

38 Maasikali wose awo, tsawelapfa wenyegho waketowe kung'ondo, tsawaghenda Heburoni, nawo tsawabama ghendo kumtenda Daudi yawe mfalume wa Isiraeli yose. Nawo waisiraeli wose tsawalangula chinu chimwe cha ukumtenda Daudi yawe mfalume wawo. 39 Iwanu awano wakala na Daudi matsuwa madatu, aku wakuja na ukunwa, kwaapfila ndughu tsawo ma tsawawambikila ipfijo. 40 Pfipfila ndughu tsawo iwokala habehi na awala iwokala kutali ka ako Isakari, Zaburoni na Nafutari, tsawawaghalila ipfijo ipfidutighwe na pfihongwe, ngamiya, pfihongwe falasi na ng'ombe. Tsawawaghalila usaghe, pfighate pfa tini, nzabibu itsisakale, dipfai na ghamapfuta, wang'ombe na wang'olo wengi, tsakuna ipfijo bwelele, kwaapfila iwanu wang'ali wodeng'elela mna si yose ya Isiraeli.