1 Kuya Daudi kawakema wakulu wose wa Waisiraeli wetingane Yerusalemu. Apfo iwakulu wose wa ghamakabila, na wakulu wose wa masikali iwamsang'anile mfalume, na wakulu wemilile maasikali elufu elufu, na awala iwakulu wemilile maasikali miya miya, na iwakulu wose iwemilile tsimali na iwanyama wa mfalume, na iwanaghe hamwe na iwakulu wose iwemilile ing'anda ya chifalume, na maasikali wose wana ingupfu na awala iwadahile ghoya ukwitowa tsawetingana ako Yerusalemu. 2 Mfalume Daudi tsakenuka, kalonga, "Mnihulikitse mwemwe ndughu tsangu na iwanu wangu, nene tsanibama ghendo mmoyo mwangu ukulitsengela ing'anda lisanduku lya laghano lye IMNDEWA ili likaleghe mumo na ili twetwe tughendeghe tukamtambikile IMNDEWA, Imulungu wetu. Apfo tsanyika ghoya ipfinu pfa ukutsengela ing'anda ayo. 3 Lekeni Imulungu tsakanongela, ‘Ghweghwe ng'utsolitsengela baye ing'anda litaghwa lyangu, kwaapfila ghweghwe kwa imunu wa ng'ondo, naghwe konung'a tsidamu tse wanu.’ 4 Lekeni IMNDEWA, Imulungu wa Isiraeli tsakanisaghula nene kulawa mna ikaye yose ya aba wangu niwe mfalume wa Isiraeli wa ghamatsuwa ghose. Kalisaghula likabila lya Yuda lilongotse, na kulawa mna likabila lilyo lya Yuda, kaisaghula ikaye ya aba wangu, na kulawa mna iwana wa aba wangu, yeye kona pfinogha kunyika nene niwe mfalume wa Isiraeli yose. 5 IMNDEWA tsakangaya ghendo iwana wengi, na kulawa mna iwana awo wose, yeye tsakamsaghula Selemani yakale mna ichighoda cha ufalume cha MNDEWA, yailongotse Isiraeli. 6 Kanongela, ‘Selemani mwanagho yuyo iyatsonitsengela ing'anda na tsiluwa tsangu, kwaapfila tsanimsaghula yawe mwanangu na nene nitsakuwa aba wake. 7 Nitsowika ufalume wake wime ghoya mna ghamatsuwa ghose, ka yang'aghendelela kughakinda ghamalaghitsa ghangu na imiko yangu ka pfayokinda leloli.’ 8 Apfo nowalaghitsa hambele he Waisiraeli wose, na hambele ha mtingano wa IMNDEWA, aku naye Imulungu wetu kohulika, mwalangitse kughakinda malaghitso ghose gha IMNDEWA, Imulungu wenu ili isi aino inoghile iwe yenu, kuya muwalekele iwana wenu iwe yawo ghamatsuwa ghose. 9 Naghwe Selemani mwanangu, ummanye Imulungu wa aba wako, umtumikile kwa ghumoyo ghwako ghose, na kwa mbutsi tsako tsose, kwaapfila IMNDEWA koilolesa mimoyo yose, na koghamanya ghayakwalangula na ghayobama kutenda imunu, ung'ambama kutsomwona, lekeni ung'amleka, yeye katsokulema matsuwa ghose. 10 Lelo walangitse kwaapfila IMNDEWA kakusaghula ghweghwe uitsenge ing'anda yenzeluke, lelo ugangamale utende isang'ano ayo."

11 Kuya Daudi kamwing'a Selemani imwanaghe lamani ya ichikuta cha ing'anda ya Imulungu na pfiheleto pfake, na hatsina tsake na gholofa tsake na pfiheleto pfake pfa mghati, na Hanu haenzeluke ng'ani. 12 Tsakamwing'a aghala ghose ighekighwe na Ghumuhe mmoyo mwake apfila ing'anda pfaitsakuwa, kwa ipfikuta pfa ing'anda na pfiheleto pfose ipfitsunguluke, kwa hatsina tsa ing'anda ya Imulungu, na kwa hatsina tse ipfinu ipfikighwe pfiwe pfa IMNDEWA. 13 Kuya mfalume kamlaghitsa Selemani mna ukuwagholela Watambika na Walawi tsing'onde, na sang'ano tsose tsili mna ing'anda ya IMNDEWA, na walolese ipfinu pfose ipfitumika mna tsisang'ano tse ing'anda ye Imulungu. 14 Kuya Daudi kamwing'a inzahabu na fetsa ibamighwa kufinila ipfinu ipfitumika mna chila sang'ano ya ing'anda ya Imulungu, 15 nzahahabu ibamighwa ya kufinila pfighutso pfa nzahabu, na pfitasa pfake na pfetsa ibamighwa kutengenetsela pfigutso na pfitasa pfake, kwa kulola chila chigutso pfachitumika, 16 na nzahabu tsa ukutengenetsa imetsa ya pfighate ilapfighwe kwa Imulungu, na fetsa ya ukutengenetsela metsa tsa fetsa, 17 na nzahabu inoghile itengenetsele tsiuma na ghamabakuli, na ipfikombe, na kalapfa nzahabu inoghile na fetsa itengenetsele ghamabakuli gha nzahabu na gha fetsa, 18 pfipfila kalapfa inzahabu inoghile ibamighwa kutenengenetsela hanu ha ukupfukitsila ubani. Pfipfila kamwing'a lilumbo lya chighubiko cha nzahabu chine wasenga wa kulanga iwatandatse ghamabawa ghawo kughubika lisanduku lya laghano lya IMNDEWA. 19 Aghano ghose ighali mna ilamani ino tsanighandika aku IMNDEWA Imulungu konyapfila, naye kanenda nimanye chila chinu ichibamighwa kutendeka mna ilamani ino. 20 Kuya mfalume Daudi kamlongela Selemani imwanaghe, "Ugangamale, wikinde, uleke kupfuka wala kutenyuka, kwaapfila IMNDEWA Imulungu, iyali Imulungu wangu ka hamwe naghwe. Yeye ng'atsokuleka baye, lekeni katsokala hamwe naghwe mbaka hatsitsomala sang'ano tsose tsa ing'anda ya Imulungu. 21 Watambika na Walawi wawo wagholelighwa tsing'onde tsa ukutenda mna ing'anda ya Imulungu. Chila munu iyakubuhu mna chila ng'onde katselapfa mwenyegho yakwapfile na wanu wose hamwe na pfilongotsi wawo watsotegheletsa chila laghitso lyauweng'a."