1 Rubeni tsa mwana chaudele wa Isiraeli. Lelo yang'eng'ighwe aghala ighobamighwa ukwing'ighwa mwana chaudele. Lekeni Rubeni tsakawasa na pinga wa kunze wa aba wake. Apfo aghala ighabamighwe ukwing'ighwa keng'ighwa mdodo wake Yosefu. Na mna ilukolo lwao Rubeni ng'otangika baye ka mwana chaudele, ka pfawali iwana chaudele wangi. 2 Hata ka Yuda yuyo iyakalile na ingupfu kubita wayaghe, na iwatawala tsawalawa mna ilukolo alwo, aghala ghabamighwe ukwing'ighwa mwana chaudele tsakeng'ighwa Yosefu. 3 Awano wawo iwana wa Rubeni, imwana chaudele wa Isiraeli: Hanoki, Palu, Hesironi na Karimi.

4 Watsukulu wa Yoeli wawo awano: Yoeli, Shemeya, Gogi, Shimei, 5 Mika, Reaya, Baali, 6 Beera hayawile chilongotsi wa Warubeni tsakamghogha Tigilati Pileseri mfalume wa Ashuru, kamghala kuna isi ya utumwa.

7 Iwakulu awano wa tsikolo tsawandikighwa kwa kulola tsikolo tsawo mna likabila lya Rubeni: Yeieli, Zakaria, 8 Bela, mwana wa Azazi na mtsukulu wa Shema, wa lukolo lwa Yoeli, ilukalile mna ghumji ghwa Aroeri mbaka Nebo na isi yose ubali wa kasikazini mbaka Bela na Baali Meoni. 9 Pfipfila kwaapfila wanyama wawo tsawongetseka sideke kuna isi ya Gileadi, tsawenela mbaka kwayandusile inyika iyenele mbaka kuna ghumto Efurate.

10 Mna ghamatsuwa gha mfalume Sauli, iwanu wa likabila lya Rubeni wandusa ukwitowa na Wahajiri, wawakoma na waisola isi yawo yose ubali wa mashaliki wa Gileadi, kuya wakala amwo.

11 Ubali wa kasikazini likabila lya Gadi tsalibakana na likabila lya Rubeni mna isi ya Bashani iyenele mashaliki mbaka Saleka. 12 Yoeli yuyo imkulu wawo, na wa keli Shafamu. Naye Yanai na Shefati tsawalongotsa kolo tsingi ako Bashani. 13 Awano wawo ndughu tsawo saba kwa ukulola tsikolo tsawo pfatsili: Mikaeli, Meshulamu, Sheba, Yorai, Yakani, Zia na Eberi. 14 Wose awano tsa wana wa Abihaili, iyakalile mwana wa Huri. Huri tsa mwana wa Yaroa, Yaroa tsa mwana wa Gileadi, Gileadi tsa mwana wa Mikaeli, naye Mikaeli tsa mwana wa Yeshishai, naye Yeshishai tsa mwana wa Yado, naye Yado tsa mwana wa Buzi. 15 Ahi tsamwana wa Abidieli, na mtsukulu wa Guni, yeye tsamkulu wa tsikolo atsino. 16 Iwanu wa Gadi tsawakala Gileadi, ako Bashani na mna ipfijiji pfake, na mna imighunda yose ya ukudimila iwanyama ako Sharoni, mbaka kuna imibaka. 17 Iwanu awo wose tsawandikighwa mna ipfitabu pfa tsikolo, ahala Yotamu mfalume wa Yuda na Yeroboamu mfalume wa Isiraeli hawatawale.

18 Ghamakabila gha Rubeni, Gadi na nusu ya Manase gha ubali wa mashaliki, tsawana iwanu iwadahile ukwitowa pfinoghile mng'ondo iwopfika elufu alubaini na wane na miya saba na sitini, iwatumile tsingawo na ghamapanga, iwadahile kwitowa pfinoghile kwa tsiminde kung'ondo. 19 Tsawetowa na wanu wa lukolo lwa Wahajiri, Yeturi, Nafishi na Nodabu. 20 Tsawamlomba Imulungu, naye kawedika kwaapfila tsawamlolela yeye. Apfo wawatowa Wahajiri hamwe na sale tsawo. 21 Tsawawaboka ngamiya elufu hamsini, wang'olo laki mbili na elufu hamsini, pfihongwe elufu mbili, na wawaghogha wanu wagima laki imwe. 22 Tsawawakoma maaduwi wengi sideke kwaapfila mna ing'ondo ayo Imulungu tsakawapfila. Nawo tsawaghendelela kukala mna isi ayo mbaka chipindi cha ghumuhamo.

23 Inusu ya iwanu wa likabila lya Manase wa mashaliki tsawakala mna isi ya Bashani. Tsawongetseka ng'ani, tsawenela kasikazini mwa Baali Herimoni, na kasikazini mwa Seniri na chidunda cha Herimoni. 24 Awano wawo iwakulu wa tsikolo tsa ghamakabila agho: Eferi, Ishi, Elieli, Azirieli, Yeremia, Hodavia na Yadieli. Iwakulu wose awano tsa maasikali iwadahile ukwitowa pfinoghile kung'ondo na pfilongotsi iwomanyika ng'ani mna tsikolo tsawo.

25 Lekeni iwanu tsawamleka Imulungu wa sekulu tsawo, tsawamleka Imulungu kwa kuitambikila milungu ya iwanu wa isi atso itsihinyighwe na Imulungu hambele hawo. 26 Apfo, Imulungu wa Isiraeli tsakamsongeletsa Pulu, mfalume wa Ashuru, pfipfila iyomanyika ka Tigilasi Pileseri, kaipfingilila isi yawo na kuwaghogha Warubeni awo, Wagadi na inusu ya likabila lya Manase lya ubali wa mashaliki, na kawaghala ako Hala, Habori, Hara, na kuna ghumto Gozani, nawo wokala ako mbaka leloli.