1 Hambele chidogho, Nahashi mfalume wa Waamoni tsakafa, naye Hanunu imwanaghe kawa mfalume hanu ha aba wake. 2 Daudi tsakalonga, "Nitsomtendela ghanoghile Hanunu mwana wa Nahashi, kwaapfila aba wake tsakanendela ighanoghile." Apfo Daudi kawatuma iwanu wakamkanze Hanuni kwa ukufa kwa aba wake. Iwanu wa Daudi hawapfikile kwa Hanuni mna isi ya Waamoni wakamkanze, 3 wakulu wa Waamoni wamlongela mfalume Hanuni, "Apfi koghamba Daudi komnoghela aba wako mbaka kawaghala iwanu watse wakukanze? Iwanu awano ng'awatumighwe baye kuipelemba isi ili waihinye?" 4 Apfo Hanuni kawaghogha iwanu awo wa Daudi, kawagheta tsindepfu tsawo, na kaghaghana maghwanda ghawo hane ghamadako, kuya kawaleka woke. 5 Munu yumwe kamghendela Daudi kamlongela achila chawatendelighwe iwanu wake, baho Daudi kawatuma iwanu waghende wakatingane nawo, kwaapfila tsawaghelighwa chinyala ghendo. Mfalume Daudi kawalongela, "Mkale Yeriko mbaka ndepfu tsenu tsote keli, kuya muye." 6 Waamoni hawonile ka ichinu acho chimdesa mfalume Daudi, Hanuni na Waamoni wawatuma iwanu wawo aku waweng'a kilo elufu salasini na nne tsa fetsa, wakodi imituka na iwanu iwakwendesa mituka ayo kulawa Mesopotamia na Maaka na kulawa Soba. 7 Tsawakodi mituka ya ukukweghighwa elufu selasini na mbili na wamsola mfalume wa Maaka na maasikali wake, watsa kukala habehi na Medeba. Waamoni walawa mna imiji yawo yose, watsa kwitowa. 8 Naye Daudi hayahulike apfo, kamtuma Yoabu na maasikali wose. 9 Waamoni tsawalawa wakala mna misululu hane lilango lya ukwingililila mna ghumji ghwao, aku iwafalume awala iwatsile tsawakala waliyeka hane ichiwala. 10 Yoabu hayonile ka kuna maaduwi wema misululu hambele na kuchughu, kawasaghula maasikali iwadahile ukwitowa mna Isiraeli, kaweka weme hanu hao kwa ukuwatowa Waaramu. 11 Kuya maasikali iwasighale kawaleka kwa ndughu yake Abishai yawalongotse, nawo pfipfila tsawakala kwa ukuwatowa Waamoni. 12 Yoabu kalonga, "Ka Waaramu wonitowa, mwemwe mtse mnyapfile na ka Waamoni womtowani, twetwe twakutsa kumwapfilani. 13 Mgangamale na twitowe ka walume, tuwakinge iwanu wetu na imiji ya Imulungu wetu. Naye IMNDEWA katsotenda achila chayakona chinogha hambele hake." 14 Kuya Yoabu na maasikali wake tsawasoghela hambele waketowe na Waaramu, baho nawo tsawatsuma. 15 Waamoni hawonile Waaramu wotsuma, nawo pfipfila watsuma hambele ha Abishai, ndughu yake Yoabu, watsumila mghati mwa ghumji. Kuya Yoabu koya Yerusalemu. 16 Lekeni Waaramu hawonile ka watowighwa na Waisiraeli, wawatuma iwanu waghende wakawaghale Waaramu wangi iwakalile kumwambu mwa ghumto, iwalongotsighwe na Shofaki, mkulu wa maasikali wa Hadadeseri. 17 Daudi hayahulike mbuli ayo, kawakema hamwe maasikali wose wa Isiraeli, kuya waloka ghumto Yoridani, kawaghendela na kaweka maasikali weme mna misululu kwa ukuwatowa Waaramu. 18 Lekeni Waaramu tsawatsuma hambele ha Waisiraeli, naye Daudi kawakoma iwanu iwakwendesa imituka ya ukukweghighwa na falasi elufu saba na masikali iwoghenda kwa maghulu elufu alubaini. Kuya tsakamkoma Shofaki, mkulu wawo. 19 Watumwa wa Hadadezeri hawonile Waisiraeli wawatowa, baho wepatana na Daudi, na wawa watumwa wake. Kulawa baho Waaramu ng'awatoghole keli baye kuwapfila Waamoni.