1 Kuya walingitsa lisanduku lye Imulungu walika mghati mwa lihema lyatsengile Daudi: walapfa nambiko tsa ukulakatsighwa na nambiko tsa ukukala tseghamba. 2 Daudi hayamalitse kulapfa nambiko atso tsa ukulakatsighwa na tsa ukalala tseghamba na kawabaliki iwanu kwa taghwa lya IMNDEWA. 3 Kuya kawagholela Waisiraeli wose, wamale na wapinga, chila munu keng'ighwa chighate na tomo limwe lya nyama na chighate cha nzabibu. 4 Daudi tsakawasaghula Walawi wamwenga wemeghe hambele ha lisanduku lya IMNDEWA, wawalongotse iwanu mna ukulonga mighede na mna ukumwimbila IMNDEWA, Imulungu wa Isiraeli. 5 Tsakamsaghula Asafu yawe chilongotsi wawo, aku Sakaria komwapfila. Yeieli, Shemiramothi, Yehieli, Matithiya, Eliabu, Benaya, Obedi Edomu, Yeieli. Tsakawasaghua watowe pfing'wengwe na pfilimba aku Asafu yeye tsakatoa matoatsi. 6 Nawo iwatambika tsina Benania na Yoharieli, tsawasaghulighwa watowe malati hambele ha lisanduku lya laghano lye Imulungu. 7 Apfo mna litsuwa alyo Daudi tsakanza kuwalaghitsa Asafu na weyaghe wembe wila wa kulonga mighede kwa IMNDEWA.

8 Mlonge mighede kwa Imulungu,

muwalongele iwanu ukulu wake,

mtsilongele isi tsose ghayatendile Imulungu!

9 Mumdeng'elele,

mmwimbile wila tsa kumtogola Imulungu;

muwapetele iwanu ghamatendo ghake ighokangawatsa.

10 Mwighodele taghwa lyake lyehenzeluke.

Awala iwompfuka Imulungu walekeni wadeng'elele.

11 Mghendeleni IMNDEWA yane ngupfu;

Muubame uhanga wake ghamatsuwa ghose.

12 Mkumbuke ipfinu pfakukangawatsa pfayafendile,

pfihulo pfake na ukuhigha kwake kwayalongile,

13 Mwemwe watsukulu wa Isiraeli, mtumwa wake.

Mwemwe iwana wa Yakobu, wasaghulighwa wake.

14 Yeye yuyo IMNDEWA, Imulungu wetu;

ukuhigha kwake kumanyika muisi mwose.

15 Yeye ng'esemwa baye laghano lyake lyayekile,

kotenda aghala ghayalaghitse mna pfeleko elufu imwe.

16 Kokinda laghano lyayekile na Abrahamu,

na kwilaha kwayelahile na Isaka.

17 Laghano alyo tsakeka na Yakobu liwe laghitso,

tsakeka na Isiraeli likale ghamatsuwa ghose.

18 Kalonga; "Nitsomwing'ani isi ya Kanani,

nayo itsakuwa yenu wenyegho."

19 Mwemwe tsamwachidogho,

ona tsamwachidogho ghendo,

na wagheni mna isi ayo ya Kanani.

20 Mng'ali mkwanga kwanga kulawa isi aino mbaka isi aila,

kulawa ufalume umwe mbaka ufalume ungi.

21 Ng'amlekile baye imunu wowose yawonele;

kwa ukuwakinga wawo, Imulungu tsakawamanila iwafalume;

22 Kalonga, "Mleke kuwadolitsa iwanu wangu yaniwasaghule;

mleke kuwalagha manabii tsangu."

23 Isi yose imwimbile IMNDEWA,

chila litsuwa muwalongele iwanu ka yeye katukombola.

24 Muwalongele wanu we isi tsingi ukulu wake,

muwalongele iwanu wose ipfinu pfayatendile pfakukangawatsa.

25 Kwaapfila IMNDEWA kamkulu, kotunyighwa ng'ani,

yeye wakupfukighwa kubita milungu yose.

26 Kwaapfila milungu yose ye isi tsingi si chinu baye;

lekeni IMNDEWA tsakalumba kulanga.

27 Utunitso na ukulu pfimtsunguluka yeye,

tsingupfu na ukudeng'elela kumema mna ing'anda yake.

28 Mmuhulikitse IMNDEWA Imulungu, mwemwe wanu wa isi tsose,

ulongeni ukulu wake na ghupfu tsake.

29 Mmwing'e IMNDEWA Imulungu ukulu wa taghwa lyake,

mghale nambiko, mwingile mng'anda mwake.

Mumtamanile IMNDEWA Imulungu hanu hake haenzeluka,

30 udedeme hambele hake, ghwe isi yose!

Yeye kaikindilisa isi yose, ng'aihighisika baye.

31 Mdeng'elele mwemwe imli kulanga na muisi!

Mtsilongele tsiisi ka IMNDEWA kotawala!

32 Ibahali na ipfume, hamwe na pfose ipfili mumo!

Mdeng'elele mwemwe imighunda na pfose ipfili mumo;

33 Baho mibiki yose ye kubagho itsakwimba kwa ukudeng'elela,

itsakwimba hambele ha IMNDEWA,

kwaapfila Yeye katsakutsa kuihigha isi

34 Mlonge mighede kwa IMNDEWA,

kwaaapfila yeye kanogha

kotukunda ghamatsuwa ghose!

35 Mumlongele Imulungu apfino;

"Utukombole, ghwe Imulungu wa mkombola wetu;

Utwike hamwe na ukutukombola kulawa mna isi tsingi,

na tulitunye taghwa lyako lihenzeluke,

tudeng'elele mna utunitso wako."

36 Yatunyighwe IMNDEWA, Imulungu wa Isiraeli,

kulawa sambi na ghamatsuwa ghose.

Kuya iwanu wose walonga, "Ona!" Kuya wamtunitsa IMNDEWA Imulungu.

37 Mfalume Daudi kaweka Asafu na ndughu tsake hanu halikalile lisanduku lya laghano lya IMNDEWA, watende chila ng'onde ibamighwa kutendighwa chila litsuwa. 38 Pfipfila tsakamwika Obedi Edomu, hamwe na weyaghe sitini na nane wasang'ane hamwe. Obedi Edomu mwana wa Yeduthuni na Hosa tsawakalitsi wa imibani. 39 Mfalume Daudi tsakaweka mtambika Sadoki, na watambika weyaghe wasang'ane hambele ha hema lye IMNDEWA ilikalile hanu aho ha ukutambilkila ako Gibeoni, 40 wamlapfileghe IMNDEWA nambiko tsa kulakatsighwa mchanya mwa imatsabahu ayo, chila nemitondo na chila nemihe, ka apfila chila chinu ichili mna ghamalaghitso gha Imulungu ghayawalaghitse Waisiraeli pfagholonga. 41 Hamwe nawo, tsawa baho tsina Hemani na Yeduthuni na awala wose iwasaghulighwe kwa mataghwa ghawo, wamwimbileghe wila wa mighende IMNDEWA, kwaapfila kowakunda iwanu wake ghamatsuwa ghose. 42 Hanami na Yedutuni tsaweng'ighwa ing'onde ya ukwimila tsimalati na matoasi na chila chinu chukwimbila ahala wamwenga hawembile wila wa tsa ukulonga mighede kwa Imulungu. Wana wa Yedutuni tsawasaghuliwa wakalitse ghamalango. 43 Kuya chila munu koka ukae yake. Naye Daudi tsakoka ukaye yake kuwabaliki iwanu wa ikaye yake.