1 Daudi tsakalonga na pfilongotsi wake, awala iwolongotsa wanu elufu elufu, na awala iwolongotsa wanu miya miya. 2 Kuya kawalongela Waisiraeli wose iwatingane hamwe, "Ka mwakona pfinogha, naye IMNDEWA, Imulungu wetu, ka kakona pfinogha, leka tuwatume iwanu waghende wakawakeme ndughu tsetu, iwali habehi na iwali kutali, watuwalekile mna isi yose ya Isiraeli, pfipfila wakatukemele iwatambika na Walawi iwokala mna imiji yawo na iwokala mna imighunda yawo yakudimila, watse wakale na twetwe. 3 Kuya tughende tukasole lisanduku lya laghano lye Imulungu wetu, kwaapfila ng'atulilalangitse baye mna ghamatsuwa gha mfalume Shauli." 4 Iwanu wose watoghola achila chayalongile Daudi kwaapfila tsawayona mbuli ayo inogha. 5 Apfo Daudi tsakawakema hamwe Waisiraeli wose muisi, kulawa chikolongo cha Shihori ichili kusini mwa Misiri mbaka Lebo Hamati, wakalisole sanduku lye Imulungu kulawa Kiriati Yearimu. 6 Daudi, aku kelongotsa na Waisiraeli wose, kaghenda kuna ghumji ghwa Baala, pfipfila ghokemighwa Kiriati Yearimu, ghuli mna isi ya Yudeya, kulisola lisanduku lya Imulungu, ilikemighwa kwa taghwa lya IMNDEWA, iyokala hana ichighoda chake cha ufalume mchanya mwa ipfiumbe wane ghamabawa. 7 Apfo walisola lisanduku lye Imulungu kulawa mna ing'anda ya Abinadabu na walidinitsa mna lighadi lya sambi. Uza na Ahio tsawalilongotsa lighadi alyo. 8 Daudi na Waisiraeli wose wang'ali wopfina kwa ngupfu tsawo tsose hambele ha Imulungu. Tsawemba aku wotoa pfilimba, pfing'weng'we, pfimbeta, matowasi na malati ipfitendighwe kwa mbiki ghwa mvinje. 9 Hawapfikile kuna ichibwalu cha ukubetela ichili Kidoni iwang'ombe tsawekwala, apfo Uza tsakagholosa ghumoko ghwake yalikindilitse lisanduku lya laghano lileke kulaghala. 10 Baho IMNDEWA Imulungu kamwonela maya Uza kwa kulikindilitsa lisanduku, kamtowa Uza, na babo kafa hambele ha Imulungu. 11 Daudi tsakona maya kwaapfila IMNDEWA tsakamghudubukila Uza na kumkoma, apfo hanu aho mbaka leloli ino hokemighwa Peresi Uza. 12 Tangiya litsuwa alyo Daudi tsakampfuka Imulungu, na keghutsa, "Angu nitsodahatse kulighala lisanduku lya Imulungu ukaye yangu?" 13 Apfo Daudi ng'alighalile baye lisanduku kuna ghumji ghwa Daudi, lekeni kalighala ukaye kwa Obedi Edomu, iyolawila mna ghumji ghwa Gati. 14 Sanduku alyo lye Imulungu tsalikala ako kwa Obedi Edomu kwa miyetsi midatu, naye IMNDEWA Imulungu kaibaliki ing'anda ya Obedi Edomu na chila chinu chayali nacho.