1 Mfalume Daudi yang'ali yokala mna ing'anda yake ya chifalume, litsuwa limwe kamkema nabii Nasani, kamlongela, "Lola, nene nokala mna ing'anda inoghile iitsengighwe kwa mieletsi, lekeni lisanduku lya IMNDEWA lyokala mwihema." 2 Natani kamwidika, "Utende chochose choubama mmoyo mwako, kwaapfila Imulungu ka hamwe naghwe." 3 Lekeni chilo chichila, Imulungu kalonga na Nasani, kamlongela, 4 "Ghenda ukamlongele mtumighwa wangu Daudi, IMNDEWA kolonga pfino, ‘Ghweghwe ng'autsonitsengela baye ing'anda ya ukukala. 5 Kulawa ghamatsuwa ghala ghaniwakombole wanu wa Isiraeli kulawa Misiri mbaka leloli ino, nene sina nikale baye mna ing'anda. Tsaning'ali nikala mna lihema ling'ali lihama, kulawa hanu hamwe mbaka hanu hangi. 6 Mna ukwanga kwangu kose hamwe na wanu wa Isiraeli nene simghutsile baye mlamutsi wowose yanimlaghitse kulolesa wanu wangu, hebali ng'aunitsengele baye ing'anda ya mieletsi?’ 7 Lelo umlongele Daudi mtumighwa wangu apfino, ‘Nene IMNDEWA wa kulanga iyana ingupfu tsanilkulapfa kumghunda haung'ali udima iwang'olo, na nikusaghula ghweghwe uwe chilongotsi wa iwanu wangu Isiraeli. 8 Nene tsaniwa hamwe naghwe hohose ahala haughendile na niwakoma maadui tsako wose iwemile hambele hako. Nitsolitenda taghwa lyako lyimanyike ka iwakulu wangi wa isi. 9 Nene nitsowasaghulila wanu wangu wa Isiraeli hanu hao ha ukukala, nitsoweka wakale bila kudesighwa na munu wowose. Ne iwanu wehile ng'awatsowadununza keli baye, ka pfawalongole ukutenda, 10 Tsanitenda apfo tangiya haniwasaghule walamutsi wawalongotse iwanu wangu Isiraeli, nene nitsowatowa maadui wako wose. Pfipfila nene IMNDEWA nokulongela apfino iwatsukulu wako watsakuwa wafalume. 11 Ghamatsuwa ghako gha kuhupa haghotsopfika, naghwe hautsotsikighwa hamwe na iwabala wako, nitsomsaghula imwanagho yumwe yawe mfalume, na nene nitsoutenda ufalume wake wime ghoya. 12 Yeye yuyo yatsonitsengela nene ing'anda, na nene nitsoutenda ufalume wake ukale ghamatsuwa ghose. 13 Nene nitsakuwa aba wake, naye katsakuwa mwanangu. Nene sitsoleka baye kumkunda yeye, ka apfila pfandekile kumkunda Sauli iyakulongole. 14 Bali nitsomwika yawe mkulu mna iwanu wangu Waisiraeli na mna ufalume wangu wa ghamatsuwa ghose, na chighoda chake cha ufalume chitsakwima ghoya mna ghumatsuwa ghose.’ " 15 Nasani kamlongela Daudi chila chinu chayonile mna ghamaono ghayeng'ighwe na Imulungu.

16 Kuya mfalume Daudi kengila mghati mwa lihema Lienzeluke, na kajegha hembele ha Imulungu, kalomba, "Nene nili nani ghwe IMNDEWA Imulungu, na ing'anda yangu chinu chachi mbaka uninule apfino? 17 Hata ka alyino dodo mnange mwako, Ghwe Imulungu, pfipfila kulonga ing'anda yautsonitsengela mna ghamatsuwa ighakutsa. Kondola nene ka namunu mkulu kubita iwanu wose. 18 Nikulongele choni keli nene mtumighwa wako Daudi, kwa kunyinula apfino? Ghweghwe konimanya nene mtumighwa wako. 19 Ghwe IMNDEWA Imulungu, kunitendelela nene mtumighwa ka apfila ghumoyo ghwako pfaghubamile, kughatenda makulu ghose ghano, malaghano ghako ghose agho ghamanyike. 20 Kuduhu yungi ka ghweghwe, ghwe IMNDEWA Imulungu, na kuduhu yungi ka ghweghwe Imulungu, ka apfila pfatuhulike kwa ghamaghutwi ghetu. 21 Kuya iwanu wachi iwali muisi mwose iwodaha kwighala na iwanu wako wa Isiraeli, wane Imulungu iyaghendile kuwakombola na kuwatenda wawe wanu wake, na iyalitendile litaghwa lyake limanyike? Ghweghwe tsakutenda pfihulo na pfinu pfa ukukangawatsa kwa kuwawinga iwanu wa isi tsingi hambele ha iwanu wako yuwakombole kulawa Misiri. 22 Ghweghwe tsakuwatenda iwanu wako wa Isiraeli wawe wanu wako wa ghamatsuwa ghose, naghwe, ghwe IMNDEWA sambi kuwa Imulungu wawo. 23 Lelo ghwe IMNDEWA, utende mna ghamatsuwa ghose ighakutsa, achila chaunongele nene mtumighwa wako na iwanu wa ikaya yangu. Utende ka pfaulongile. 24 Taghwa lyako litsomanyika mna ghamatsuwa ghose, nawo iwanu watsolonga, ‘IMNDEWA yane ngupfu, Imulungu wa Isiraeli, yuyo Imulungu wa Isiraeli’ Na nene Daudi, na ukulu wako utsakwinulighwa matsuwa ghose. 25 Kwaapfila ghwe Imulungu wangu, kungubulila nene mtumighwa wako ka watsukulu wangu watsakuwa wafalume. Apfo nene mtumighwa wako nahela wogha wa kukulomba. 26 Ghwe IMNDEWA, ghweghwe kwa Imulungu! Ghweghwe kunongela nene mtumighwa wako chinu achino chinoghile ichikutsa. 27 Sambi kona pfinogha kuwabaliki watsukulu wako nene mtumighwa wako, ili wakale ghamatsuwa ghose hambele hako, kwaapfila Ghwe IMNDEWA, kuwabaliki, nawo wabalikighwa ghamatsuwa ghose."