1 Kuya Daudi kalonga, "Ing'anda ya IMNDEWA Imulungu iwe ahano, na imatsabahu ya ukulapfila tsinambiko tsa ukulakatsighwa ya wanu wa Isiraeli itsakuwa ahano."

2 Daudi tsakalaghitsa iwagheni wose iwali mna isi ya Isiraeli watingane hamwe, kulawa mna wawo kawasaghula iwanu iwadahile kusongola ghamabwe wasongole ghamabwe gha ukutsengela ing'anda ye Imulungu. 3 Kuya Daudi kalapfa ichuma bwelele iyekile, katendela misumari na bawaba tsa kuhindila mibani ye ing'anda, pfipfila tsakalapfa ishaba bwelele iyekile, nayo ng'ailingika baye. 4 Kuya tsakalapfa tsimbao tsa mieletsi bwelele, kuduhu iyodaha kutsipeta, atsila Wasidoni na Watiro tsawamghalile Daudi. 5 Daudi tsakelongela imwenyegho, "Ing'anda yatsotsenga mwanangu Selemani iwe ya IMNDEWA itsonogha ghendo na itsomanyika muisi mwose. Lekeni kwaapfila yang'ali msongolo na yang'ali kumanya pfinu pfingi, ng'apfu nimwikikile ipfinu pfa kutsengela." Apfo Daudi tsakeka ipfinu pfingi pfa ukutsengela ing'anda ye Imulungu hala ng'ana yafe. 6 Kuya Daudi kamkema Selemani imwanaghe, kamlaghitsa yamtsengele ing'anda IMNDEWA, Imulungu wa Isiraeli. 7 Daudi tsakamlongela Selemani, "Mwanangu nene tsanibama ghendo mmoyo mwangu nimtsengele ing'anda IMNDEWA, Imulungu wangu ili nilitunye taghwa lyake. 8 Lekeni mbuli ye IMNDEWA initsila, inongela, ‘Ghweghwe tsakumwagha sideke idamu muisi, kwitowa ng'ondo ng'ulu, kwaapfila ghweghwe tsakumwagha sideke idamu mna isi hambele hangu, apfo ng'autsonitsengela baye ing'anda likale taghwa lyangu. 9 Lekeni kutsopata mwana mmale, imwana ayo katsokala bila kwitowa naye katsobwihila ghendo, yeye ng'atsetowa baye na maadui tsake wose wa habehi iwomtsunguluka. Taghwa lyake katsokemighwa Selemani, kwaapfila mna ghamatsuwa ghake gha ukutawala katsowatenda Waisiraeli wakale tseghamba na wakale tulu ghendo. 10 Apfo yeye yuyo iyatsonitsengela ing'anda ili taghwa lyangu litunyighwe. Yeye katsakuwa mwanangu na nene nitsakuwa aba wake. Na lukolo lwake lutsotawala Isiraeli ghamatsuwa ghose.’ 11 Lelo mwanangu, IMNDEWA yawe naghwe ili udahe kumtsengela ing'anda IMNDEWA, Imulungu wako ka pfayakulongele umtsengele. 12 IMNDEWA yakwing'e ihekima na tsimbutsi ahala hayokwika uilongotse isi ya Isiraeli, ughakinde ghamalaghitso gha IMNDEWA, Imulungu wako. 13 Kutsobweda ung'akinda ghoya imiko na ghamalaghitso gha IMNDEWA ghayaweng'ile Waisiraeli kubitila Musa. Lelo Ugangamale na wikinde na uleke kupfuka wala kutenyuka ghumoyo. 14 Nisang'ana ng'onde ng'omu nyike ipfinu pfa ukutsengela ing'anda ye Imulungu, nyika tani elufu nne tsa nzahabu, na tani elufu alubaini tsa fetsa, na nyika ishaba na ichuma bwelele, nayo ng'aidahika baye kupetighwa. Pfipfila nyika ghamabwe na tsimbao. Naghwe kodaha ukongetsa mna apfo. 15 Kwinawo iwanu wengi wa kusang'ana, kwinawo wasongola ghamabwe, watsenga tsing'anda, wasongola mibiki na kwinawo wanu wengi iwakubuhu mna chila ng'onde, 16 kwinawo ghendo iwanu iwodaha kutenda ipfinu kulawa kuna inzahabu na fetsa na shaba na chuma. Lelo wanze isang'ano ya ukutsenga, na IMNDEWA yawe naghwe!" 17 Pfipfila Daudi tsakawalaghitsa pfilongotsi wose wa Isiraeli wamwapfile Selemani, imwanaghe, kalonga, 18 "IMNDEWA, Imulungu wenu kahamwe na mwemwe ghendo. Yeye kawatenda mkale tseghamba na iwanu iwomtsungulukani. Yeye kawaghoghela iwanu iwakalile mna isi ino, na sambi wa mmoko mwenu, wolongotsighwa na Imulungu na iwanu wake. 19 Lelo mtumikileni IMNDEWA, Imulungu wenu kwa ghumoyo ghwose. Mwanze kumtsengela IMNDEWA hanu haenzeluke, ili mwingitse lisanduku lya laghano lya IMNDEWA na ipfinu pfose ipfihenzeluke pfa Imulungu, mghati mwe ing'anda itsengighwe likale litaghwa lya IMNDEWA."