1 Kuya mfalume Hilamu wa Tiro katuma wanu waghende kwa Daudi, pfipfila kamghalila mibiki ya miyeletsi na wanu watsenga ng'anda na wasongola mibiki, wakamtsengele ing'anda ya chifalume. 2 Apfo Daudi katanga ka IMNDEWA Imulungu kamwika ghendo yeye yawe mfalume wa Isiraeli, na ufalume wake winulighwa uwe wa Isiraeli, iwali iwanu wake. 3 Ako Yerusalemu, Daudi tsakakwela mapinga wangi na keleka nawo wana wamale na iwana mapinga. 4 Aghano ghagho ghamataghwa gha iwana iyaweleke ako Yerusalemu: Shamua, Shobabu, Natani, Selemani, 5 Ibihari, Elishua, Elipeleti, 6 Noga, Nefegi, Yafia, 7 Elishama, Beeliada na Elifeleti.

8 Wafilisti hawahulike ka Daudi wambaka ghamapfuta yawe mfalume wa isi yose ya Isiraeli, wose ghendo tsawalawa waghenda kumbama. Naye Daudi hayahulike apfo, kalawa kaghenda kwitowa nawo. 9 Wafilisti tsawapfika wanza ukuwaboka ipfinu mna ulwanda lwa Refaimu. 10 Daudi kamghutsa Imulungu kalonga, "Pfihi ng'ende nikawotowe Wafilisti? Pfihi kutsongoghela na kungaya mna ghamoko ghangu?" Naye IMNDEWA kamlongela, "Ghenda nitsokughoghela na kukwing'a mna ghamoko ghako." 11 Apfo Daudi na maasikali wake waghenda ako Baali Perasimu, kuko kawatowa Wafilisti. Kuya kalonga, "Imulungu kabita haghati ghati kwa ngupfu na kawatowa maadui tsangu kwa ghumoko ghwangu, ka ghamatsi ighakimighwe pfaghokina." Apfo hanu aho hakemighwa Baali Perasimu. 12 Wafilisti hawatsumile, tsawaleka pfinyagho pfa imilungu yawo, naye Daudi kalaghitsa pfose pfilakatsighwe mmoto. 13 Lekeni hambele Wafilisti wanza keli ukwitowa na Daudi mna lwanda alwo. 14 Apfo Daudi kamghutsa keli Imulungu choni cha ukutenda, naye Imulungu kamwidika, "Uleke kuwaghendela kulawila ahano, ila uwatsunguluke na uwatowe kwa kulawila hambele ha mibiki ya miforosadi. 15 Na hamtsohulika chisindo cha maasikali iwobita mchanya mwe mibiki ayo ya miforosadi, baho ulawe ughende uketowe. Acho chitsakuwa chitango ka nene Imulungu nilongola ng'enda kuwatowa Wafilisti." 16 Daudi tsakatenda ka pfayalaghitsighwe na Imulungu. Tsakawatowa maasikali wa Wafilisti kwanzila Gibeoni mbaka Geseri. 17 Daudi tsayang'ali yomanyika muisi mwose, naye IMNDEWA kawatenda iwanu wa isi tsose wampfuke.