1 Daudi hayakalile ka kalala na miyaka yake ifosa ghendo, tsakamsaghula Selemani, imwanaghe yawe mfalume wa Isiraeli.

2 Mfalume Daudi tsakawakema hamwe pfilongotsi wose wa Isiraeli, iwatambika na Walawi. 3 Walawi wose iwamale wane miyaka salasini na kubita, tsawapetighwa. Wosewose tsa elufu selasini na nane. 4 Kuya Daudi kalonga, "Kulawa mna Walawi wose, Walawi elufu ishilini na nane wemilile isang'ano hana ing'anda ye Imulungu, na Walawi elufu sita wawe wakulu na walamtsi. 5 Walawi elufu nne wawe wakalitsi wa ghamalango na Walawi elufu nne wamwimbileghe Imulungu kwa tsingoma na ipfinu pfaniweng'ile wanitowele." 6 Daudi tsakawaghola Walawi wakale mna makingili madatu kwa kulola tsikolo tsawolawa mna likabila lyao lya Walawi: lukolo lwa Gerishoni, lwa Kohatsi na lukolo lwa Merari. 7 Iwana wa Gerishoni tsa weli, Ladani na Shimei. 8 Ladani tsakana wana wadatu: mwanaghe chaudele tsa Yehieli, wakeli tsa Setamu na wakadatu tsa Yoeli. 9 Iwanaghe Shimei tsa wadatu Shelomati na Hasieli na Harani. Awano wadatu tsa pfilongotsi we lukolo lwa Ladani. 10 Iwanaghe Shimei tsa wane; Yahati na Sina na Yehushi na Beria. 11 Yehati yuyo mkulu wawo, wakeli Ziza. Lekeni Yehushi na Beria tsawahela iwana wengi, apfo wekighwa mna lukolo lumwe. 12 Wana wa Kohati tsa wane: Amramu, Ishali, Heburoni na Uzieli. 13 Iwanaghe Amramu tsa Aruni na Musa. Aruni tsakabaghulighwa yeye na iwatsukulu wake wose, wapfitende ipfinu pfiwe pfienzeluke ghendo, kuya wamlapfile IMNDEWA tsinambiko na kuwabaliki iwanu kwa kulikema litaghwa lya Imulungu. 14 Lekeni wana wa Musa, imunu wa Imulungu tsawekighwa hamwe mna likabila lya Lawi. 15 Wana wa Musa tsa Gerishomu na Eriezeri. 16 Iwanaghe Garishomu tsa Shebueli, iyakalile mkulu wawo. 17 Eliezeri tsakana mwana yumwe yaliyeka, taghwa lyake Rehabia, Lekeni Rehebia tsakana watsukulu wengi. 18 Ishari tsakamweleka Shilomiti, imkulu wa kabila lyose. 19 Hebroni tsakana wana wane: mwanaghe chaudele tsakakemighwa Yeria, wa keli Amaria na wakadatu Yahosueli na wa kane Yekameamu. 20 Uzieli naye tsakana wana weli, mwanaghe chaudele tsakakemighwa Mika na wakabili Ishia.

21 Merari tsakana wana weli, Mali na Mushi. Naye Mali tsakana wana weli, Eliazali na Kishi. 22 Eliazali tsakafa aku kahela mwana mmale, lekeni tsakapata wana wapinga waliyeka. Iwanaghe mapinga wose tsawakwelighwa na lumbu tsawo, awala iwana wa Kishi. 23 Mushi yeye tsakana wana wadatu: Mali na Edari na Yeremosi. 24 Awo wawo iwana wa Lawi kwa kulola tsikolo tsawo tsawolawa. Chila imunu yana miyaka ishilini na kughendelela, litaghwa lyake tsalyandikighwa, na kasang'ana mna sang'ano tsa Ing'anda ya Imulungu. 25 Daudi tsakalonga, "Kwaapfila IMNDEWA, Imulungu wa Isiraeli, kawatenda iwanu wake wakale tseghamba, naye katsa kukala Yerusalemu ghamatsuwa ghose. 26 Apfo Walawi ng'awatsoliduta keli baye lihema lienzeluka au pfinu pfake pfenzeluke pfa ukutambikila." 27 Kwa ghamalaghitso gha Daudi, ghayamalitsile, Walawi wose iwane miyaka ishilini tsawandikighwa. 28 Walawi awano tsaweng'ighwa ing'onde kuwapfila watambika wa lukolo lwa Aruni mna isang'ano ya Ing'anda ye Imulungu: kusegha mna tsiluwa tsa ing'anda, na mna ipfiheleto, na ukuhopfugha pfinu pfose pfihenzeluke na kusang'ana ng'onde tsingi tsa Ing'anda ye Imulungu. 29 Kuya tsawasang'ana mna sang'ano ya pfighate pfienzeluka, usaghe mdekedeke na nambiko ya tsimbeghu, maandatsi ing'aghelighwe hamila, nambiko iyokighwe, nambiko iitipfighwe ghamapfuta. Walawi awo wawo iwalingile utsito na ukulu wa tsinambiko atso. 30 Kuya tsawang'ali wakwima kumlongela mighede Imulungu na ukumtunya chila litsuwa, nemitondo na nemihe, 31 na chila hatsilapfighwe nambiko tsa kulakatsighwa kwa IMNDEWA mna ghamatsuwa gha kubwihila, na mna pfihungo pfa mlawo wa ghumwetsi, na mna pfihungo ipfisaghulighwe. Tsawalaghitsighwa Walawi wangapi iwobamighwa kumsang'anila IMNDEWA chila tsuwa. 32 Apfo tsaikala sang'ano yawo Walawi kutunza Lihema lienzeluke, na kuwapfila ndughu tsawo watambika, iwana wa Aruni, mna tsisang'ano tsa ing'anda ya IMNDEWA.