1 Hambele chidogho mfalume Daudi tsakawatowa Wafilisti na kuwahuma. Kaghusola ghumji ghwa Gati hamwe na tsikaye itsitsunguluka tsawang'ali wokala Wafilisti. 2 Pfipfila kawatowa Wamoabu, nawo wawa watumwa wake na wang'ali womliha ikodi. 3 Mfalume Hadadezeri wa Soba, hayaghendile kuisola isi ikalile habehi na ghumto Eufrate iwe yake, Daudi ketingana naye mna isi ya Hamati na kamtowela kuko. 4 Daudi tsakaboka mituka ya farasi elufu imwe, maasikali wadina farasi elufu saba, na maasikali iwoghenda kwa mghulu elufu ishilini. Kuya Daudi tsakawagana tsinyughe tsa ghamaghulu gha kuchughu gha wafarasi wose iwendese imituka, lekeni kaleka kuwagana tsinyughe wafalasi miya imwe. 5 Nawo Waaramu wa Damasko hawaghendile kumwapfila Hadadezeri mfalume wa Soba, Daudi kawatowa, kawakoma iwanu elufu ishilini na mbili. 6 Kuya Daudi kaweka maasikali wakale hane ghumji ghwa Shamu ya Damasko. Apfo Waaramu wawa watumwa wake, wamliha ikodi. IMNDEWA kamtenda Daudi yahume kokose kwayaghendile. 7 Daudi tsakasola tsingawo atsila tsa nzahabu itsisolighwe na pfilongotsi wakulu wa Hadadezeri, na katsighala Yerusalemu. 8 Daudi pfipfila tsakasola Shaba bwelele kulawa kuna ghumji ghwa Tibihati, na ghwa Kuni, imiji yake Hadadezeri. Hambele Selemani tsakafina bigha kulu lya shaba, tsingutso na pfinu pfingi pfa shaba kulawa mna ishaba ayo. 9 Mfalume Tou wa Hamati hayulike ka Daudi kawatowa maasikali wose wa Hadadezeri mfalume wa Soba, 10 kamtuma mwanaghe iyakemighwe Hodoramu kwa mfalume Daudi, yakamlamse na kumwing'a ihongela yake kwa kumtowa Hadadezeri kung'ondo. Kwaapfila Hadadezeri chila mala yang'ali yetowagha na Tou. Hadoramu tsakamghalila Daudi pfinu pfa nzahabu, pfetsa, na shaba. 11 Ipfinu apfo pfeng'ighwe mfalume Daudi tsakapfilapfa pfiwe pfa IMNDEWA, ka apfila pfayatendile kwa ifetsa na nzahabu iyabokile kulawa mna isi tsa Edomu, Moabu, Amoni, Filisti, na Amaleki. 12 Abishai mwana wa Seruya, tsakawakoma Waedomu elufu kumi na nane hana ulwanda lwa Munyu. 13 Kuya Daudi kaweka maasikali wakale Edomu. Apfo Waedomu wawa watumwa wake, IMNDEWA kamtenda Daudi yahume kokose kwayaghendile. 14 Apfo Daudi tsakatawala Isiraeli yose, na tsakatenda ghanoghile na gha haki kwe iwanu wake wose. 15 Yoabu mwana wa Seruya tsakakala mkulu wa maasikali, Yehoshafati mwana wa Ahiludi yang'ali yakwika tsikumbukumbu, 16 Sadoki mwana wa Ahitubu na Ahimeleki, mwana wa Abiatari, awano tsawatambika, Shausha yang'ali yakwandikagha aghala igholawila. 17 Benaya mwana wa Yehoyada tsakawalongotsa Wakereti na Wapeleti, na iwanaghe Daudi tsapfilongotsi wakulu mna ufalume wake.