1 Awano ahano wawo Waisiraeli iwamsang'anile mfalume, pfilongotsi wa tsikaya, pfilongotsi wa maasikali maelufu na maasikali mamia, na wakulu wawo wangi. Tsakuna wanu elufu ishilini na wane iwalongotsighwe na chilongotsi wawo iwasang'ane kwa mwetsi ghumwe mna chila mwaka. 2 Yeshobeamu mwana wa Sabidieli tsa mkulu iyalongotse wanu elufu ishilini na wane iwanzile kusang'ana mna ghumwetsi ghwa mwanduso. 3 Yeye tsakalawila mna lukolo lwa Peresi, na tsa mkulu wa pfilongotsi wose wa maasikali mna ghumwetsi ghwa mwanduso. 4 Dodai, iyolawa mna lukolo lwa Ahoa, naye tsa mkulu wa wanu elufu ishilini na wane iwasang'ane mna ghumwetsi ghwa keli. 5 Benaya, imwana wa mtambika Yehoyada tsa mkulu wa wanu elufu ishilini na wane iwasang'ane mna ghumwetsi ghwa kadatu. 6 Ayuno yuyo ayula Benaya iyakalile asikali iyadahile ukwitowa ghoya kulawa mna maasikali awala selasini iwanoghile, na iyawile chilongotsi wawo. Naye Amisabadi imwanaghe tsa chilongotsi iyamwapfile. 7 Asaeli, ndughu yake Yoabu, tsa mkulu wa kane iyalongotse wanu elufu ishilini na wane iwasang'ane mna ghumwetsi ghwa kane. Kuya na Sebadia, imwanaghe, tsakawa chilongotsi, kakinda hanu hake. 8 Shamhuti, Mwisirahi tsa mkulu wa tano iyalongotse wanu elufu ishilini na wane iwasang'ane mna ghumwetsi ghwa tano. 9 Imkulu wa sita iyalongotse wanu elufu ishilini na wane iwasang'ane mna ghumwetsi ghwa sita tsa Ira, mwana wa Ikeshi kulawa Tekoa. 10 Helesi, mwana wa Efuraimu kulawa Peloni tsa mkulu wa saba iyalongotse wanu elufu ishilini na wane iwasang'ane mna ghumwetsi ghwa saba. 11 Sibekai, wa lukolo lwa Zera iyolawila Hushahi tsa mkulu wa nane iyalongotse wanu elufu ishilini na wane iwasang'ane mna ghumwetsi ghwa nane. 12 Abiezeri kulawa Anatoti wa likabila lya Benjamini tsa mkulu wa tisa iyalongotse wanu elufu ishilini na wane iwasang'ane mna ghumwetsi ghwa tisa. 13 Maharai, wa lukolo lwa Zara iyolawila Netofati tsa mkulu wa kumi iyalongotse wanu elufu ishilini na wane iwasang'ane mna ghumwetsi ghwa kumi. 14 Benaya, kulawa Piratoni wa likabila lya Efuraimu, tsa mkulu wa kumi na yumwe iyalongotse wanu elufu ishilini na wane iwasang'ane mna ghumwetsi ghwa kumi na ghumwe 15 Helidai, wa lukolo lwa Otinieli, iyolawila Netofati tsa mkulu wa kumi na mbili iyalongotse wanu elufu ishilini na wane iwasang'ane mna ghumwetsi ghwa kumi na mili.

16 Awano ahano wawo pfilongotsi wa Waisiraeli: Eliesari mwana wa Sikiri tsa chilongotsi wa likabila lya Rubeni. Shefatia mwana wa Maaka tsa chilongotsi wa likabila lya Simeoni. 17 Hashabia, mwana wa Kemueli kawalongotsa Walawi, Sadoki kalilongotsa likabila lya Aruni, 18 Elihu, ndughu yake Daudi kalilongotsa likabila lya Yuda, Omri mwana wa Mikaeli kalilongotsa likabila lya isakari, 19 Ishimaya mwana wa Obadia kalilongotsa likabila lya Zabuloni na Yeremoti mwana wa Azirieli kalilongotsa likabila lya Nafutali. 20 Hosea imwana wa Asasia kalilongotsa likabila lya Efuraimu, na Yoeli mwana wa Pedaya kalongotsa inusu ya likabila lya Manase, 21 nusu ingi ya likabila lya Manase walongotsa Gileadi, walongotsighwa na Ido mwana wa Sakaria, na Yaasieli mwana wa Abineri tsakalilongotsa likabila lya Benjamini. 22 Likabila lya Dani tsalilongotsighwa na Azareli mwana wa Yeroboamu. Awano wawo pfilongotsi wa ghamakabila gha Isiraeli.

23 Mfalume Daudi ng'awapetile baye awala ing'awapfikile miyaka ishilini kwaapfila IMNDEWA tsakalonga kowongetsa Waisiraeli wawe wengi ka tsinondo tsili kulanga. 24 Yoabu mwana wa Seruya tsakandusa kuwapeta iwanu lekeni ng'amalitsile baye, apfo imaya ya Imulungu iwatsila Waisiraeli kwaapfila Yoabu tsakawapeta, apfo Waisiraeli wose ng'awandikighwe baye mna ichitabu cha kumbukumbu cha mfalume.

25 Iyemilile hatsina tsa mfalume Daudi tsa Azimaweti mwana wa Adieli. Naye Yonatani mwana wa Uzia tsakemila hatsina itsikalile kuna imighunda na kuna imiji na kuna pfijiji na kuna tsingome. 26 Iyawemilile iwolima mighunda tsa Eziri mwana wa Kelubu. 27 Shimei kulawa Ramati tsakemilila imighunda ya minzabibu ya mfalume, Zabidi iyolawila Shifimi tsakemila ing'onde yose ya ukukamula tsinzabibu tsiwe dipfai. 28 Na iyemilile imighunda ya imikuyu na minzeituni ya mfalume iikalile mchiwala ili hasi ha pfidunda pfa maghalibi tsa Baali Hanani iyolawila Gederi, naye Yoashi tsakemila tsighala tsa ghamapfuta. 29 Iyemilile iwang'ombe iwadimighwe ako Sharoni tsa Shitirai iyolawila Sharoni, na iyemile iwang'ombe iwadimighwe mlwanda tsa Shafati mwana wa Adilai. 30 Na iyemilile ingamiya tsakakala Obili iyolawa mna lukolo lwa Ishimaeli, na iyemilile pfihongwe tsa Yedeya iyolawa kuna ghumji ghwa Meronoti. 31 Iyemilile iwang'olo tsa Yazizi iyolawa mna ulukolo lwa Hagiri. Awo wose wawo iwanu iwemilile tsimali tsa mfalume Daudi.

32 Naye Yonatani, mtumba wake Daudi tsa mshauli na munu yane tsimbutsi nyingi na iyang'ali yakwandika. Yeye na Yehieli, mwana wa Hakmoni wang'ali wowafunda iwana wa mfalume. 33 Ahitofeli tsa mshauli wa mfalume, na Hushai Mwaliki tsa sale yake mfalume. 34 Ahitofeli hayafile, Yehoyada mwana wa Benaya, hamwe na Abiatali wawa washauli wa mfalume. Yoabu yeye kawa chilongotsi wa maasikali wa mfalume.