1 Apfi pfipfo iwatsukulu wa Aruni pfawagholighwe. Aruni tsakana wana wane, Nadabu na Abihu na Eliesari na Ithamari. 2 Nadabu na Abihu tsawafa ng'ana aba wawo yafe baye, nawo tsawahela iwana, apfo ndughu tsawo Eleasari na Ithamani wawa watambika. 3 Mfalume Daudi tsakawaghola watsukulu wa Aruni kwa kukulola sang'ano tsawo tsaweng'ighwe, Sadoki, mtsukulu wa Eliazari na Ahimereki, mtsukulu wa Itamari wang'ali womwapfila. 4 Tsakuna pfilongotsi wengi iwoneke kulawa mna watsukulu wa Eliazari kubita awala iwatsukulu wa Itamari, apfo tsawasaghulighwa pfilongotsi kumi na sita kulawa kuna watsukulu wa Eliazari na wasaghulighwa pfilongotsi wanane kulawa kwa watsukulu wa Itamari. 5 Tsawagholelighwa tsing'onde kwa kwasa tsisimbi tsilamle, kwaapfila mna kolo tsose atso mbili, lukolo lwa Eliezari na lukolo lwa Itamali tsakuna wakulu wa hanu haenzeluke na iwakulu iwosang'ana hana ing'anda ya Imulungu. 6 Naye Shemaya mwana wa Nataneli, imwandishi, iyakalile Mlawi tsakaghandika ghamataghwa ghao hambele ha mfalume Daudi, na hambele ha iwakulu wake, kandika hambele ha mtambika Sadoki, Ahimeleki mwana wa Abiatari, na pfilongotsi wa itsikaye tsa iwatambika na tsa Walawi. Ikaya imwe tsaisaghulighwa kulawa kuna lukolo lwa Eliazari na ikaya ingi kulawa kuna ulukolo lwa Itamari. 7 Wasa tsisimbi tsilamle na isimbi yanza kumghwila Yehoiaribu, ya kabili imghwila Yedaya, 8 ya kadatu imghwila Harimu, na ya kane imghwila Seorimu, 9 ya tano imghwila Malkia na ya sita imghwila Miyamini, 10 ya saba imghwila Hakosi na ya nane imghwila Abiya, 11 ya tisa imghwila Yeshua na ya kumi imghwila Shekania 12 na ya kumi na moja imghwila Eliashibu na ya kumi na mbili imghwila Yakimu, 13 na ya kumi na tatu imghwila Hupa na ya kumi na wane imghwila Yeshebeabu, 14 na ya kumi na tano imghwila Bilga na ya kumi na sita imghwila Imeri, 15 na ya kumi na saba imghwila Hesiri, na ya kumi na nane imghwila Hapisesi, 16 na ya kumi na tisa imghwila Petahia, na ya ishirini imghwila Yehezkeli, 17 na ya ishirini na moja imghwila Yakini, na ya ishirini na mbili imghwila Gamuli, 18 na ya ishirini na tatu imghwila Delaya, na ya ishirini na nne imghwila Maasia. 19 Awano wawo iwanu iwandikighwe kwa kulola tsing'onde tsawo iwatsokwingila mna ing'anda ya IMNDEWA kumsang'anila, na kukinda imiko iyekile sekulu wawo Aruni, ka apfila IMNDEWA, Imulungu wa Isiraeli pfayamlaghitse.

20 Awano iwo pfilongotsi wa tsikaya kulawa mna ulukolo lwa Lawi: Yedeya tsachilongotsi iyalawile mna watsukulu wa Amramu. 21 chilongotsi Ishio kulawa mna watsukulu wa Rehabia. 22 Shelomiti tsachilongotsi iyalawile mna iwatsukulu wa Ishali, Yahati tsachilongotsi iyalawile mna watsukulu wa Shelomiti. 23 Yeria tsachilongotsi iyalawile mna watsukulu wa Hebroni wakeli Amaria, wakadatu Yohasieli, na wakane Yekameamu. 24 Mika tsachilongotsi iyalawile mna watsukulu wa Uzieli. Shamire, Shamili tsachilongotsi iyalawile mna watsukulu wa mika. 25 Mdodo wake mika tsa Ishia, Zakaria tsachilongotsi iyalawile mna iwana wa Ishia. 26 Iwana wa Merari tsa Mahili, Mushi, Yaasia, 27 Beno, Shohamu, Zakuri na Ibri tsapfilongotsi kulawa mna iwana wa Merari kubitila imwanaghe Yaazia. 28 Eleazari tsachilongotsi iyalawile mna iwana wa Mahili, lekeni Eleazari tsakahela iwana. 29 Yerameeli tsachilongotsi iyalawile mna iwana wa Kishi. 30 Mushi tsakana wana wadatu: Mahili, Ederi na Yeremoti. Awano wawo iwana wa Lawi kwa kulola tsikaya tsawo tsawolawa. 31 Awo nawo pfipfila tsawatsa tsisimbi tsilamle ka apfila pfawatendile ndughu tsawo, iwana wa Aruni. Watenda apfo aku mfalume Daudi, Sadoki, Ahimeleki na iwakulu wa tsikaye tsa iwatambika na tsa Walawi wololesa. Kaya ya mwana mkulu tsaitendelighwa ka kaye ya mwana mdodo.