1 Kuya mfalume Daudi kawalongela iwanu wose; "Mwanangu Selemani, iyasaghulighwe na Imulungu, yang'ali kamdodo na ng'amanyile chinu baye. Ing'onde aino ng'ulu kwaapfia ing'anda iyatsoisenga si ya imunu baye, ila ya Imulungu. 2 Kulawa mna ipfinu pfangu pfose, nene nilapfa ipfinu pfa ukutsengela ing'anda ya Imulungu, nilapfa nzahabu ya kutendela pfinu pfa nzahabu, na fetsa ya kutendela pfinu pfa fetsa, na shaba ya kutendela pfinu pfa shaba na chuma cha ukutendela pfinu pfa chuma na mibiki ya kutendela pfinu pfa mibiki. Kubita agho, nigheka ghamabwe mengi gha bei ng'ulu na ghamabwe gha kumemesela pfito pfa njumu, ghamabwe gha rangi, ghamabwe gha bei ng'ulu ya chila langi 3 Kwa ukongetsa mna pfinu pfose pfanilapfile pfitsenge ing'anda ya Imulungu, nitsolapfa ihatsina yangu mwenyegho ya nzahabu na fetsa, ikatsengele ing'anda ya Imulungu wangu, kwaapfila nene nobama ghendo ing'anda ya Imulungu wangu itsengighwe. 4 Nitsolapfa tani miya imwe na kumi na tano tsa nzahabu illawa Ofili, na tani miya mbili sitini na tano tsa fetsa inoghile tsa kukandika mna mibanda ya ing'anda, 5 na tsa kutengenetsela ipfinu pfose pfa nzahabu na fetsa pfawatsotengenetsa iwanu. Angu nani lelo iyobama mwenyegho kumlapfila IMNDEWA Imulungu."

6 Baho iwakulu wa tsikolo, pfilongotsi wa ghamakabila gha Isiraeli, pfilongotsi wa maasikali elufu na mamiya hamwe na iwanu iwemilile tsing'onde tsa mfalume tsawalapfa kwa ukubama wenyegho. 7 Tsawalapfa pfinu pfino pfiwe pfa ukutsengela ing'anda ya Imulungu, walapfa tani miya imwe tisini tsa nzahabu, na tani miya tatu na semanini tsa fetsa, na tani miya sita sabini na tano tsa shaba, na tani elufu tatu miya saba hamsini tsa chuma. 8 Awala wana ghamabwe gha bei ng'ulu tsawaghalapfa ghekighwe mna ihatsina ya ing'anda ya IMNDEWA, ing'ali ilolesighwa na Yehieli Mgerishoni. 9 Baho iwanu tsawadeng'elela kwaapfila pfilongotsi wawo tsawalapfa kwa ukubama wenyegho, kwaapfila kwa ghumoyo ghwawo ghose tsawamlapfila IMNDEWA Imulungu, naye mfalume Daudi tsakadeng'elela ghendo.

10 Kuya Daudi kamtunya IMNDEWA Imulungu hambele ha mtingano ghwose, kalonga, "Utunyighwe ghamatsuwa ghose, Ghwe IMNDEWA, Imulungu wa aba wetu Yakobo. 11 Ghwe IMNDEWA, kwa mkulu na kuna ngupfu, ghweghwe kwenzeluka, kohuma na kunogha. Pfinu pfose ipfili kulanga na muisi pfa kwako. Ghwe IMNDEWA, kwa mfalume, naghwe kwinulighwa, kwa mkulu wa pfinu pfose. 12 Tsimali na ukotogholighwa pfose pfolawa kuna ghweghwe, pfose kopfilongotsa. Ukudaha na tsingupfu pfa mmwoko mwako, na ghamoko ghodaha kuwenula na kuweng'a tsingupfu iwanu wose. 13 Lelo twolonga mighede, Ghwe Imulungu wetu, na twolitunya taghwa lyako kulu.

14 "Lekeni nene nani, na wanu wangu choni mbaka tudahe kukulapfila ipfinu kwa uluso uno? Kwaapfila ipfinu pfose pfolawa kuna ghweghwe, tukulapfila apfila ipfili pfako umwenyegho. 15 Twetwe twa wahenza, na wabita nzila hambele hako, ka apfila pfawakalile wahenga wetu. Ghamatsuwa ghetu ahano muisi gheghala na sisila ilibita, ahano haduhu lolelo lya ukukala. 16 Ghwe IMNDEWA Imulungu wetu, pfinu pfose pfino pfingi pfatulapfile pfiwe pfa kutsengela ing'anda, na kwa kulinula taghwa lyako lyienzeluka, napfo ghendo pfolawa mna ghamoko ghako na pfose pfa kwako. 17 Nomanya Imulungu wangu ka ghweghwe koghetsa mimoyo ya iwanu, naghwe kowanoghela iwanu iwotogholighwa. Ipfinu apfino pfose nipfilapfa kwa kubama mwenyegho, na kwa ghumoyo ghumwe. Sambi nakwona iwanu wako iwali baha pfawolapfa kwa kudeng'elela na kwa kubama iwenyegho. 18 Ghwe IMNDEWA Imulungu, Imulungu wa Abrahamu, Isaka na Yakobo iwabala wetu, wike usongo uno wa kulapfa mna mimoyo ya iwanu wako ukale matsuwa ghose, na uilongotse imimoyo ya iwanu wano ikulole ghweghwe. 19 Umwing'e mwanangu Selemani usongo wa kukinda ghamalaghitso ghako, imiko yako na malamutsi ghako, na umwing'e usongo wa kuitsenga ing'anda ino inoghile yaniilapfile ipfinu."

20 Kuya, mfalume Daudi kawalongela iwanu wose iwatingane, "Mtunyeni IMNDEWA, Imulungu wetu." Na iwanu wose iwatingane hamwe wamtunya IMNDEWA, Imulungu wa aba tsawo, wenamitsa ghamatwi ghawo na wafunama hambele ha IMNDEWA na mfalume.

21 Tsuwa liwinzile wamlapfila IMNDEWA nambiko tsa ukulakatsighwa, ng'ombe wamale elufu imwe, ng'unzu elufu imwe na wana ng'olo elufu imwe na nambiko tsawo tsa pfinu pfa ukunwa na nambiko nyingi tsiwe tsa Waisiraeli wose. 22 Tsawaja na wanwa kwa ukedeng'elela ng'ani mna litsuwa alyo hambele ha IMNDEWA Imulungu.

Baho wamwika keli Selemani mwana wa Daudi yawe mfalume. Wambaka ghamapfuta yatawale hambele ha IMNDEWA, na Sadoki yawe mtambika. 23 Kuya Selemani kakala hana ichighoda cha ufalume cha IMNDEWA, kakala hanu ha Daudi, aba wake. Naye kebweda mna chila chinu na Waisiraeli wose wamuhulikitsa. 24 Wakulu wose na maasikali wose wane ngupfu hamwe na iwanaghe mfalume Daudi welaghana kumuhulikitsa mfalume Selemani. 25 IMNDEWA tsakamwinula sideke Selemani hambele ha Waisiraeli wose, kamtenda yawe mfalume mkulu kubita ukulu wa mfalume wowose iyatawale Isiraeli ng'ana yeye yatawale.

26 Apfo Daudi, mwana wa Yese, tsakawa mfalume wa isi yose ya Isiraeli. 27 Tsakalongotsa Isiraeli kwa miyaka alubaini, miyaka saba ako Heburoni na miyaka salasini na midatu ako Yerusalemu. 28 Tsakafa aku kana miyaka mingi, na kakala ghamatsuwa mengi, aku kana mali nyingi na iwanu wose wang'ali womtegheletsa yeye. Kuya mwanaghe Selemani, kawa mfalume hanu hake. 29 Ghose ghayatendile Daudi mna ufalume wake, kulawa hayanzile ufalume mbaka hayamalitse ghandikighwa mna ipfitabu pfa kumbukumbu pfa nabii Samweli, Nasani na nabii Gadi, 30 hamwe na mbuli tsa utawala wake na ukulu wake na mbuli itsimpatile na Waisiraeli na chila ufalume muisi ya Isiraeli itsimtsunguluke.