1 Awano wawo wamwenga wa mweleko ghwa Yuda: Peresi, Hesironi, Karimi, Huri na Shobali. 2 Shobali tsakamweleka Reaya, na Reaya tsakamweleka Yahati, iyakalile aba wake Ahumai na Lahadi. Atso tsatsikala kolo tsa Wasorati. 3 Wana wamale wa Etamu tsa Yezireeli, Ishima, na Idibashi. Nawo tsawana lumbu yumwe iyakemighwe Haseleliponi. 4 Penueli tsakandusa ghumji ghwa Gedori, na Ezeri tsakandusa ghumji ghwa Husha. Awano wawo iwana wa Huri iyali chaudele wa Efurata, iyanduse ghumji ghwa Betilehemu.

5 Ashuru, iyanduse ghumji ghwa Tekoa, tsakana mapinga weli: Hela na Naara. 6 Naara tsakamwelekela wana wane: Ahuzamu, Heferi, Temeni na Haahashitari. 7 Naye Hela tsakamwelekela wana wadatu: Sereti, Ishari na Etinani. 8 Kozi tsakaweleka Anubi na Zobeba, naye pfipfila tsa sekulu wa iwanu wa ilukolo lwa Ahariheli, mwana wa Harumu.

9 Tsakuna munu yumwe taghwa lyake Yabesi, imunu ayo tsakahulikitsighwa kubita ndughu tsake wose. Wenye wake tsakamwing'a taghwa Yabesi kwaapfila tsakamweleka kwa usungu. 10 Naye Yabesi tsakamlomba Imulungu wa Israeli kalonga, "Ghwe Imulungu, nokulomba unibaliki na uyongetse isi yangu iwe ng'ulu. Ghumoko ghwako ghuwe hamwe na nene, naghwe unikinge chinu chochose chihile chileke kundagha." Naye Imulungu kamwing'a aghala ghayalombile.

11 Kalebu, ndughu yake Shuha, tsakamweleka Mehiri, naye Mehiri tsakamweleka Eshitoni. 12 Eshitoni tsakana wana wamale wadatu: Beti Rafa, Pasea na Tehina. Tehina tsakandusa ghumji ghwa Iri Nahashi. Awano tsawakala kuna ghumji ghwa Reka. 13 Na iwana wa Kenazi tsa Otinieli na Seraya. Iwana wa Otinieli tsa Hatati na Meonotai.* 14 Meonotai tsakamweleka Ofira, Seraya tsakamweleka Yoabu, iyanduse Likonde lya Mafundi. Tsaling'ighwa taghwa alyo kwaapfila wose iwakalile amwo tsa mafundi. 15 Kalebu mwana wa Yefune tsakana wana wadatu: Iru, Ela, na Naamu. Na imwana wa Ela tsakakemighwa Kenazi. 16 Na iwana wa Yehaleleli tsa Zifu, Zifa, Tiria na Asareli. 17 Iwana wa Ezra tsa Yeteri, Meredi, Eferi na Yaloni. Meredi tsakamkwela Bitia, neghe Farao, mfalume wa Misiri, naye kamwelekela imwana pinga iyakemighwe Miriamu, na wana weli wamale, yumwe Shamai, na wakeli Ishiba iyanduse ghumji ghwa Eshitemoa. 18 Meredi tsakakwela pinga yungi Myahudi. Ipinga ayo tsakamweleka Yeredi, iyanduse ghumji ghwa Gedori, na Heberi, iyanduse ghumji ghwa Soko na kamweleka Yekutieli iyanduse ghumji ghwa Zanoa. 19 Hodia tsakamkwela lumbu wake Nahamu, na ghumweleko ghwao ghugho ghwanduse ilukolo lwa Garimi iwakalile mna ghumji ghwa Keila, na ilukolo lwa Maakati, ilukalile mna ghumji ghwa Eshitemoa. 20 Shimoni tsakana wana wane: Amnoni, Rina, Beni Hanani na Tiloni. Na iwana wa Ishi wawo awano: Zoheti na Beni Zoheti.

21 Imwana wa Yuda iyakemighwe Shela, tsakana wana awano: Eri iyanduse ghumji ghwa Leka, Laada iyanduse ghumji ghwa Maresha, na ilukolo lwa iwanu iwofuma tsinguwo tsinzelu tsinoghile iwang'ali wokala mna ghumji ghwa Beti Ashibea, 22 Yokimu na iwanu iwang'ali wokala mna ghumji ghwa Kozeba, Yoashi na Sarafi iwatawale Moabu na woya Lehemu. Na tsimbuli atsino tsa ghumwande ng'ani. 23 Awano wawo iwafina pfiya iwang'ali wokala mna imiji ya Netaimu na Gedera, iwang'ali wokala na kumsang'anila mfalume.

24 Simeoni tsakana wana wamale watano: Nemueli, Yamini, Yaribu, Zera na Shauli. 25 Imwana wa Shauli tsakakemighwa Shalumu, Shalumu tsakamweleka Mibisamu, naye Mibisamu tsakamweleka Mishima. 26 Mishima tsakamweleka Hamueli, iyamweleke Zakuri, naye Zakuri tsakamweleka Shimei. 27 Shimei tsakana wana wamale kumi na sita na wana mapinga sita, lekeni ndughu tsake tsawahela wana wengi, apfo lukolo lwao lose tsalwahela wanu wengi ka iwanu wa Yuda. 28 Aino iyo imiji yawang'ali wokala: Beeri Sheba, Molada, Hazari Shuali, 29 Biliha, Ezemu, Toladi, 30 Betueli, Horima, Sikilagi, 31 Beti Marikaboti, Hazari Susimu, Beti Biri na Shaaraimu. Ayo iyo imiji yawo mbaka mfalume Daudi hayatawale. 32 Pfipfila tsawakala mna pfijiji pfingi, ipfo pfino: Etamu, Aini, Rimoni, Tokeni na Ashani, 33 hamwe na pfijiji pfose ipfitsunguluke imiji ayo ako Baalati. Ayo iyo imiji na ipfijiji pfawakalile. Na ako, kuko kwawekile tsimbuli tsawandike tsa ghumweleko ghwao. 34 Awano tsawawa pfilongotsi wa kolo tsawo: Meshobabu, Yamleki, Yosha mwana wa Amazia, 35 Yoeli, na Yehu mwana wa Yoshibia, Yoshibia tsamwana wa Seraya, naye Seraya tsamwana wa Asieli, 36 na Elioenai, Yaakoba, Yeshohaya, Asaya, Adieli, Yesimieli, Benaya, 37 Ziza tsamwana wa Shifi, naye Shifi tsamwana wa Aloni, naye Aloni tsamwana wa Yedaya, na Yedaya tsamwana wa Shimri, naye Shimri tsamwana wa Shemaya. 38 Iwanu wa tsikolo tsawo waghendelela ukongetseka ng'ani, 39 tsawenela mbaka kuna lilango lya ghumji ghwa Gedori, ubali wa mashaliki wa likonde, ili wawabamile iwanyama wawo imighunda ya ukudimila. 40 Ako tsawapata imighunda ina imitsani ideghete ya ukudimila iwanyama, nayo isi tsaiwa ng'ulu na iwanu tsawakala bila ukwitowa na tsaikala tulu. Na ghumwande iwanu wa Hamu tsawakala kuko. 41 Mna ghamatsuwa Hezekia hayawile mfalume wa Yuda, iwanu awo iwandikighwe ghamataghwa ghawo tsawaghenda Gedori, wahinya ghamahema gha Wameuni iwang'ali wokala ako, na kuwawinga ghendo mbaka leloli. Tsawakala ako kwaapfila tsakuna imitsani bwelele ya ukudimila imifugho yawo. 42 Iwanu wamwenga wa likabila lya Simeoni iwopfika miya tano tsawaghenda mbaka kuna ichidunda cha Seiri. Nawo tsawalongotsighwa na Pelatia, Nearia, Refaya na Uzieli, iwana wa Ishi. 43 Wasimioni tsawawakoma Waamaleki iwasighale wagima, na kulawa matsuwa agho Wasimioni wokala ako mbaka leloli aino.