1 Kuya Waisiraeli wose waghenda kwitingana kwa Daudi ako Heburoni, wamlongela, "Twetwe na ghweghwe twolawa tombo limwe. 2 Aho ghumwande, Sauli hayakalile mfalume, ghweghwe yuyo yauwalongotse Waisiraeli mng'ondo, na IMNDEWA, Imulungu wako kakulongela apfino, ‘Kutsowalongotsa iwanu wangu Isiraeli, naghwe kutsakuwa chilongotsi wawo.’" 3 Apfo wanzehe wose wa Isiraeli wamghendela mfalume ako Heburoni, naye Daudi keka nawo laghano hambele ha IMNDEWA Imulungu, kuya wamsaghula Daudi kwa kumbaka ghamapfuta yawe mfalume wa Waisiraeli, ka apfila IMNDEWA pfayalongile kubitila Samweli.

4 Kuya Daudi na maasikali wa Isiraeli, wose tsawaghenda na waghutowa ghumji ghwa Yerusalemu, ghumwande ghumji agho tsaghukemighwa Yebusi, na iwanu iwang'ali wokala amwo tsawakemighwa Wayebusi. 5 Wenyekaye wa Yebusi wamlongela Daudi, "Ng'utsakwingila baye mna ighumji aghuno." Hata apfo, Daudi tsakaghusola ghumji ghwa Siyoni, ghutsungulusighwe ubanda, ghumji ghwa Daudi. 6 Kuya Daudi tsakalonga, "Munu iyatsolongola kuwatowa Wayebusi, katsakuwa mkulu na chilongotsi wa maasikali." Baho Yohabu, mwana wa Seruya, kalongola kuwatowa, na kawa mkulu wa maasikali. 7 Daudi tsakakala mna ghumji agho ghune ubanda, apfo ghumji agho tsaghukemighwa Ghumji ghwa Daudi. 8 Tsakaghutsenga keli ghumji agho, kanzila hanu hawasindilile msanga mbaka kuna ubanda utsunguluke ghumji, aku Yoabu naye katsenga keli ghumji ghugho ghwa Yerusalemu. 9 Naye Daudi kaghendelela kongetseka tsingupfu ghendo, kwaapfila IMNDEWA yana tsingupfu nyingi tsakahamwe naye.

10 Awano iwo maasikali wake Daudi iwadahile ukwitowa kung'ondo, wawo kwa tsingupfu tsawo hamwe na iwanu wose wa Isiraeli tsawamwapfila Daudi hayawile mfalume, ka apfila IMNDEWA pfayawalongele Waisirseli. 11 Wa mwanduso taghwa lyake tsa Yashobeamu iyolawa mna ulukolo lwa Hakimoni iyakalile mkulu wa "Awala salasini." Ayuno tsakawatowa kwa mghoha ghwake, kawakoma wanu miya ndatu kwa mala lumwe mng'ondo. 12 Wakeli kulawa mna maasikali awala wana ingupfu, tsa Eleazari mwana wa Dodo, iyolawila mna ulukolo lwa Ahohi. 13 Ayo tsakakala hamwe na Daudi ako Pasi Dadimu, ahala Wafilisti hawatingane kwitowa ng'ondo. Ako tsakukala na mghunda ghune shayili ketseketse, nawo Waisiraeli tsawatsuma, wawapfuka Wafilisti. 14 Lekeni wawo tsawema haghati ghati ha mghunda aghwo, nawo wetowa ghuleke kusolighwa, na wawakoma Wafilisti. IMNDEWA kawakombola kwa kuwatenda wahume ghendo. 15 Kuya iwakulu wadatu wane ngupfu mghati mwe iwakulu selasini wahulumka mbaka hana libambalawe, wamghendela Daudi hana imango ako Adulamu. Ghamatsuwa agho maasikali wa Wafilisti tsaweka indalo yawo mna lwanda lwa Refaimu. 16 Naye Daudi ghamatsuwa agho tsakakala mna ingome, nawo maasikali wa Wafilisti tsawakala mna ghumji ghwa Betilehemu. 17 Daudi tsakabama yanwe ghamatsi ghendo, kalonga, "Kung'alawile imunu iyodaha kungaya ghamatsi gha ichisima cha Betilehemu ichili habehi na lilango lya ghumji!" 18 Maasikali wala wadatu tsawalawa wabita mghati mwe ndalo ya maasikali wa Wafilisiti, waghenda kudegha ghamatsi mna ichisima achila cha Betilehemu, habehi na lilango lya ghumji, wamghalila Daudi. Lekeni Daudi tsakalema kughanwa, kaghaghida hasi ghawe nambiko kwa IMNDEWA Imulungu. 19 Kalonga, "Chinu ka achino chikale kutali na nene, sidaha baye kutenda chinu chino hambele ha Imulungu wangu. Apfi nuwe idamu ya iwanu wano iwabamile kwiyonza wenyegho wafe? Kwaapfila waulapfa ugima wawo waghala ghamatsi ghano." Apfo Daudi ng'aghanwele baye ghamatsi agho. Aghano ghagho ghawatendile maasikali wadatu. 20 Abishai, ndughu yake Yoabu, tsa chilongotsi wa maasikali awala salasini iwadahile kwitowa pfinoghile kung'ondo. Yeye tsaketowa na iwanu miya ndatu kwa mghoha ghwake, kawakoma, naye tsakamanyika ka maasikali awala wadatu. 21 Apfo kamanyika ghendo ka apfila pfawamanyike maasikali wala salasini, naye kawa chilongotsi wawo, hata ka tsa si yumwe baye mna wala wadatu. 22 Naye Benaya, mwana wa Yehoyada, kulawa Kabizeeli, tsa asikali iyadahile kwitowa ghendo kung'ondo, iyatendile pfinu pfingi pfakukangawatsa. Tsakawakoma maasikali weli iwadahile kwitowa wa Moabu, na tsuwa limwe mna ghamatsuwa gha chipfeghetsi, tsakahulumka, kaghenda kumkoma isimba mpondo. 23 Pfipfila tsakamkoma Mmisiri yumwe, yane utali ka futi saba na nusu, na iyakindile mghoha mkulu mmoko mwake ighuli ka mfundatsi. Lekeni Benaya tsaghamghendela aku kana chilungu chiliyeka, tsakamboka mghoha aghwo, na kumkoma Mmisiri ayo kwa mghoha ghwake. 24 Aghano ghagho ghayatendile Benaya mwana wa Yehoyada yamanyike kubita maasikali awala Salasini. 25 Apfo, kamanyika mghati mwe maasikali awala selasini, hata ka ng'amanyike baye ka awala maasikali wadatu. Na Daudi kamwika yawe chilongotsi wa iwanu iwomkalitsa yeye. 26 Maasikali iwadahile ukwitowa wa Daudi tsa, Asaheli ndughu yake Yoabu, Elihanani imwana wa Dodo kulawa Betilehemu, 27 Shamoti kulawa Harodi, Helesi kulawa Peloni, 28 Ira, mwana wa Ikeshi kulawa Tekoa, Abieseri kulawa Anatoti, 29 Sibekai kulawa Hushati, Ilai kulawa Ahohi, 30 Maharai kulawa Netofai, Heledi, imwana wa Baana kulawa Netofai, 31 Itai, mwana wa Ribai, kulawa Gibea, wa likabila la Benjamini, Benaya kulawa Pilatoni, 32 Hurai kulawa pfikolongo pfa Gaashi, Abieli kulawa Aibati, 33 Asimaweti kulawa Baharumu, Eliaba kulawa Shaaliboni, 34 wana wa Yasheni kulawa Giloni, Yonatani, mwana wa Shagee kulawa Harari, 35 Ahiamu, mwana wa Sakari Harari, Elifali, mwana wa Uri, 36 Heferi kulawa Mekerati, Ahiya kulawa Peloni, 37 Hesro kulawa Karimeli, Naarai, mwana wa Esbai, 38 Yoeli, ndughu yake Natani kulawa Mibihari, mwana wa Hagiri, 39 Seleki kulawa Amoni, Naharai kulawa Beoroti, iyakalile mwihilika pfinu pfa ing'ondo pfa Yoabu, mwana wa Seruya, 40 Ira na Garebu wose walawa Yatiri, 41 Uria kulawa Hiti, Sabadi, mwana wa Ahilai, 42 Adina, mwana wa Shisa mkulu wa likabila lya Rubeni, aku tsakana wanu selasini, 43 Hanani, mwana wa Maaka, Yoshafati kulawa Mitina, 44 Usia kulawa Ashiterati, Shama na Yeieli, iwana wa Hotamu kulawa Aroeri, 45 Yediaeli na Yoha ndughu yake, wana wa Shimri kulawa Tizi, 46 Elieli kulawa Mahawi, Yeribai na Yoshafia iwana wa Elinaamu, Itima kulawa Moabu, 47 Elieli, Obedi, na Yaasieli Sobai.