1 Setani tsakabama yawatende Waisiraeli waghaye, kamtsongetsa Daudi yawapete iwanu wa Isiraeli. 2 Apfo Daudi kamlongela Yoabu na pfilongotsi wamwenga wa maasikali, "Ghendeni mkawapete Waisiraeli kulawa Beeri Sheba mbaka Dani. Kuya mtse mnongele na nimanye iwanu wali wangapi."

3 Lekeni Yoabu kalonga, "IMNDEWA yawongetse Waisiraeli mala miya imwe kubita pfawali sambi! Mkulu wangu mfalume, angu awa wose si watumwa wako baye? Hebali lelo kobama kutenda chinu achino na kuwahonza Waisiraeli wose watende nzambi?" 4 Lekeni chayalongile mfalume tsachiwa na ngupfu kubita Yoabu, apfo Yoabu koka, kaghenda mna isi yose ya Isiraeli, kuya koya Yerusalemu. 5 Yoabu kamkongela Daudi ka mna isi yose ya Isiraeli tsamna wamale milioni imwe na laki imwe iwodaha kwitowa na mna isi ya Yuda tsamna wamale laki nne na elufu sabini iwodaha kwitowa kwing'ondo. 6 Lekeni Yoabu ng'awapetile baye Walawi na Wabenjamini kwaapfila laghitso lya mfalume tsalimdesa ng'ani. 7 Imbuli ya ukupetighwa iwanu yoneka iha hambele ha Imulungu, apfo Imulungu kaitowa Isiraeli. 8 Daudi kamlongela Imulungu, "Nitenda nzambi ng'ulu kwa chinu achino chanitendile! Lekeni nokulomba undeghusile nene mtumwa wako inzambi ino, kwaapfila chanendile chinu cha ubotsi ghendo." 9 Apfo IMNDEWA tsakalonga na Gadi, nabii wake Daudi, kamlongela, 10 "Ughende ukamlongele apfino Daudi, nene IMNDEWA nomwing'a pfinu pfidatu naye yasaghule chimwe mna apfo pfidatu, na nene nimtsomtendela." 11 Apfo Gadi kamghendela Daudi kamlongela, "IMNDEWA kolonga pfino, ‘Usaghule chinu chimwe, 12 nzala ya miyaka midatu, au miyetsi midatu ya kuhingighwa na maadui tsako, iwatsokutowa na mimaghe yawo, au usaghule matsuwa madatu gha IMNDEWA ghayatsowatowa kwa lipanga lyake, na kuwaghalila utamu wihile muisi na kumtuma malaika wake yakome chila chinu mna isi yose ya Isiraeli’ Lelo ulamle na unyidike, kuya nene ng'ende nikamwidike ayula iyanitumile." 13 Daudi tsakamlongela Gadi, "Nina wogha mkulu! Ng'apfu nihighighwe na IMNDEWA, kwaapfila yeye kamema libatsi, lekeni uleke kundeka ngoghighwe na ghamoko gha iwanu." 14 Apfo IMNDEWA kawaghalila Waisiraeli utamu wihile, nawo uwakoma wanu elufu sabini. 15 Kuya Imulungu kamtuma malaika wake yakaghuhinye ghumji ghwa Yerusalemu na kuwakoma iwanu wake. Imalaika ayo hayang'ali yoghuhinya ghumji agho, IMNDEWA tsakalola, na kona usungu apfila iwanu pfawakomighwe, baho kamlongela malaika ayula iyang'ali yokoma iwanu, "Wime, yuitsa ghumoko ghwako" Imalaika ayo tsakema habehi na chibwalu cha ukubetela tsimbeghu cha Orinani Myebusi. 16 Daudi kenula tsinenge, kamwona malaika kema haghati mwe lilanga na muisi, aku kakinda lipanga mmoko mwake na kaligholosa mchanya mwa Yerusalemu. Baho Daudi na wanzehe wose iwapfalile maghunila, waghwa chiduli. 17 Daudi tsakamlongela Imulungu, "Apfi si nene baye yandapfile laghitso iwanu wapetighwe? Nene yuyo yanendile nzambi ng'ulu, na yanitendile ghehile. Lekeni iwanu awano iwali ka ng'olo tsawatendile choni? Nokulomba ghendo, ghwe IMNDEWA, Imulungu wangu, ghumoko ghwako ghundaghe nene na ghuwalaghe iwanu wa ikaye yangu, lekeni utamu auno wihile uleke kuwapata iwanu wako."

18 Baho imalaika ayo kamlongela Gadi yakamlongele Daudi yagheluke yakamtsengele IMNDEWA imatsabahu hane ichibwalu cha ukupetela tsimbeghu cha Orinani Myebusi. 19 Apfo Daudi katenda laghitso lya Imulungu, kagheluka kuchanya ka apfila IMNDEWA pfayamlongele. 20 Orinani hayang'ali yobeta ingano, baho kahunduka kamwona imalaika ayula. Yeye na iwanaghe wane tsawaghenda kwipfisa. 21 Kuya Daudi kamghendelela Orinani, naye hayalolile na kumwona Daudi, kalawa hana ichibwalu cha ukubetela, kaghenda ukumwinamila Daudi mbaka uhanga wake udonza hasi. 22 Daudi kamlongela, "Niutsile chibwalu chako cha ukubetela nimtsengela IMNDEWA imatsabahu, na utamu aula wihile ukomile iwanu umale."

23 Naye Orinani kamlongela Daudi, "Uchisole chibwalu achino, mkulu wangu mfalume uchitendele pfopfose pfaubama mwenyegho. Kuya nowalapfa ng'ombe wangu wawe nambiko ya ukulakatsighwa, na mibiki yangu ya kubetela iwe ngodi, na nokwing'a ingano iwe nambiko ya tsimbeghu. Pfose apfo nokwing'a."

24 Lekeni mfalume Daudi kamlongela Orinani, "Baye, nitsokuliha chila chinu kwa bei yake, sitsosola baye chinu chako chiwe cha IMNDEWA, au kumlapfila nambiko tsa ukulakatsighwa, bila nene kumlapfila chinu." 25 Apfo Daudi tsakamliha Orinani pfihande miya sita pfa nzahabu kwa kughula ichibwalu acho. 26 Kuya Daudi kamtsengela IMNDEWA imatsabahu hanu aho, na kamlapfila nambiko tsa ukulakatsighwa na tsa ukukala tseghamba. Kamlomba IMNDEWA naye katoghola chayamlombile kwa kughala ghumoto kulawa kulanga ghutsilakatse tsinambiko atsila hana imatsabahu. 27 Kuya IMNDEWA kamlaghitsa malaika wake, naye koyitsa lipanga hana iyala yake. 28 Chipindi acho, Daudi hayonile IMNDEWA katoghola chayamlombile akula kuna ichibwalu cha ukubetela cha Orinani Myebusi, kalapfa nambiko kuko. 29 Lihema lyatsengile Musa akula kunyika, na matsabahu ya nambiko tsa ukulakatsighwa, matsuwa agho tsapfing'ali hanu ha ukatambikila ako Gibeoni. 30 Lekeni Daudi ng'aghendile baye ako Gibeoni kumlomba Imulungu kwaapfila tsayang'ali yopfuka lipanga lya malaika wa IMNDEWA.