1 Awano hano wawo Walawi iwagholelighwe sang'ano ya ukukalitsa lilango. Kulawa lukolo lwa Kora, tsakukala Meshemia mwana wa Kore wa kaye ya Asafu. 2 Yeye tsakana wana wamale saba; imwanaghe chaudele tsa Zakaria, wa kabili Yedieli, wa kadatu Sebadia, wa kane Yetinieli, 3 wa tano Elamu na wa sita Yohanani na wa saba Elihoehoena. 4 Kuya Obedi Edomu naye tsakana wana wamale wanane: imwanaghe chaudele tsa Shemaya, wa keli Yehosabadi, wa kadatu Yoa, wa kane Sakari, wa tano Natanaeli, 5 wa sita Amieli, wa saba Isakari na wanane Peulethai. 6 Shemaya, imwanaghe pfipfila na tsakana wana wamale, nawo tsawawa pfilongotsi mna tsikaye tsa aba wawo, kwaapfila wawo tsa wanu iwotogholeka. 7 Shemaya, imwanaghe chaudele Obedi Edomu tsakana iwana sita: Otini, Rafaeli, Odedi, Elizabadi, ndughu tsawo Elihu na Semakia awano wawo tsawana uwetso mkulu. 8 Awawo wose iwo wana wa Obedi Edom: wawo na iwana wawo na iwatsukulu wawo, wose tsa sitini na weli. Wose tsawana uwetso mkulu na tsawana bapfu lya ukusang'ana. 9 Naye Meshelemia tsakana wana na ndughu tsake kumi na wanane wane uwetso mkulu wa ing'onde ayo. 10 Hosa mwana yumwe wa Merari tsakana wana wane: Shimri iyasaghulighwe na aba wake yawe mkulu hata ka si mwana chaudele baye, 11 wa kabili Hilikia, wa kadatu Tebalia na wa kane Sakaria. Iwana wose wa Hosa hamwe na ndughu tsake wose tsa kumi na wadatu. 12 Iwanu wano iwakalitse ghamalango kubitila iwakulu wawo, pfipfila tsaweng'ighwa tsisang'ano mna ing'anda ya IMNDEWA ka apfila ndungu tsawo Walawi pfawatendile. 13 Tsawasa tsisimbi tsilamle ikaya yachi ighenda kukalitsa lilango, na ng'awalolile baye ka ina wanu chidogho au wengi. 14 Isimbi ya ukukalitsa lilango lya mashaliki imghwila Shelemia na ikaya yake. Kuya isimbi ya ukukalitsa lilango lya kasikazini imghwila Sakaria mwanaghe yana ihekima. 15 Isimbi ya ukukalitsa lilango lya kusini imghwila Obedi Edomu, na isimbi ya ukukalitsa hanu ha ukwikila ipfijo iwaghwila iwanaghe. 16 Na isimbi ya ukukalitsa lilango lya maghalibi na lilango lya Shaleketi lili hana inzila yadando iwaghwila Shupimu na Hosa. Nawo tsawakalitsa kwa ukwibokelela. 17 Chila tsuwa tsahana Walawi sita iwakalitse lilango lya mashaliki, na Walawi wane iwakalitse lilango lya kasikazini, na wane iwakalitse lilango lya kusini, kuya Walawi weli weli iwakalitse hanu ha ukwikila ipfijo. 18 Hana ichibwalu ichilolesa lilango lya maghalibi, tsahana wanu wane iwokalitsa inzila na weli iwokalitsa chibwalu chenyegho. 19 Awano wawo iwanu wa ulukolo lwa Kola na lwa Merari iwakalitse ghamalango.

20 Walawi wayao, tsawekighwa wawe wakulu wa ihatsina ya Ing'anda ye Imulungu, na hatsina ya ipfinu ipfilapfighwe pfiwe pfa Imulungu. 21 Yehieli tsa chilongotsi wa ikaya ya Ladani ili mna lukolo lwa Gerishoni. 22 Iwanaghe Yehieli tsa Zetamu na Yoeli, awo tsawang'ali walolesagha ihatsina ya ing'anda ya IMNDEWA. 23 Pfipfila sang'ano tsatsigholighwa kwe iwanu wa kolo tsa Wasiria, Waishari, Waeburoni na Wauzieli. 24 Shebueli, mwana wa Gerishoni, mtsukulu wa Musa, tsa mkulu wa tsihatsina atso. 25 Na ndughu yake tsakakala Eliezari iyakalile aba wa Rehabia, iyamweleke Yeshaya, Yoramu, Zikiri, na Shelomoti. 26 Shelomoti na ndughu tsake, wawo wang'ali walolesa ihatsina ya ipfinu ipfikighwe pfiwe pfa Imulungu na mfalume Daudi, na pfilongotsi wa tsikaye, iwakalile pfilongotsi wa masikali elufu na masikali miya, na ipfikighwe na pfilongotsi wangi wa maasikali. 27 Ipfinu pfimwenga pfawobokile kung'ondo tsawapfilapfa pfiwe pfa ukutsengela keli ing'anda ya IMNDEWA. 28 Na chila chinu chayalapfile nabii Samweli, na Shauli mwana wa Kishi, na Abineri mwanaghe Neri na Yoabu mwana wa Seruya, pfose pfing'ali pfitunzighwa na Shelomiti na ndughu tsake.

29 Kulawa kuna lukolo lwa Waishari, Kenenia na iwanaghe tsaweng'ighwa sang'ano tsa ukutawala ka wakulu wa wanu na walamtsi wa Waisiraeli. 30 Kulawa kuna lukolo lwa Waeburoni, Hashabia na ndughu tsake elufu imwe na miya saba, wanu wose wano tsawatogholeka na tsaweng'ighwa sang'ano ya ukwimila isi ya Waisiraeli ikalile maghalibi mwa ghumto Yoridani. Tsawemila sang'ano tsose tsa IMNDEWA na sang'ano tsa mfalume Daudi. 31 Kulawa kuna lukolo lwa Waeburoni, Yeria tsa mkulu wa tsikolo na tsikaya tsawo, na mna ghumwaka ghwa alubaini ghwa ukutawala mfalume Daudi, iwanu wanza ukubama mna ulukolo lwao na woneka iwamale iwotogholeka mna ulukolo lwa Heburoni ako Yezeri mna isi ya Gileadi. 32 Mfalume Daudi tsakamsaghula Yeriya na ndughu tsake elufu mbili na miya saba, iwotogholeka na pfilongotsi wa tsikolo, wemile ghose aghala ighali gha Imulungu na aghala ighali gha mfalume Daudi mna isi tsose tsa Warubeni, Wagadi na nusu ya kabila lya Manase, itsikalile mashaliki mwa ghumto Yoridani.