1 Benjamini tsakana wana watano: Bela, mwanaghe chaudele, Ashibeli wa kabili, na Ahara wa kadatu, 2 Noha wa kane na Rafa wa tano.

3 Bela naye tsakana wana awano: Adari, Gera, Abihudi, 4 Abishua, Naamani, Ahoa, 5 Gera, Shufamu na Huramu. 6 Aghuno tsa mweleko ghwa Ehudi. Awano tsa pfilongotsi wa tsikolo tsa awala iwang'ali wokala Geba, lekeni tsawaghoghighwa na waghalighwa kuna isi ya utumwa ya Manahati, 7 Naamani, Ahiya na Gera. Gera, aba wawo tsa Uza na Ahihudi, wawo iyawalongotse ukughenda ako. 8 Shaharaimu tsakawawinga wapinga wake, Hushimu na Baara mna isi ya Moabu. Kuya kuko tsakeleka wana wamale. 9 Tsakeleka na Hodeshi, naye kamwelekela wana saba: Sibia, Mesha, Malikamu, 10 Yeusi, Sakia na Mirima. Kuya iwanaghe wose awano tsawawa wakulu wa tsikolo. 11 Shaharaimu kwa mwehe wake Hushimu tsakapata wana wangi weli: Abitubu na Elipaali. 12 Wana wamale wa Elipaali tsa wadatu: Eberi, Mishamu na Shemedi, Shemedi iyatsengile ghumji ghwa Ono na Lodi, hamwe na ipfijiji ipfili mmbalimbali mwake.

13 Beria na Shema tsawakala iwanu wa kaye itsing'ali tsikala mna imiji ya Aiyaloni, na kuwawinga wenyekaye wa ghumji ghwa Gati. 14 Na iwana wa Beria iwo awano: Ahio, Shashaki, Yeremoti, 15 Sebadia, Aradi, Ederi, 16 na Mikaeli, Ishipa na Yoha pfipfila tsa wana wangi wa Beria. 17 Zebadia, Meshulamu, Hisiki, Heberi, 18 Ishinerai, Izilia na Yobabu awano tsa wana wa Epaali. 19 Yakimu, Zikiri, Zabidi, 20 Elienai, Siletai, Elieli, 21 Adaya, Beraya na Shimirati tsa wana wa Shimei. 22 Ishipani, Eberi, Elieli, 23 Abidoni, Zikiri, Hanani, 24 Hanania, Elamu, Antotiya, 25 Ifideya, Penueli awano tsa wana wa Shashaki. 26 Shamisherai, Sheharia, Atalia, 27 Yaareshia, Eliya na Zikri tsa iwana wa Yerohamu. 28 Awo tsa wakulu wa tsikolo tsawo kwa ukulola pfeleko pfawo. Tsawawa wakulu na tsawakala Yerusalemu.

29 Yeieli tsakandusa ukutsenga ghumji ghwa Gibeoni. Mwehe wake tsakakemighwa Maaka. 30 Mwanaghe chaudele tsakakemighwa Abidoni. Wanaghe wamwenga tsa Suri, Kishi, Baal, Nadabu, 31 Gedori, Ahio, Sekeri, 32 na Mikiloti aba wake Shimea. Awano pfipfila tsawakala Yerusalemu habehi na wanu wamwenga wa lukolo lwawo.

33 Neri tsakamweleka Kishi, naye Kishi tsakamweleka Shauli. Shauli tsakana wana wane: Yonatani, Malikishua, Abinadabu, na Eshibaali. 34 Yonatani tsakamweleka Meribi Baali, naye Meribi Baali tsakamweleka Mika. 35 Mika naye tsakana wana wane: Pitoni, Meleki, Terea na Ahazi. 36 Ahazi tsakamweleka Yehoada. Naye Yehoada tsakaweleka Alemeti, Asimaweti, Zimiri. Naye Zimiri tsakamweleka Mosa. 37 Mosa tsakamweleka Binea, naye Binea tsakamweleka Rafa, na Rafa tsakamweleka Eleasa, naye Eleasa tsakamweleka Aseli. 38 Iwana wa Aseli tsa sita: aghano ghagho mataghwa ghawo: Asirikamu, Bokeru, Isimaeli, Shearia, Obadia na Hanani. Wose awano tsa wana wa Aseli. 39 Nawo iwana wa Esheki, ndughu yake Aseli, tsa wadatu. Chaudele wake tsakakemighwa Ulamu, wa kabili Yeushi na wa kadatu Elifeleti. 40 Wana wa Ulamu tsawakala iwanu iwadahile ukwitowa pfinoghile kung'ondo, na iwakwasa tsiminde pfinoghile. Tsakana wana na watsukulu wengi, wose tsawapfika miya imwe na hamsini. Awo wose tsawalawa mna lukolo lwa Benjamini.