Gênesis 3

Ocheden-junung ọttạra ikwanạng kwẹ atto inyina

1 Wa ijọhk idongu iyọhnga mkpaten phyibh s’Ọvaar Ubinọkpaabyi kk’usia. Wa asẹ ita ibạbh ikwanạng bẹ́, "Kọngkẹ Ubinọkpaabyi kk’bạnga obena bẹ́, abạnga nạngẹ ichidwuk chidede ma owonu ngwa achi?"

2 Ikwanạng nwọ ubhina ijọhk bẹ́, "Ẹngẹ! Oche ngwọ núdia! Ubinọkpaabyi obeni mạna bẹ́, m’ankke-okke anchi ichidwuk chidede ma owonu, 3 okhenka, Ubinọkpaabyi obeni mạna bẹ́ amạna nạngẹ achidwuk p’ichi ch’ebe k’ewonuttem ọbọhk antwu, deja, m’ampe-ope."

4 Ijọhk nnọ ibạra iben ikwanạng nwọ bẹ́, "Abạnga mape e, 5 okhenka ode bẹ́, Ubinọkpaabyi osong ma bẹ́ de abạnga achi achidwuk mbọ, idik m’itto bạnga iyaan bẹ ttaaan, abạnga n’abạra ade masẹ Ubinọkpaabyi kw’osong ijibha ọttạra ipyibha."

6 Okpe kw’ikwanạng nwọ ose bẹ́, achidwuk mbọ ajibhi ichia, abẹ abạra anyạnẹ k’ichen, ọttạra bẹ́, m’ẹgba ẹnạng ọnạng esonga, ọtạkha achidwuk bạnọ uchi, ọbạra ọtạkha bạnọ ọnạng udim kwẹ, kw’uning ma, udim ọbạra uchi. 7 Ma wọ achen attaanẹ bẹ ma ibua-ibua, abẹ atin bẹ́, abẹ n’aning irinikhum. Abẹ n’atạk akwongutọhng p’ichi ch’fig, abọhra abubha irinikhum chabẹ.

8 Masẹ n’ukpir k’ẹchọhkha, ujunung nwọ ọttạra ikwanạng kwẹ n’abhaang s’Ọvaar Ubinọkpaabyi n’osenga ma owonu ngwọ, abẹ arạbh ata attubha k’ottemkwẹ kw’nchi s’owonu. 9 Ma wọ Ọvaar Ubinọkpaabyi oyeri ujunung nwọ, ọbạbh-ẹ bẹ́, "Ọma khẹ nnwạn o?"

10 Ujunung nwọ, ọpọhn-ẹ bẹ́, "Mmaang ntwạkhọ sọ s’n’asenga k’owonu, ojor-m, ukwuru bẹ́, nning irinikhum, ẹgwọ nnạbhọ nttubha e."

11 Ọvaar Ubinọkpaabyi n’ọbạbh-ẹ bẹ́, "Anẹ wọ otekh-ọ bẹ aning irinikhum? Kk’achidwuk p’ichi njọ nnạngẹ bạnga nkhạkhạma bẹ́, abạnga nạngẹ achi, achia o?"

12 Ujunung nwọ ọpọhn-ẹ bẹ́, "Ikwanạng nwọ kw’anạng-m, ẹwọ ọnạng-m achidwuk p’abin ma ichi njọ bạra nchi e."

13 Ma wọ Ọvaar Ubinọkpaabyi n’ọbạbhọ ikwanạng nwọ bẹ́, "Bạng udik gwọ asi ma?"

Ikwanạng nwọ ọpọhn-ẹ bẹ́, "Ijọhk rọ ibọhr-m bạra nchi achidwuk mbọ."

Ubinọkpaabyi ọkpaar iponga sabẹ

14 Ma wọ Ọvaar Ubinọkpaabyi obeni ijọhk bẹ́,

"Ukwuru udik ngwa kw’asi maa,

m’upyibh ọnạng-ọ, ọyọhnga nten s’oter phyibh ọttạra mkpaten phyibh,

ọma m’n’atima ẹfhạr atwạr k’isisek,

abạra achi idọhngọ,

k’akpen pọ phyibh.

15 M’nge iwawuna k’ngekha s’ọma ọttạra ikwanạng nwọ.

Iva pọ ọttạra pẹ m’aninga

k’iwawuna ayok abẹ.

Nnwa kwẹ m’utwukhu echo chọ,

ọma m’agakhẹ afhokkukkọrọ pẹ."

16 Ubinọkpaabyi n’obeni ikwanạng nwọ bẹ́,

"Amma m’nttạr-ọ irem sididen

k’okpe kwidede kw’m’amaan nnwa.

Tạrr oseng mạma, mạna aror bẹ́, agbạkha ifor udim kwọ abẹ,

ẹma m’oyongu ma ode ochonạng kwọ."

17 Ubinọkpaabyi oben Adam bẹ́,

"Ọma akhọhmọ ikwanạng kwọ itọhng,

achi ichidwuk ch’nkhạmọ-ọ bẹ́ nạngẹ achi,

ma wọ, kk’isisek ẹmma-nnaakha ukwuru ọma.

Ọma m’ase irem s’ọtọhm brasẹ ase uchiattọhk f’m’achi k’akpen pọ phyibh.

18 Nsidima ọttạra akkaangẹ m’amen ma isisek.

Uchiattọhk pfọ m’ode asạsaarẹ p’owonu.

19 Ọma mạna asi ọtọhm tạạr asạnẹ iruk,

brasẹ ase f’machi,

tạma mantọhmma kpira k’okpe kw’m’akpa nnạm k’isisek,

ukwuru bẹ́, abẹ atim idọhngọ asi-ọ,

ọma ade idọhngọ,

m’abạra akpa nnạm ma idọhngọ nnọ."

20 Wa Adam*3.20 K’eHiburu, Adam ode oche kw’abẹ ayeri bẹ́, ujunung. okpe ikwanạng kwẹ Iv*3.20 K’eHiburu, Iv uyini, akpen., ukwuru bẹ́, ẹma wọ m’ode ọkka kw’anạng phyibh p’arukhu akpen.

21 Wa Ọvaar Ubinọkpaabyi ọtạk atenkpa, utima usi ekpo igiapẹ, ọnạng Adam ọttạra ikwanạng kwẹ, ọfha abẹ abubha nninikhum sabẹ.

Ubinọkpaabyi ukhubhu Adam ọttạra Iv k’owonu kw’Iden

22 Ma wọ Ọvaar Ubinọkpaabyi obeni bẹ́, "Ujunung nwa n’ode masẹ amạna mba oyeni, kk’ijibha ọttạra ipyibha osonga. Khẹ ọbọhk mạ́ntte onemi ọbọhk ọphya achidwuk ma ichi ch’akpen uchi, deja, m’uruk akpen ipimmanitor."

23 Ma wọ Ọvaar Ubinọkpaabyi ukhubhu Adam k’owonu kw’Iden, ọfha ọta utubh isisek s’utim usi-ẹ. 24 Masẹ Ubinọkpaabyi ukhubhu Adam o, ochok chẹrubim k’ukhubha kw’okpebhadudon n’uyin, ọttạra ọkkangkkang-kkro kw’ode masẹ okpondaak kw’n’ọyạma bẹ nuuurrrr ọbhạkhẹ iriringi okkeri k’ukhubha kwidede, ọfha ọkpa eden ch’eten k’ibyi s’ichi ch’akpen aning.