Lucas 24

Kuenda kuya ku Emausi

13 Ha litangua lijevene vandongisi vavali va Yesu vakele na kuya ku limbo lije livatumbuile nguavo Emausi, ntunda yapuile makilomita likumi na imo kuhuma ku Yelusalema. 14 Vakele nakuhandeka kuli umo na mukuavo ha viuma vioshe vije vialingiuile. 15 Tele vacili nakuhandeka na kuliyongola, Yesu uezile hayehi navo nakuenda navo. 16 Vamumuene vuno honi kuvamuzivukile. 17 Yesu uahandekele kuli vakevo nguendi, "Nkuma vimpande muka muli nakuhandeka oku muenda?" Vemanene kaha vihanga viavo viasholokele mu vusiua. 18 Kaha umo uavo lizina liendi Kolopase, uamuhuile nguendi, "Nkuma yove u mungezi muno mu Yelusalema ndi? Muomu yove lika uje kazivuka vije vinalingiua mu matangua ano."

19 Kaha uavehuile nguendi, "Viuma muka?"

Vamutavele nguavo, "Via Yesu uaku Nazaleta. Yala ou uapuile kananguizi ua nzili muvilinga na mu mezi kuli Njambi naku vantu voshe 20 Kaha vakuluntu vetu va vasasendote na vaka kuyula vamuhanene kuli nguvulu linga amuhise na kumutsiha, kaha vamushukikile ha cilindakano. 21 Vuno honi tuatsilielele nguetu ikeye akapatula Isaleli! Kaha lelo linapu litangua lia mucitatu kuhuma haje vialingiuile viuma evi. 22 Vampuevo vamo hakati ketu vatukomokesele, vamenekelele ku cihilo cimene mene, 23 vuno honi kuvakauanene muvila uendi. Kaha vahilukile nguavo vakamuene cimona ca tungelo vaje vavalekele nguavo ali nakuyoya. 24 Kaha vamo hakati ketu vayileko ku cihilo, kaha vakauanene ngue muje muvahandekelele vaje vampuevo, vuno honi kuvamumuene."

25 Ambahoni Yesu uahandekele kuli vakevo nguendi, "Yeni vilema, musimbula vatihoni kutsiliela vije vioshe vivahandekele tunanguizi! 26 Nkuma Kilistu kapandele kuyanda ha viuma evi nakukovela mu vumpau vuendi ndi?" 27 Kaha Yesu uaputukile kuvalumbuinina viuma vioshe vije vahandekele mu visoneka hali ikeye, kuputukila mu mavulu a Mosesa na kutuala ku visoneka via tunanguizi voshe.

28 Omo vahetele kuyehi na limbo kuje vakele nakuya, Yesu ualingile ngue atuvakana kamandende kuya kulutue, 29 Vuno honi vamulombele na kuhandeka nguavo, "Tumama netu muomu cinapu cinguezi kaha na litangua liatoko." Kaha uayile na kukala navo. 30 Omo uatumamene navo mukulia kaha uambatele mbolo naku ikuisula uaipazuile na kuvahanayo. 31 Kaha mesho avo ashokolokele vazivukile nguavo nkumani ikeye, vuno honi ualavukile kuli vakevo. 32 Kaha valihandekesele umo na mukuavo nguavo, "Nkumani mukemo mitima yetu yovuile kuvuahelela cikuma omo uakele nakuhandeka netu mu ngila na kutulumbunuina viuma via mu Visoneka."

33 Vakatukile ha ntsimbu ijevene vahilukile ku Yelusalema, vauanene vandongisi likumi na umo vanalikungulula hamo na vakuavo veka naua. 34 Vahandekele nguavo, "Muavusunga vene Muene nasanguka! Nalisholola kuli Simoni!"

35 Kaha vaje vavali vambuluile vije vialingiuile mu ngila, namuje vazivukilile nguavo nkuma ikeye Muene Yesu omo uatavuile mbolo.