ଆଦି 29

ଜାକୁବ୍‌ ଲାବନ୍‌ ଇଞ୍ଜ ଏକାତାନ୍‌

1 ଇଦାଂପାଚେ ଜାକୁବ ହାଜ଼ିତ ହାଲ୍‌ଜି ୱେଡ଼ାହନିନିପ ଦିଗ୍‌ନି ମାନାୟାର୍ତି ଦେସ୍‌ତ ଏକାତାନ୍ । 2 ହେବେଣ୍ଡାଂ ହେୱାନ୍‌ ହୁଡ଼୍‌ତାନ୍‌, ଆରେ ହୁଡ଼ାଟ୍‌, ଜମି ବିତ୍ରେ ର କୁଇ, ଆରେ, ହୁଡ଼ାଟ୍‌, ହେ ଲାଗାୟ୍‌ ତିନି ମାନ୍ଦା ମେଣ୍ଡାଙ୍ଗ୍‌ ମାକ୍‌ତିକ୍‌ନା; ଇନେକିଦେଂକି ଲକୁ ମେଣ୍ଡାକାଂ ହେ କୁଇତାଂ ଏସ୍‌ ଉଟ୍‌ପାନାର୍‌; ହେ କୁଇ ମୁମ୍‌ଦ ର ଗାଜା କାଲ୍‌ ପ୍ଡାକ୍ୟାଜ଼ି ମାନ୍‌ଗାନାତ୍‌ । 3 ହେ କୁଇ ଲାଗାୟ୍‌ ସବୁ ମାନ୍ଦା ରବେ ରୁଣ୍ଡାନିକ୍‌; ଆରେ, ଲକୁ ତା ମୁମ୍‌ଦାଂ କାଲ୍‌ ଗୁଚାୟ୍‌ କିଜ଼ି ମେଣ୍ଡାକାଂ ଏସ୍‌ ଉଟ୍‌ପାନାର୍‌, ଆରେରଗ କୁଇ ମୁମ୍‌ଦ ମାଚି ବାହାତନେ କାଲ୍‌ଦିଂ ପ୍ଡାକ୍‌ନାର୍‌ ।

4 ଜାକୁବ ହେୱାରିଙ୍ଗ୍‌ ୱେନ୍‌ବାତାନ୍‌, "ଏ ଟଣ୍ଡାର୍‌, ଏପେଙ୍ଗ୍‌ ଇମ୍‌ଣି ବାହାନି ଲକୁ ?" ହେୱାର୍‌ ଇଚାର୍‌, "ଆପେଙ୍ଗ୍‌ ହାରଣ୍‌" ଗାଡ଼ଦନି ଲକୁ । 5 ଲାଗିଂ ଜାକୁବ ୱେନ୍‌ବାତାନ୍‌, "ଏପେଙ୍ଗ୍‌ ନାହର୍‌ତି ପୁତି ଲାବନଙ୍ଗ୍‌ ଚିନ୍‌ କିତାଦେର୍ଣ୍ଣା କି ?" ହେୱାର୍‌ ଇଚାର୍‌, "ଆପେଙ୍ଗ୍‌ ହେୱାନିଙ୍ଗ୍‌ ପୁନାପ୍‌ ।" 6 ଜାକୁବ ୱେନ୍‌ବାତାନ୍‌, "ହେୱାନ୍‌ ହାର୍‌ ମାନାନ୍‌ ତ ?" ହେୱାର୍‌ ୱେଚ୍‌ଚାର୍‌, "ହାର୍‌ ମାନାନ୍‌," ଇଦାଂ "ହୁଡ଼ା, ତା ଗାଡ଼୍‌ହି ରାହେଲ୍‌ ମେଣ୍ଡା ମାନ୍ଦା ଆସ୍ତି ୱାନାତା ।" 7 ହେଏଚେକାଡ଼୍‌ଦ ଜାକ୍‌ବ ଇଚାନ୍‌, "ହୁଡ଼ାଟ୍‌, ନଂ ବେସି ୱେଡ଼ା ମାନାତ୍‌; ମେଣ୍ଡାଙ୍ଗ୍‌ ରବେ କିନାକା ସମୁ ଆଉତେ; ଏପେଙ୍ଗ୍‌ ମେଣ୍ଡାକାଂ ଏଜ଼ୁଙ୍ଗ୍‌ ଉଟ୍‌ପିସ୍‌ ଆରେରଗ ହାରାୟ୍‌କିଦେଂ ଅୱାଟ୍‌ ।" 8 ମତର୍‌ ହେୱାର୍‌ ଇଚାର୍‌, "ହେଦାଂ ଆପେଙ୍ଗ୍‌ କିଦେଂ ଆଡୁପ୍‌; ୱିଜ଼ୁ ମାନ୍ଦା ରବେ ଆନାକା କାସି ମାଞ୍ଜେଙ୍ଗ୍‌ ଆନାତ୍‌; ତାପାଚେ କୁଇ ମୁମ୍‌ତାଂ କାଲ୍‌ ଗୁଚାୟ୍‌ କିୟାନାତ୍‌, ତାଆତିସ୍‌, ଆପେଙ୍ଗ୍‌ ମେଣ୍ଡାକାଂ ଏଜ଼ୁଙ୍ଗ୍‌ ଉଟ୍‌ପାନାପ୍‌ ।"

9 ଜାକୁବ ହେୱାର୍‌ ଲାହାଂ ରବାନି କାତାବାର୍ତା କିନାନା, ଇ ବିତ୍ରେ ରାହେଲ୍‌ ତା ଲାତ୍ରାହିତି ମେଣ୍ଡାଙ୍ଗ୍‌ ମାନ୍ଦା ଅଜ଼ି ଏକାତାତ୍‌, ଇନେକିଦେଂକି ହେଦେଲ୍‌ ମେଣ୍ଡା ଗଡ଼୍‌ୟା ମାଚାତ୍‌ । 10 ହେଏଚେକାଡ଼୍‌ଦ ଜାକୁବ ତା ମାମାହି ଲାବନତି ଗାଡ଼୍‌ ରାହେଲ୍‌ତିଂ ଆରି ମାମାହିତି ମେଣ୍ଡା ମାନ୍ଦାତିଂ ହୁଡ଼୍‌ଜି ଲାଗେ ହାଲ୍‌ଜି କୁଇ ମୁମ୍‌ନି କାଲ୍‌ ଗୁଚାୟ୍‌ କିଜ଼ି ମାମାହି ଲାବନତି ମାନ୍ଦାତିଂ ଏଜ଼ୁଙ୍ଗ୍‌ ଉଟ୍‌ପାତାନ୍‌ । 11 ଇଦାଂପାଚେ ଜାକୁବ ୱାରିତାଂ ରାହେଲ୍‌ତିଂ ଡନ୍‌ଜି ଗାଜା କାଟ୍‌ତାଂ ଆଡ଼୍‌ବେଦେଂ ଲାଗାତାନ୍‌ । 12 ଆରେ, ଜାକୁବ ଇନେନ୍‌ ତା ଲାତ୍ରାହିତି କୁଟୁମ୍‌ ଆରି ରିବିକାତି ମେହି, ଏଲେଙ୍ଗ୍‌ ଜାଣା ହିତାନ୍‌; ହେବେଣ୍ଡାଂ ରାହେଲ୍‌ ହନ୍‌ଚି ହାଲ୍‌ଜି ତା ଲାତ୍ରାହିଂ କାବୁର୍‌ ହିତାତ୍ । 13 ହେବେ ଲାବନ ତା ବାଣ୍‌ଜା ଜାକୁବତି କାବୁର୍‌ ୱେନ୍‌ଜି ହେୱାନ୍‌ ହାଙ୍ଗେ ବେଟ୍‌ ଆଦେଂ ହନ୍ତାନ୍‌, ଆରେ, ହେୱାନିଙ୍ଗ୍‌ ପମ୍‌ଜି ଆରି ଡନ୍‌ଜି ତା ଇଞ୍ଜ ଅସିହାଚାନ୍‌; ପାଚେ ହେୱାନ୍‌ ୱିଜ଼ୁ କାତାଂ ଲାବନତିଂ ୱେଚ୍‌ଚାନ୍‌ । 14 ହେବେ ଲାବନ ଇଚାନ୍‌, "ଏନ୍ ହାତେନେ ମା ନେତେର୍‌ ଆରି ଜେଇଲାକେ ।" ଲାଗିଂ ଜାକୁବ ତା ଇଞ୍ଜ ମାସେକ୍‌ ପାତେକ୍‌ ବାହା କିତାନ୍‌ ।

ଜାକ୍‌ବ ରାହେଲ୍‌ ଆରି ଲେୟାତିଂ ବିବାତାନ୍‌

15 ଇଦାଂପାଚେ ଲାବନ ଜାକୁବଂ ଇଚାନ୍‌, "ଏନ୍‌ ନା କୁଟୁମ୍‌ ଇଞ୍ଜି କି ଉପ୍‌କା ବୁତିତାଂ ନା ଆଡ଼ିଏନ୍‌ କାମାୟ୍‌ କିନାୟ୍‌ ? ଲାଗିଂ କି ବୁତି ଅନାୟ୍‌ ? ହେଦାଂ ୱେଚ୍‌ଚା ।" 16 ହେ ଲାବନତି ରିଣ୍ଡେକ୍‌ ଗାଚ୍‌କୁ ମାଚିକ୍‌; ପାଣ୍‌ୱାତି ତର୍‌ ଲେୟା, ହାରୁକାଦେଲ୍‌ ତର୍‌ ରାହେଲ୍‌ । 17 ଲେୟା କାଣି ଲାକେ, ମତର୍‌ ରାହେଲ୍‌ ହଲ୍‌ନାକା ଆରି ଡ଼ିଞ୍ଜ୍‌ନାକା ମାଚାତ୍‌ ।

18 ଆରେ ଜାକୁବ ରାହେଲ୍‌ତିଂ ଜିଉନତାନ୍; ଇଦାଂକାଜିଂ ହେୱାନ୍‌ ଉତର୍‌ ହିତାନ୍‌, "ନି ହାରୁ ଗାଡ଼୍‌ ରାହେଲ୍‌ କାଜିଂ ଆନ୍‌ ସାତ୍‌ ବାର୍ହୁ ନି ଆଡ଼ିଏନ୍‌ କାମାୟ୍‌ କିନାଙ୍ଗ୍ ।"

19 ହେବେ ଲାବନ ଇଚାନ୍‌, "ବିନ୍‌ ଲଗାଂ ଦାନ୍‌ ହିନି ବାଟା ନିଂ ଦାନ୍‌ କିନାକା ଆଦିକ୍‌ ହାର୍‌; ନା ଲାଗାୟ୍‌ ମାନା ।" 20 ଇଲାକେ ଜାକୁବ ରାହେଲ୍‌ କାଜିଂ ସାତ୍‌ ବାର୍ହୁ ଆଡ଼ିଏନ୍‌ କାମାୟ୍‌ କିତାନ୍‌; ଆରେ, ରାହେଲ କାଜିଂ ତାଦାଂ ଇଲାକେ ଜିଉନନାକା ମାଚାତ୍‌, ଜେ ହେ ସାତ୍‌ ବାର୍ହୁ ତା କାଜିଂ ମାତର୍‌ ଅଲପ୍‌ ଦିନ୍‌ ଲାକେ ମାନେ ଆତାତ୍‌ ।

21 ଇଦାଂପାଚେ ଜାକୁବ ଲାବନତିଂ ଇଚାନ୍‌, "ନାଦାଂ ସବୁ ଦିନ୍‌ନି କାଡ଼୍‌ ପୁରା ଆତାତ୍‌, ନଂ ନା ଡକ୍ରି ନାଂ ହିଦା, ଆନ୍‌ ତା ଲାହାଂ ହୁଞ୍ଜ୍‌ନାଙ୍ଗ୍‌ ।" 22 ହେବେଣ୍ଡାଂ ଲାବନ ହେ ବାହାନି ୱିଜ଼ାର୍‌ ଲକ୍‌ତିଂ ରୁଣ୍ଡାୟ୍‌ କିଜ଼ି ବଜି ଜାଲ୍‌ଦି କିତାନ୍‌ । 23 ମ୍ଡିକାଲିଂ ହେୱାନ୍‌ ତା ଗାଡ଼୍‌ହି ଲେୟାତିଂ ତାସି ଜାକୁବ ଲାଗାୟ୍‌ ତାହିୱାତାନ୍‌; ଆରେ, ଜାକୁବ୍‌ ତା ଲାହାଂ ହୁନ୍‌ଞ୍ଚାନ୍‌ । 24 ଆରେ ଲାବନ୍‌ ତା ଗାଡ଼୍‌ହି ଲେୟାତି ଆଡ଼ିଏନ୍‌ ଆନି କାଜିଂ ସିଲ୍ପା ତର୍‌ନି ତା ଆଡ଼ିୟାଣିଂ ହିତାନ୍‌ । 25 ମାତର୍‌ ଅଜଡ଼୍‌ ଆତିଲେ, ହୁଡ଼୍‌ତାନ୍‌, ହେଦେଲ୍‌ ତ ଲେୟା । ପାଚେ ଜାକୁବ ଲାବନତିଂ ଇଚାନ୍, "ଏନ୍‌ ନା ଲାହାଂ ଏଲେଙ୍ଗ୍‌ ଇନା ବେବାର୍‌ କିତାୟ୍‌ନା ? ଆନ୍‌ ଇନାକା ରାହେଲ୍‌ କାଜିଂ ନି ଆଡ଼ିଏନ୍‌ କାମାୟ୍‌ କିୱାତାଂନା; ଲାଗିଂ ଇନେକିଦେଂ ନାଂ ବୁଲାୟ୍‌ କିଜ଼଼ି ଇଞ୍ଚାୟ୍‌ ?" 26 ହେବେଣ୍ଡାଂ ଲାବନ ଇଚାନ୍‌, "ପାଣ୍‌ୱା ମାନୁ ମାନୁ ହାରୁକାଦ୍‌ଲିଂ ବିବା କିନାକା ମା ଦେସ୍‌ନି ବେବାର୍‌ ଆକାୟ୍‌ । 27 ଇବେନି ସାତ୍‌ ଦିନ୍‌ ପୁରା କିଆ, ଇବେଣ୍ଡାଂ ପାଚେ ଜଦି ଆରେ ସାତ୍‌ ବାର୍ହୁ ନାଦାଂ ଆଡ଼ିଏନ୍‌ କାମାୟ୍‌ କିନାୟ୍‌, ତେବେ ରାହେଲ୍‌ତିଂ ପା ନିଂ ହିଦ୍‌ନାଙ୍ଗ୍‌ ।" 28 ହେବେ ଜାକୁବ ହେ ବାନି ସାତ୍‌ଦିନ୍‌ ବାର୍ତି କିତାନ୍‌; ତାପାଚେ ଲାବନ ତା ଲାହାଂ ତା ଗାଡ଼୍‌ହି ରାହେଲ୍‌ତିଂ ବିବା କିଜ଼ି ହିତାନ୍‌ । 29 ଆରେ, ରାହେଲ୍‌ତି ଆଡ଼ିୟାଣି ଆନି କାଜିଂ ଲାବନ ତା ବିଲ୍‌ହା ତର୍‌ନି ଆଡ଼ିୟାଣିଂ ହିତାନ୍‌ । 30 ହେବେ ହେୱାନ୍‌ ରାହେଲ୍‌ତିଂ ପା ହୁନ୍‌ଞ୍ଚାନ୍‌ ଆରି ଲେୟାତାଂ ରାହେଲତିଂ ଆଦିକ୍‌ ଜିଉନତାନ୍‌; ଆରେ, ଆରେ ସାତ୍‌ ବାର୍ହୁ ଲାବନତି ଆଡ଼ିଏନ୍‌ କାମାୟ୍‌ କିତାନ୍‌ ।

ଜାକ୍‌ବତି ହିମ୍‌ଣାୱାକ୍‌ଡ଼ା

31 ଇଦାଂପାଚେ ନିତ୍ରେମାପ୍ରୁ ଲେୟାତିଂ ଇଣ୍‌ ହୁଡ଼୍‌ଜି ହେଦେଲିଂ ଏସ୍‌ପିସ୍ତେଙ୍ଗ୍‌ ସାକ୍ତି ହିତାନ୍‌; ମତର୍‌ ରାହେଲ୍‌ ବାଞ୍ଜି ଆତାତ୍‌ । 32 ଇଦାଂକାଜିଂ ଲେୟା ଏସ୍‌ପିସ୍ତି ହିମ୍‌ଣା ଗାଟାତାତ୍‌, ତା ତର୍‌ ରୁବେନ୍‌*29:32 ଇଚିସ୍‌ ମାଜ଼ିଙ୍ଗ୍‌ ହୁଡ଼ା ମାଜ଼ିଙ୍ଗ୍‌ ଚଚ୍‌ଚି ହିତାତ୍‌; ଇନେକିଦେଂକି ହେୱାନ୍‌ ଇଚାତ୍‌, "ନିତ୍ରେମାପ୍ରୁ ନା ଦୁକ୍‌ ହୁଡ଼୍‌ଦାତାନ୍ନା; ନଂ ନା ଡକ୍ରା ନାଂ ଜିଉନଦ୍‌ନାନ୍‌ ।" 33 ଆରେ, ହେୱାନ୍‌ ଆରେରଗ ଏସ୍‌ପିସ୍ତି ହିମ୍‌ଣା ଗାଟାଜ଼ି ଇଚାତ୍‌, "ଆନ୍‌ ଇଣ୍‌ନିକାଂ, ଇଦାଂ ନିତ୍ରେମାପ୍ରୁ ୱେନ୍‌ଜି ନାଂ ଇ ମାଜ଼ିଙ୍ଗ୍‌ ହିତ୍‌ତାନ୍‌," ଲାଗିଂ ହେୱାନ୍‌ ତା ତର୍‌ ସିମିୟନ୍‌*29:33 ଇଚିସ୍‌ ୱେନାକା ଇଡ଼୍‌ତାତ୍‌ । 34 ଆରେରଗ ଏସ୍‌ପିସ୍ତି ହିମ୍‌ଣା ଗାଟାଜ଼ି ଇଚାତ୍‌, "ନଙ୍ଗୟ୍‌ ଆଣ୍ଡ୍ରେନ୍‌ ନା ତାକେ ଆହା ଆଦ୍‌ନାନ୍‌, ଇନେକିଦେଂକି ଆନ୍‌ ହେୱାନ୍ତି ତିନ୍‌ ହିମ୍‌ଣାଙ୍ଗ୍‌ ଗାଟାତାଂନା"; ଇଦାଂକାଜିଂ ତା ତର୍‌ ଲେବି*29:34 ଲାଲ୍‌ସା ଆହା ହିତାନ୍‌ । 35 ଇଦାଂପାଚେ ଆରେରଗ ହେଦେଲ୍‌ତି ଏସ୍‍ପିସ୍ତିଲେ, ହେଦେଲ୍‌ ହିମ୍‌ଣା ଗାଟାଜ଼ି ଇଚାତ୍‌, "ନଂ ଆନ୍‌ ନିତ୍ରେମାପ୍ରୁତି ଗୁଣ୍‌ କେର୍‌ନାଙ୍ଗ୍‌," ଲାଗିଂ ହେୱାନ୍‌ ତା ତର୍‌ ଜିହୁଦା*29:35 କେର୍‌କଣ୍‌ ଇଡ଼୍‌ତାତ୍‌, (ନିତ୍ରେମାପ୍ରୁତି ଗୁଣ୍‌ ହିତାନ୍‌) । ଇଦାଂପାଚେ ତା ଗରବ୍‌ ଟେବା ଆତାତ୍‌ ।