Atos 2

Apetulo atendakwajigana bhandu Ngani Jammbone

14 Ngapena Apetulo akajema ja bhenibhala akandundame komi na jumo akaajemeka kwajigananga bhandu kwa lilobhe likolongwa, "Mwakaanung’una bhangu Bhayahudi mwangota bhoha bhantamanga pambani pa Yelusalemu, nnyohanikiange maha malobhe gangu. 15 Bhandu habha bhangakolwelanga handa chinng’anikianga, mboni nangocheni nga chaa tatu ja kundabhi? 16 Nambo hele nga lilobhe libhakalobhola Ayoeli alondohi jwa Annoongo,

17 ‘Hangwana alongela, mu machobha genigala ga kupela,

mbakwaletelanga bhandu bhoha Mboomo jwaangu.

Bhana bhinunji akanalome na hakaikege bhapakubhoanga ulondohi.

Na akanangwendu bhinunji bhapakulolanga hagamii,

na hihokolo hinunji bhapakuhagamilanga hagamihi.

18 Kweli, bhatumichi bhangu akanalome na hakaikege,

mbakwaletelanga Mboomo jwangu machobha genigala, nabhena bhapakubhoanga ulondoi.

19 Mbakutenda yakangachika nnani kwa Annoongo,

na hilolelo pahi pachilambo,

kupakubhehe na miyai, mooto na lyohi lyakutopa,

20 lyobha lipakulekelwa lubhendu,

lwehi gupakubhehe nkele handa miyai,

tangu ja kubhokela lyenile lichobha likolongwa na ung’anyimo gwa Hangwana.

21 Penapo, joajola jwapakujopa kupetela lihina lya Hangwana, apakuokolewa.’"

22 "Bhandu bha ku Isilaeli, nnyoanikiange malobhe gangani! Ayesu bha ku Nazaleti akibha mundu yakubhehe mamulaka gabhe ga chinnoongo gakalangikwa kwinunji kwa kutenda yakangachika, hikangachiko na hilolelo Annoongo hibhakatenda pakati jinunji kwa ndela jabhe, handa chimmanyanga. 23 Kulongana na ndela jabhe Annoongo bhene akakulumikia kubhee mwangota mwakamule Ayesu na mwangota nkankoma na kunkamua kwa bhandu bhangali mmbone bhaabhambe panchalaba. 24 Nambo Annoongo akaayoha, akahokoa kubhoka mu hibhini ya malilo kwakubhee hikakombolikehopo malilo gaatabhe. 25 Adaudi akalobhola nnani jabhe kubhee,

‘Nakaabhona Hangwana nnoongi jangu machobha goha,

kubhee jonojwe akabhandikana na nenga hata ngapukunyika.

26 Henela, ntima gwangu gukahachuka,

kabhele ngapoota hilulu ya kuangalala.

Mmele gwangu gupakutama mu kuhobhalela,

27 kwakubhee mwenga Hangwana Annoongo ngaleka mboomo jangu ku lihembo litandamao lyangapela,

wala ngaleka antumichi bhinu bhakuaminika abhole mu likabuli.

28 Ntekunangia ndela jijindandaa ku umomi,

ndendakuhachuka muno ligongo nibhile kwaachinu!’"

29 Akanung’una bhangu, mbala kunnobholelanga ngani ja hikubho hiiyapatite Adaudi, akolo bhitu. Bhenabho akajomoka, akachikwa, kabhele likabhuli lyabhe libhile panipani paachitu mpaka leleni. 30 Nambo kwakubhee Adaudi akibha halondoi, bhakaimanya kubhehe Annoongo akaalapila chilapo yakubhe apakwajelea jumo jwa ubhelehi gwabhe kubhehe hakolo mahali pakwe. 31 Adaudi akalola tangu hikubho hiipakutendekwa na Annoongo na henela akalobhola ngani ja kuyoka kwa Akilisito pabhalobhola, Ngaaleka mu lihembo litandamao lyangapela, mmele gwabhe gwangabhola. 32 Annoongo nga jwaakaayoa jonojwe Ayesu na twenga twabhoa nga tukachilola chikubho hecho. 33 Ayesu pabhakatolekwa na kubhekwa na Annoongo upande gwabhe gwa kunnelo, akapokela Mboomo ja Annoongo kubhoka kwa Atati jonijola jubhakanhaidi, atekuteletela Mboomo ja Annoongo. Chenjeni nga chimuchibhonanga nangocheni na kujoanga. 34 "Adaudi bhene, jwangatolekwa kunani kwa Annoongo, ila jonojwe akalobhola,

‘Hangwana akaalobholela Hangwana bhangu,

ntame upande gwangu gwa kunnelo,

35 mpaka pambakutenda mwaatandae akaapwati bhinu.’"

36 "Bhandu bhoha bha ku Isilaeli bhamanyange kubhee, kweli hojo nga Ayesu bhantekwabhamba, nga jonojwe yakubhee Annoongo jwatekwatenda kubhehe Hangwana na Akilisito."

37 Bahi, bhandu pabhakajoanga genago, ikaabhinanga mu mitima jabhenji, bhakabhakonyanga Apetulo bhenibhala akandundame ajabhe, "Akaanung’una bhitu nangocheni tutendebholi?"

38 Apetulo akaajangula, "Nnekange kulemwa kwinunji na kila jumo jwinunji na abatichwe kwa lihina lya Ayesu Akilisito ili mpatange kulekelelwa kulemwa kwinunji na mwangota mpakupokelanga ahadi jenijela ja Mboomo ja Annoongo. 39 Kwakubhee, ahadi jenjeni nkabhekewa mwangota, na bhana bhinunji, na bhoha bhabhatamanga kutali na ligongo lya mundu yakubhee Hangwana Annoongo bhitu apakwajinula kwaachabhe."

40 Malobhe gangi gajingi, Apetulo bhakakachimila na kwakulumikianga bhandu kulobhola, "Nchiokoange kubhoka mu chibhelehi heche chibou." 41 Bhandu bhajingi bhakakondanga malobhe gabhe bhakabatichwanga. Bhandu handa elupu tatu bhakajonjokeka mu chenichela chibhoga chichahobhalela Akilisito lichobha helyo.