44 Konikola kululemba akaaokolo bhitu bhakibhanga na chenichela chilendo cha kuhukumulila. Likaalakikwa handa Annoongo chibhakaalobholela Amusa aalakie chilebhe chene cha chenichela chibhakaalangiha. 45 Ngapena hakaokolo bhitu bhakapokelananga akachinabhenenji mpaka muda gwa Ayoshua, pabhakanyakulanga chenichela chilambo kubhoka ku chilambo yakubhe Annoongo bhakagabhenga nnoongi jabhenji. Chilendo chenecho chikatama penapo mpaka machobha ga Adaudi. 46 Adaudi akabhajilwa na Annoongo, akaajopa Annoongo alekelee ili anchengele nyuumba yakubhee jonojwe na bhandu bha ku Isilaeli bhoa bhakakombolinge kwaajopa Annoongo. 47 Nambo Aselemani nga jwaakachengela Annoongo nyuumba.

48 "Henela, Annoongo akolongwa ngatama mu nyuumba hiichengwite na bhandu, handa alondoi bhabhe chibhalobhola.

49 ‘Hangwana alobhola.

Kunani kwa Annoongo nga chitengu changu cha umwenye

na pachilambo nga chitengu changu cha kubhekela makongono.

Nga nyuumba niki jinkombola kunjengela,

na koji kumbakupomolela?

50 Hilebhe heye yoha nenga nga ndekuihalakia au ngabha?’"