Lucas 1

Kubhelekwa kwa Ayesu kutendakutangachwa

26 Mu mwehi gwa sita gwa chitumbo cha Aelizabeti Annoongo bhakaatuma Agabulieli antumichi bha kunani Kulihunde gwa Hangwana bhajaule kono mu chilambo cha Kunazaleti kono Kugalilaya, 27 kwa haikege jumo nhenja bhabhankema Amalia bhabhalombwite na mundu bhamo lihina lyake Achupu bha lilagwa cha Adaudi. 28 Antumichi bha Kunani Kulihunde bhakahika na kwaachalimia, "Hangwana bhabhii pamo na mwenga ntekubhalikiwa!"

29 Amalia pabhajowinaje malobhe hago bhakachikonya muno na kuganikiha muno maana ja chalamu heyo. 30 Nambo antumichi bha Kunani Kulihunde bha Annoongo, bhakalobholela Amalia, "Nkontokujogopa Annoongo bhatekuntendela gammbone. 31 Kwakubhehe, mpakupata chitumbo mpakubheleka mwana mwanalome na mwenga mpakumpekea lihina lyake Ayesu. 32 Bhenabho bhapakubhehe amundu bha mamulaka na bhapakwakema amwana bha Annoongo Bhabhabhii Nnani Muno. Na bhena bhapakubhehe ukolo handa atati bhabhe Adaudi. 33 Henela bhapakuchihukumula chilagwa cha Ayakobo machobha goha na ukolo gwabhe ngabhehe na majomokelo!"

34 Amalia bhakaajangula, "Hikomboleka bholi genago na nenga naamanya hopo mwanalome?"

35 Antumichi bha Kunani Kulihunde gubhaajangwilaje Amalia, "Mboomo ja Annoongo jipakunhikila na machili gabhe Annoongo bhabhabhile kunani muno gapakunwekela handa nheka na bhenabho bhabhabhile kwa ligongo lya Annoongo bhabhapakubhelekwa bhapakemwa Mwana jwa Annoongo. 36 Nnole halongo bhinu Aelizabeti, bhenabho bhabhakakemwa ntonga bhapetwile chitumbo bhabhi bhakongopile, na gongo nga mwehi gwabhe gwa chita kwa bhenabho yakubhehe bhandu bhakaimanyanga kubhehe ntonga. 37 Kwa maana chaakwa chilebhe changakomboleka kwa Annoongo."

38 Amalia bhakalobhola, "Nenga nga antumichi bha Hangwana, nndendele handa chinnongile." Ngapena bhenibhala Antumichi bha Kunani Kulihunde bhakajaula.