Lucas 5

Ayesu bhakaagula bhanapunji bha kwanja

1 Lichobha limo, Ayesu bhakibha bhatekujema nngulugulu ja litanda lya Genesaleti, na nkutuli nkolongwa gwa bhandu bhajingi bhakibha bhatekwaatindila bhabhi kuminyana, bhabhi kujohanikihanga lilobhe lya Annoongo. 2 Bhakabhona mitumbwi jibhele nngulugulu mwa litanda. Na bhakoka homba bhene bhabhi bhabhokitinge, bhabhi kuhatambula na kuhalakiha mapelele gabhenji. 3 Baada ja Ayesu kujingila mu ntumbwi gumo gugukabhehe gwa Asimoni, bhakaajopa Achimoni bhagupeleke mu mmachi pakujendea muno kubhoka nngulugulu mwa litanda. Bhakajigananga lilubhalo lya bhandu bhabhi bhatamite mu goni gola ntumbwi 4 Pabhakajomola kujigana, bhakaalobholela Asimoni, "Nangocheni npeleke ntumbwi mpaka pamachi gakujendea ngapena nkatuluange mapelele ginunji nkakokange homba." 5 Asimoni bhakaajangula, "Mwe mwa Hangwana, tutekuchimilaa kukoka homba kilo choha pangali kupata chilebhe, nambo kwakubhehe nnongile, tupakujaula kutulua mapelele gitu mmachi." 6 Pabhakajeha mapelele gabhenji mmachi, na pabhakatendanga henela bhakakokanga homba hijingi, na mapelele gabhenji gakajemeka kupapuka. 7 Bhakapotanga himbwele kwaakemanga akaajabhe bhabhakibha mu ntumbwi gongi bhahikange kwajangatilanga. Na bhena bhakahikanga na bhakahitwelehanga mitumbwi yoha hibhele homba, na mitumbwi jabhenji hikabhandikila kutibhila. 8 Asimoni Apetulo chibhakabhona genago, bhakatindibhala majugwa nnoongi ja Ayesu bhakalobhola, "Hangwana mmoke nnongi jangu, nenga nga mundu bha chaambi!" 9 Kwa kubhehe bhenabho na ajabhe bhakibha bhatekangachanga muno kwa kukoka homba hijingi. 10 Hiyoyo Ayakobo na Ayohana, bhana bha Azebedayo, yakubhehe nga bhakoka homba ajabhe Asimoni na bhenabho bhakakangachanga. Penapo Ayesu bhakaalobholela Asimoni, "Nkotokujogopa kwa kubhehe kujemeka nangocheni mpakubhehe hopo bhakoka homba nambo mpakubhehe amundu bha kwaaletanga bhandu kwa Annoongo." 11 Bahi, baada ja kuhiletanga mitumbwi nngulugulu ja litanda, bhakalekanga kila chilebhe na kwaakagula Ayesu luhaju kwa luhaju.