Gênesis 6

Kulemwa kwa bhando

1 Kipinde bhando pibhatumbwila kujhonjekeka na kujhenela pannema na kupapa yana ikeghe, 2 pakate jha yana inalome ya Chapanga ngabhalolita kubhehe achikabhale bha bhando kuhalala. Ngabhatoila bheniya na kubhehe akaana bhabhe. 3 Peniya, Chapanga palongila, "Naleka jhe bhando bhatame machiko ghoha ghangapeta nhwalo bheniya ndi bhando bha kuwe tugha. Kwa yene, bhilama ng’o kupeta yaka miya jhimo na makome mabhele." 4 Kwa machiko gheniya na kujhendelela pakibha bhando akakoloakolo hake pannema bhakemitwa Akanefile. Bheniya bhabhelwika na yana ya inalome ya Chapanga na yana ikeghe ibhelwike na bhando. Bhando bheniya ghakibha malome na bhando bhibhamanyikina hake kipinde chene.

5 Chapanga palolita bhando bhitenda kila namuna jha uhakaho pannema, na palolita kila lyawachii mundo umwojho lyanganandela tugha machiko ghoha, 6 Chapanga ngabhila na ungolongonde hake umwojho gwake kukumpangana mundo pannema, Chapanga ngakokolika hake umwojho gwake. 7 Bhambo Chapanga palongila, "Nanakomelekeya njwe bhando bhumbangine pannema, bhando na inyama yukumanyahe na inyama ikwabha na ijhune yukunane. Mbaha nganiipangine jhe pannema." 8 Nambo Nuho ngajheketilwa palonge jha Chapanga.

Nuho

9 Ghanga ndi malobhe gha Nuho na kibheluko chake. Nuho akibha mundo jwajheketilwe na jwahobhilika palonge jha Chapanga, jwangakokolekwa na bhando bha kipinde chake. Kabhele atamita kukunhobholela Chapanga.