पैदाइस 11

मानूस की भासा मा गड़बड़ी होनको बखान

1 पूरी धरती मा एकच भासा, अखीन सब जाति गीनमा एकच बोली बोलत होती। 2 वोना बेरा लोक दिनउगती कन चलतो बेरा उनला सीनार देसमा एक मैदान मिल्यो, अना वय वा मैदान म बस गयो। 3 तबा उनना आपस मा कव्हन लग्यो, "आवो, हम ईटा बनाय-बनाय के वोला साजरो लक स्तो मा पकाबीन।" अना उनना गोटा की जघा ईटा लक अना चूना की जघा माती को गारा लक काम लियो। 4 तबा उनना कह्यो, "आवो, अमी एक नगर अखीन एक मीनार बनाबीन, जेकी सेंडी बादल ला छीव ले, असो परकार लक अमी अपरो नाव कमावबीन। कही असो नोको होय का अमीला पूरी धरती पर फैलनो पड़े।" 5 जब मानूस लोग नगर अना मीनार बनाय रह्यो होतो, तबा उनला चोवन लाय परमेस्वर उतर आयो। 6 तबा परमेस्वर न कह्यो, "मी चोवासू का सब एकच जाती को लोग सेत अना इन सबको एकच भासा से, अना उनना असो काम सुरूवात करयो, अना अता जोन काम को यो कोसीस करहेत वोको मा काही भी कठीन नहात। 7 एकोलाय आवो, अमी उतर के उनको भासा मा मोठो गड़बड़ी डाकबीन, का वय एक दूसरो को बोली ला नही समज सकेत।" 8 असो परकार लक परमेस्वर ना उनला वोना नगर लक पूरो धरती को वरता फैलाय दियो। 9 यो कारन लक उ नगर को नाव बेबीलोन*11:9गड़बड़ पड़यो, काहेका पूरी धरती की भासा मा जोन गड़बड़ी से परमेस्वर ना उतच डाकयो अना उतच लक यहोवा परमेस्वर ना पूरी धरती मा मानूस गिनला फैलाय दियो।

सेम को खानदान

10 सेम को खानदान यो आय। परलय को दूई साल मघानी जब सेम एक सौ साल को भयो, तबा ओना अपरछद ला जलम दियो। 11 अना अपरछद को जलम को मघानी सेम पाँच सौ साल जीन्दो रह्यो; अना ओको अखीन टूरा-टूरी पैदा भइन।

12 जब अपरछद पैंतीस साल को भयो, तबा ओना सेलह ला जलम दियो। 13 अना सेलह को जलम को मघानी अपरछद चार सौ तीन साल अखीन जीन्दो रह्यो, अना ओको अखीन टूरा-टूरी पैदा भइन।

14 जब सेलह तीस साल को भयो, तबा ओको लक एबेर को जलम भयो। 15 अना एबेर को जलम को मघानी सेलह चार सौ तीन साल अखीन जीन्दो रह्यो, अना ओको अखीन टूरा-टूरी पैदा भयो।

16 जब एबेर चौतीस साल को भयो, तबा ओको लक पेलेग को जलम भयो। 17 अना पेलेग को जलम को मघानी एबेर चार सौ तीस साल अखीन जिन्दो रह्यो, अना ओको अखीन टूरा-टूरी पैदा भयो।

18 जब पेलेग तीस साल को भयो, तबा ओको लक रऊ को जलम भयो। 19 अना रऊ को जलम को मघानी पेलेग दूई सौ नव साल अखीन जीन्दो रह्यो, अना ओको अखीन टूरा-टूरी पैदा भयो।

20 जब रऊ बत्तीस साल को भयो, तबा ओको लक सरूग को जलम भयो। 21 अना सरूग को जलम को मघानी रऊ दूई सौ सात साल अखीन जीन्दो रह्यो, अना ओको अखीन टूरा-टूरी पैदा भयो।

22 जब सरूग तीस साल को भयो, तबा ओको लक नाहोर को जलम भयो। 23 अना नाहोर को जलम को मघानी सरूग दूई सौ साल अखिन जीन्दो रह्यो, अना ओको अखीन टूरा-टूरी पैदा भयो।

24 जब नाहोर उनतीस साल को भयो, तबा ओको लक तेरह को जलम भयो। 25 अना तेरह को जलम को मघानी नाहोर एक सौ उन्नीस साल अखीन जीन्दो रह्यो, अना ओको अखीन टूरा-टूरी पैदा भयो।

26 जब तकन तेरह सत्तर साल को भयो, तबा तकन ओको लक अबराम, नाहोर, अना हारान पैदा भयो।

तेरह की खानदान को सूची

27 तेरह को खानदान को सूची यो से। तेरह न अबराम, नाहोर अना हारान ला जलम दियो, अना हारान ना लूत ला जलम दियो। 28 अना हारान जब वोको अजी तेरह जिन्दो होतो तबच मर गयो। उ आपरो जलम भूमी ऊर नगर माच मरयो होतो वहान कसदी घराना को लोक होतीन। 29 अबराम अना नाहोर ना बिहाव करयो। अबराम को बायको को नाव सारै, अना नाहोर की बायको को नाव मिल्का होतो। मिल्का हारान की टूरी होती, अना हारान मिल्का अना यिस्का इन दोई को अजी होतो। 30 सारै त वाखड़ होती, अना ओकी कोनी सन्तान नहीं होती। 31 अना तेरह ना अपरो टूरा अबराम, अना अपरो नाती लूत, जोन हारान को टूरा होतो, अना अपरो बहू सारै, जोन ओको टूरा अबराम को बायको होती, इन पूरो ला लेय के कसदी जाति को ऊर नगर लक हीटके कनान देस को कन लक चल पड़यो पर हारान नाव को देस मा पहुंच के उतच रहन लग्यो। 32 जब तेरह दूई सौ पाँच साल को भयो, तबा ऊ हारान देस म मर गयो।